تۋريزم جانە سپورت مينيسترلىگى «قازاقستان رەسپۋبليكاسىنىڭ كەيبىر زاڭنامالىق اكتىلەرىنە دەنە شىنىقتىرۋ جانە سپورت، سونداي-اق نورمالاردىڭ ارتىق (شامادان تىس) زاڭنامالىق رەگلامەنتتەلۋىن بولعىزباۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن ازىرلەدى. 

زاڭ جوباسىن ازىرلەۋ بارىسىندا بىرنەشە ماڭىزدى ماسەلەلەر مەن ناقتى ستاتيستيكالىق دەرەكتەر نەگىزگە الىندى. قازاقستاندا قازىردىڭ وزىندە 180-نەن استام سپورت ءتۇرى دامۋدا. الايدا جىل سايىن تەك 13 جازعى جانە 5 قىسقى وليمپيادالىق سپورت تۇرىنەن عانا مەدال جەڭىپ الىنادى. 2018 جىلى ەلىمىزدىڭ سپورتشىلارى 370 مەدال جەڭىپ السا، 2020 جىلى بۇل كورسەتكىش 105 مەدالعا دەيىن تومەندەگەن. بۇل جاعداي سپورتشىلاردى دايارلاۋ جۇيەسىندەگى باستاپقى كەزەڭدەر مەن جوعارى جەتىستىكتەر سپورتىنا دەيىنگى ارالىقتاعى جەتىسپەۋشىلىكتەردىڭ ناتيجەسى دەپ باعالانادى.

سونداي-اق، جىل سايىن بالالار-جاسوسپىرىمدەر سپورت مەكتەپتەرى مەن مەكتەپ-ينتەرناتتاردىڭ شىعىندارى ءوسىپ كەلەدى، ونىڭ ىشىندە وليمپيادالىق ەمەس سپورت تۇرلەرىنە جۇمسالاتىن قاراجات كولەمى ۇلكەن ۇلەستى قۇرايدى. 2018-2020 جىلدارى سپورتتىڭ بارلىق تۇرلەرىن دامىتۋعا 646 ميلليارد تەڭگە بولىنگەن، بىراق ونىڭ 72 پايىزى ەلىمىز ءۇشىن باسىمدىعى جوق سپورت تۇرلەرىنە جۇمسالعان.

جاعدايدى جاقسارتۋ ءۇشىن تۋريزم جانە سپورت مينيسترلىگى حالىقارالىق تاجىريبەنى زەرتتەدى. وزبەكستان، بەلارۋس، ۇلىبريتانيا، گەرمانيا جانە نورۆەگيا ەلدەرىنىڭ تاجىريبەسى زاڭ جوباسىنىڭ نەگىزىنە الىندى. زاڭ جوباسى اياسىندا جوعارى جەتىستىكتەر سپورتىنا جاتاتىن سپورت تۇرلەرىن ناقتى شەكتەۋ ۇسىنىلادى.

جاڭا جۇيە بويىنشا، تەك وليمپيادا، پاراليمپيادا، سۋردليمپيا، ازيا جانە پارا ازيا ويىندارى باعدارلاماسىنا كىرەتىن سپورت تۇرلەرى، سونداي-اق ۇلتتىق سپورت تۇرلەرى جوعارى جەتىستىكتەر سپورت تۇرلەرى رەتىندە قابىلدانادى. ولاردىڭ ىشىندە مەدال العان سپورت تۇرلەرى باسىم سپورت تۇرلەرىنە قوسىلىپ، رەسپۋبليكالىق جانە جەرگىلىكتى دەڭگەيدە ءبىرىنشى كەزەكتە قارجىلاندىرىلادى. بۇل شارالار ەلىمىزدىڭ سپورت سالاسىن ءتيىمدى باسقارۋعا جانە شەكتەۋلى رەسۋرستاردى ماقساتتى تۇردە پايدالانۋعا مۇمكىندىك بەرەدى.

«اتالمىش وزگەرىستەردى ەنگىزۋ ارقىلى ءبىز ەلىمىزدە سپورتتى دامىتۋعا جاڭا سەرپىن بەرۋدى كوزدەپ وتىرمىز. قارجىلاندىرۋدى ناقتى باعىتتا جانە ناتيجەلى سپورت تۇرلەرىنە شوعىرلاندىرۋ ارقىلى قازاقستاننىڭ الەمدىك ارەنادا وزىق جەتىستىكتەرگە جەتۋىن قامتاماسىز ەتەمىز»، – دەپ اتاپ ءوتتى تۋريزم جانە سپورت ءمينيسترى ەربول مىرزابوسىنوۆ.

زاڭ جوباسىنىڭ قابىلدانۋى ەلىمىزدىڭ سپورتتىق جۇيەسىن وڭتايلاندىرىپ، جوعارى جەتىستىكتەرگە جەتۋ ءۇشىن دۇرىس قارجىلىق ستراتەگيانى قالىپتاستىرۋعا جول اشادى.

Abai.kz