«دەپۋتاتتار بيۋدجەت جوباسىمەن جۇمىس بارىسىندا بىرقاتار جۇيەلىك كەمشىلىكتى انىقتادى. ول تۋرالى بۇگىن ايتىلدى. ەڭ الدىمەن، بيۋدجەتتىڭ كىرىس بولىگىن قالىپتاستىرۋعا قاتىستى. قيىندىقتار بار ەكەنى انىق. اتاپ ايتقاندا، ەكسپورتتىق تاۋارلاردىڭ باعاسى تۇراقسىزدانىپ، الەمدىك نارىقتىڭ وزگەرۋىنە تاۋەلدى بولىپ وتىر. وسىعان بايلانىستى بيۋدجەت كىرىستەرىنىڭ تومەندەۋى بىرنەشە جىلدان بەرى جالعاسىپ كەلەدى»، - دەدى ەرلان قوشانوۆ ءماجىلىستىڭ جالپى وتىرىسىندا 2025-2027 جىلدارعا ارنالعان رەسپۋبليكالىق بيۋدجەتتى تالقىلاۋدى قورىتىندىلاي وتىرىپ.

سونداي-اق، ءماجىلىس مەملەكەت باسشىسىنىڭ قوسىمشا كىرىس كوزدەرىن تابۋ قاجەتتىگى تۋرالى تاپسىرماسىن ەسكە سالدى.

ونىڭ ايتۋىنشا، ۇكىمەت تاراپىنان كىرىستەردى قالپىنا كەلتىرۋ جانە بيۋدجەتتى ۇزاق مەرزىمدى تۇراقتاندىرۋ بويىنشا پارمەندى ارەكەتتەر جوق.

«بۇل دەپۋتاتتار اراسىندا ۇلكەن الاڭداۋشىلىق تۋعىزىپ وتىر، بۇگىن ۇكىمەت باسشىسى مەن مۇشەلەرىنە ءبىراز سۇراق قويىلدى. حالىق تابىسىن ارتتىرۋعا جانە ەكونوميكانى وسىرۋگە دەگەن ۇكىمەتتىڭ تالپىنىسى ءوز جەمىسىن بەرەدى دەپ ۇمىتتەنەمىز. وڭدەۋشى ونەركاسىپتىڭ ۇدەمەلى ءوسۋى جونىندەگى بولجامدا جالاڭ تسيفرلاردى قۋالاي بەرمەي، جاڭا ەكونوميكالىق ساياساتتى بەلسەندى ىسكە اسىرۋ قاجەت، ياعني ناقتى ناتيجە كەرەك. جاڭادان وندىرىستەر اشۋ جانە ولاردى دامىتۋ ۇكىمەت جۇمىسىنىڭ نەگىزگى باسىمدىعى بولۋعا ءتيىس. سوندا عانا ءبىز ەل بيۋدجەتى كىرىستەرىنىڭ ايقىن ءوسىمىن كورەمىز»، - دەيدى ول.