ازياادا - 2025: قازاقستاننان قانشا سپورتشى باق سىنايدى؟
ءىح قىسقى ازيا ويىندارى 2025 جىلعى 7-14 اقپان كۇندەرى قىتاي حالىق رەسپۋبليكاسىنىڭ حاربين قالاسىندا وتەدى.
وسى جولى جارىستاردى حاربين جانە ونىڭ شىعىسىندا 200 شاقىرىمدا ورنالاسقان يابۋلي قالاسى دا قابىلداماق. اتاپ ايتقاندا، حاربيندە كونكي سپورتى تۇرلەرى، شايبالى حوككەي مەن كيورلينگ، ال يابۋليدە شاڭعى سپورتى، بياتلون، شاڭعى ءالپينيزمى جارىستارى جوسپارلانعان. اشىلۋ سالتاناتى 7 اقپاندا، جابىلۋ سالتاناتى 14 اقپاندا حاربين قالاسىنداعى Harbin International Convention and Exhibition Center Stadium سپورت كەشەنىندە وتەدى. كەشەندى جارىسقا قۇرلىقتاعى 32 ەلدەن 1147 سپورتشى قاتىسادى. ولار سپورتتىڭ 6 تۇرىنەن (11 ديستسيپلينا – بياتلون، تاۋ شاڭعىسى، كيورلينگ، كونكيمەن جۇگىرۋ، شورت-ترەك، مانەرلەپ سىرعاناۋ، شاڭعى جارىسى، سنوۋبورد، فريستايل-اكروباتيكا، شايبالى حوككەي، سكي-الپينيزم) 196 مەدال جيىنتىعىنىڭ يەسىن انىقتايدى.
«حاربيندە وتەتىن قىسقى ازيا ويىندارىنا 3 ايدان از ۋاقىت قالدى. بۇل ءبىز ءۇشىن 2025 جىلداعى ماڭىزدى كەشەندى جارىستىڭ ءبىرى بولماق. 1996 جىلى ءۇشىنشى اق ازيادا وسى حاربين قالاسىندا ءوتىپ، وندا قازاقستان سپورتشىلارى 14 التىن، 9 كۇمىس، 8 قولا مەدال جەڭىپ العان. ءسويتىپ جالپى كوماندالىق ەسەپتە2-ورىنعا يە بولدىق. قازاقستان قىسقى ازياداعا 1996 جىلدان بەرى تۇراقتى قاتىسىپ كەلەدى. وسى ارالىقتا ءبىزدىڭ اتلەتتەر 78 التىن، 62 كۇمىس جانە 56 قولا مەدال (بارلىعى 196) جەڭىپ العان»، – دەدى قر تسم سپورت جانە دەنە شىنىقتىرۋ ىستەرى كوميتەتى توراعاسىنىڭ ورىنباسارى ازامات يماشەۆ.
ەل قۇراماسىنان حاربيندەگى جارىسقا سپورتتىڭ 6 تۇرىنەن 139 سپورتشى (71 ەر، 68 ايەل) بارادى. ولار 50 مەدال جيىنتىعىنا تالاسادى.
1. بياتلون – 10 سپورتشى;
2. كيورلينگ – 12 سپورتشى;
3. كونكيمەن جۇگىرۋ سپورتى – 20 سپورتشى;
4. مانەرلەپ سىرعاناۋ – 4 سپورتشى;
5. شورت-ترەك – 12 سپورتشى;
6. شاڭعى جارىسى – 12 سپورتشى;
7. شايبالى حوككەي (ەرلەر) – 23 سپورتشى;
8. شايبالى حوككەي (ايەلدەر) – 23 سپورتشى;
9. تاۋ شاڭعى سپورتى – 8 سپورتشى;
10. فريستايل-اكروباتيكا – 7 سپورتشى;
11. شاڭعى جارىسى – 8 سپورتشى.
Abai.kz
