اەس سالۋدى قولداۋ جونىندەگى حالىقتىق شتاب مۇشەلەرى تۇركىستان وبلىسىنىڭ تۇرعىندارىمەن بىرقاتار كەزدەسۋ وتكىزدى.

تۇركىستاندا حالىقتىق شتاب مۇشەلەرى ءوڭىر اكتيۆىمەن جۇزدەسىپ، وعان 300-دەن استام ادام قاتىستى. ءماجىلىس سپيكەرى، «AMANAT» پارتياسىنىڭ توراعاسى ەرلان قوشانوۆ شتاب اەس سالۋ جونىندەگى رەسپۋبليكالىق رەفەرەندۋم قارساڭىندا وسى تاريحي وقيعانىڭ ماڭىزى تۋرالى ازاماتتارمەن اشىق اڭگىمەلەسۋ ءۇشىن وڭىرگە ارنايى كەلگەنىن اتاپ ءوتتى.

ءماجىلىس توراعاسى تۇركىستاندىقتار ەل پرەزيدەنتى قاسىم-جومارت توقاەۆتىڭ قازاقستاندىقتاردىڭ ءال-اۋقاتىن ارتتىرۋ جونىندەگى پروگرەسسيۆتى باستامالارى مەن ساياساتىن ءاردايىم قولداپ كەلە جاتقانىن جەتكىزدى.

«مەملەكەت تاعدىرىنا قاتىستى كەز كەلگەن ماڭىزدى شەشىم حالىقتىڭ قاتىسۋىمەن جانە ونىڭ پىكىرىن ەسكەرە وتىرىپ قابىلدانادى. پرەزيدەنتىمىز ۇستانعان ساياساتتىڭ بۇلجىماس قاعيداسى – وسى. بۇل – ءبىزدىڭ قوعامدا جاڭا ساياسي مادەنيەت قالىپتاسقانىنىڭ كورىنىسى. ءبىز ءار قادامدى نىق باسىپ، رەفورمالاردى كەزەڭ-كەزەڭىمەن جۇزەگە اسىرىپ كەلەمىز. تۇپكى ماقسات – ونى ءار ازامات، ءار وتباسى سەزىنۋگە ءتيىس»، – دەدى ول.

ەرلان قوشانوۆ ەلەكتر ەنەرگيا تاپشىلىعى بۇگىندە ەلىمىزدىڭ وڭتۇستىك وڭىرلەرىندە ايرىقشا سەزىلەتىنىن اتاپ ءوتتى. بىلتىرعى قورىتىندى بويىنشا دەفيتسيت 3,1 ملرد كۆت/ساع قۇرادى. سالىستىرۋ ءۇشىن ايتا كەتسەك، ورتاشا ەسەپپەن 100 مىڭ تۇرعىنى بار ءبىر قالا 700 ملن كۆت/ساع تۇتىنادى.

بۇدان ءارى شتاب مۇشەلەرى وبلىستىق اۋرۋحانادا دەنساۋلىق ساقتاۋ سالاسىنىڭ قىزمەتكەرلەرىمەن كەزدەسىپ، اتوم ەنەرگەتيكاسىن دامىتۋ پەرسپەكتيۆالارىن تالقىلادى.

وسى كۇنى حالىقتىق شتاب مۇشەلەرى ساۋران اۋدانىنا قاراستى ورانعاي اۋىلىنا باردى. اۋىل تۇرعىندارىمەن اڭگىمەلەسۋ بارىسىندا شتاب مۇشەلەرى جىلىجاي سالۋعا پولياك ينۆەستورلارىن تارتقان سايرام اۋدانىنىڭ شارۋالارى تۋرالى ايتىپ، ولار كوكونىس ءوندىرىسىن تولىق قۋاتتا ىسكە قوسا الماعانىن مالىمدەدى. بۇعان سەبەپ – تۇرعىن ۇيلەردىڭ وزىنە ارەڭ جەتىپ تۇرعان ءالسىز قوسالقى ستانتسيا. شتاب مۇشەلەرى بارلىق اگرارلىق كاسىپورىنداردى تۇراقتى ەنەرگيا كوزىمەن قامتاماسىز ەتۋدىڭ ماڭىزىن اتاپ ءوتتى.

سونىمەن قاتار، شتاب مۇشەلەرى كەنتاۋ قالاسىندا جەو-5 ۇجىمىمەن كەزدەستى. 1952 جىلى ىسكە قوسىلعان بۇل جىلۋ ەنەرگەتيكا تورابى 15 مىڭعا جۋىق ادامدى قامتىپ وتىر. حالىقتىق شتاب مۇشەلەرى بارلىق كوممۋنالدىق كاسىپورىنداردىڭ ۇزدىكسىز جۇمىس ىستەۋىنىڭ جانە ولاردى تۇراقتى ەلەكتر ەنەرگيا كوزىمەن قامتاماسىز ەتۋدىڭ ماڭىزىنا توقتالدى.

Abai.kz