الماتىدا 17 قاراشا حالىقارالىق ستۋدەنتتەر كۇنىنە ارنالعان اۋقىمدى "Almaty Student's Week" فەستيۆالى باستاۋ الدى. ءىس-شارا الماتى قالاسى جاستار ساياساتى باسقارماسىنىڭ قولداۋىمەن  وتۋدە، ونىڭ باستى ماقساتى – ستۋدەنتتەردىڭ قالا ومىرىنە بەلسەندى قاتىسۋىن قامتاماسىز ەتىپ، جاس كوشباسشىلاردى انىقتاۋ.

11-17 قاراشا ارالىعىندا فەستيۆال  اياسىندا ستۋدەنتتەرگە ارنالعان 30-عا جۋىق ءارتۇرلى ءىس-شارالار وتەدى. "Almaty Student's Week" فەستيۆالىنە قاتىساتىن ءاربىر ستۋدەنت ءوز تالانتى مەن كوشباسشىلىق قاسيەتتەرىن كورسەتە الادى. سونداي-اق، جاستارعا باسقا وقۋ ورىندارىنىڭ ستۋدەنتتەرىمەن  بايلانىس ورناتۋعا  مۇمكىندىك بەرىپ،  جوعارى وقۋ ورىندارى اراسىنداعى ءوزارا ىنتىماقتاستىقتى دامىتۋعا سەپتىگىن تيگىزەدى.

فەستيۆال ءىس-شارالارى ستۋدەنتتەرگە تاجىريبە، يدەيالار جانە ءبىلىم الماسۋعا ارنالعان الاڭدار اشىپ، بولاشاق بىرلەسكەن جوبالار مەن باستامالاردىڭ نەگىزىن قالايدى. بۇل – ستۋدەنتتەردىڭ زياتكەرلىك، سپورتتىق، مادەني جانە قوعامدىق سالالاردا ءوزىن كورسەتىپ، ءوز داعدىلارىن نىعايتىپ، ءوزىن دامىتۋعا  بىرەگەي مۇمكىندىك.

"Almaty Student's Week" فەستيۆالىنىڭ ماڭىزدى بولىگى – جاستاردىڭ پاتريوتتىق رۋحىن كوتەرۋ، بىرلىگىن نىعايتۋ جانە قازىرگى زامانعى سىن-قاتەرلەرگە دايىن الەۋمەتتىك بەلسەندى جانە ءبىرتۇتاس ستۋدەنتتىك قاۋىمداستىق قۇرۋ.

ايتا كەتەيىك، الماتىدا 35 جوعارى وقۋ ورنىندا 199 مىڭنان استام ستۋدەنت ءبىلىم الادى، ولاردىڭ 124 مىڭنان استامى باسقا وڭىرلەردەن كەلگەن.