بۇگىن حالىقتىق شتاب مۇشەلەرى بيىل 6 قازاندا وتەتىن رەفەرەندۋمنىڭ ماڭىزىن تۇرعىندارمەن تالقىلاۋ ءۇشىن جامبىل وبلىسىنا كەلدى.

تارازدا حالىقتىق شتاب مۇشەلەرى وڭىردەگى پەداگوگتار قاۋىمىمەن كەزدەستى. ءىس-شاراعا 350-دەن استام ادام قاتىستى. شتاب مۇشەلەرى مۇعالىمنىڭ قوعامداعى ءرولى دە، بەدەلى دە ەرەكشە ەكەنىن اتاپ ءوتتى. مۇعالىمدەر ءبىلىمدى ۇرپاق تاربيەلەۋ ارقىلى ەلدىڭ وركەندەۋىنە جول اشادى. سوندىقتان ۇستازدار قاۋىمى اەس تۋرالى تولىق اقپارات الىپ، بەيبىت اتومدى قولدانۋدىڭ بارلىق ەرەكشەلىگىن ءتۇسىنۋى، تولعاندىرعان سۇراق-ساۋالدارعا جاۋاپ الۋى – اسا ماڭىزدى.

شتاب مۇشەلەرى جينالعان كوپشىلىكتى اتوم ەنەرگەتيكاسىن دامىتۋ باعىتىنداعى الەمدىك ترەندتەر، اەس-تىڭ قاۋىپسىزدىگى مەن سەنىمدىلىگىن ارتتىرۋ بويىنشا قولدا بار قۇرالدار تۋرالى جان-جاقتى حاباردار ەتتى.

«حالىق رەفەرەندۋمعا بەلسەندى قاتىسىپ، داۋىس بەرگەن جاعدايدا قازاقستاندا III نەمەسە III+ بۋىندى اتوم ەلەكتر ستانتسياسى سالىنادى. الەمدە 30-دان استام دامىعان مەملەكەتتە 415 اتوم رەاكتورى جۇمىس ىستەپ تۇر. بۇگىندە 15 مەملەكەت 61 اتوم رەاكتورىن سالۋعا بەل بۋدى. ەنەرگەتيكا سالاسىنداعى مامانداردىڭ بولجامى بويىنشا 2050 جىلعا قاراي اتوم ەنەرگياسى 2 ەسە كوپ پايدالانىلادى. ەگەر اتوم ەلەكتر ستانتسيالارى قاۋىپتى بولاتىن بولسا، نەگە دامىعان مەملەكەتتەر ونى سالۋعا قۇشتار بولىپ وتىر؟»، – دەدى ۇلتتىق عىلىم اكادەمياسىنىڭ پرەزيدەنتى اقىلبەك كۇرىشباەۆ.

سونداي-اق، حالىقتىق شتاب مۇشەلەرى جەرگىلىكتى تەمىرجول قىزمەتكەرلەرىمەن كەزدەستى. بۇگىندە 110 مىڭنان استام وتانداسىمىز «قازاقستان تەمىر جولىندا» قىزمەت ەتەدى. ولاردىڭ ەرەن ەڭبەگى ەلدەگى بارلىق كولىك ينفراقۇرىلىمىنىڭ جۇمىسىن قامتاماسىز ەتەدى. اڭگىمەلەسۋ بارىسىندا سالانى ودان ءارى دامىتۋ جانە حالىقتىڭ، سونداي-اق بيزنەستىڭ سۇرانىسىن ەسكەرە وتىرىپ، جۇمىس تيىمدىلىگىن ارتتىرۋ ءۇشىن قتج-نى ساپالى ەلەكتر ەنەرگيامەن قامتاماسىز ەتۋدىڭ ماڭىزى ەرەكشە اتاپ ءوتىلدى.

وسى كۇنى اەس سالۋدى قولداۋ جونىندەگى حالىقتىق شتاب مۇشەلەرى مەركى اۋىلىنىڭ تۇرعىندارىمەن – قارجىلىق ساۋاتتىلىقتى ارتتىرۋعا ارنالعان «قارىزسىز قوعام» جانە «اۋىل اماناتى» جوبالارىنا قاتىسۋشىلارىمەن كەزدەستى. جۇزدەسۋ بارىسىندا ولار ەلىمىزدە اگروونەركاسىپ كەشەنىن ودان ءارى دامىتۋ جانە اۋىل تۇرعىندارىن جۇمىسپەن قامتۋ دەڭگەيىن ارتتىرۋ ماسەلەلەرى بويىنشا پىكىر الماستى. سەنىمدى ەنەرگيا كوزى بولمايىنشا كوپ ماسەلەنى شەشۋ مۇمكىن ەمەس.

حالىقتىق شتابتىڭ ءباسپاسوز قىزمەتى

Abai.kz