مەملەكەتتىڭ دامۋ ستراتەگياسى مەن تۇراقتىلىعى ەڭ الدىمەن ونىڭ ادام كاپيتالىنا، سونىڭ ىشىندە ءوسىپ كەلە جاتقان جاس ۇرپاققا تىكەلەي بايلانىستى. ستاتيستيكالىق مالىمەتتەرگە سۇيەنسەك، قازاقستان حالقىنىڭ شامامەن 25%-ىن 14 پەن 29 جاس ارالىعىنداعى ازاماتتار قۇرايدى. بۇل – ەلدىڭ يننوۆاتسيالىق الەۋەتى، ەڭبەك رەسۋرستارى جانە مادەني قوزعاۋشى كۇشى. وسى سەبەپتى دە ەلىمىزدە جاستار ساياساتىن قالىپتاستىرۋ مەن ىسكە اسىرۋعا ەرەكشە ءمان بەرىلەدى.

بۇگىنگى كۇنى مەملەكەتتىك جاستار ساياساتى ءبىلىم مەن كاسىبي دايارلىق: ءبىلىم بەرۋ گرانتتارىنىڭ كوبەيۋى، جوعارى وقۋ ورىندارىنىڭ باعدارلامالارىن جاڭعىرتۋ جانە سىني ويلاۋ مەن پراكتيكالىق داعدىلاردى دامىتۋ سياقتىبىرنەشە ماڭىزدى باعىتتى قامتيدى.

وسى تۇرعىدان مەملەكەتىمىز جاستاردىڭ باسەكەگە قابىلەتتىلىگىن ارتتىرۋدا. بۇعان مىسال رەتىندە جۇمىسپەن قامتۋ جانە كاسىپكەرلىكتى اتاۋعا بولادى.

«جاستار – 2020» سياقتى مەملەكەتتىك باعدارلامالار مەن جاس كاسىپكەرلەردى قارجىلاي ءارى كونسۋلتاتسيالىق قولداۋ جوبالارى جاس مامانداردىڭ ءوز ورنىن تابۋىنا مۇمكىندىك بەرەدى.

سونىمەن قاتار الەۋمەتتىك قورعاۋ جانە ازاماتتىق بەلسەندىلىك تە باستى نازاردا. جاس وتباسىلاردى باسپانامەن قامتۋ، ۆولونتەرلىك قوزعالىستى دامىتۋ جانە جاستار پارلامەنتى سياقتى جاڭا ينستيتۋتتار ارقىلى جاستاردى قوعامدىق-ساياسي ومىرگە تارتۋ ءىسى قارقىن العان.

بار مۇمكىندىك پەن شەشىمىن تاپپاعان تۇيتكىلدەر

جەتىستىكتەرمەن قاتار شەشىمىن كۇتكەن بىرقاتار سىن-قاتەرلەر دە بار. اتاپ ايتساق، اۋىل مەن قالا جاستارى اراسىنداعى مۇمكىندىكتەر تەڭسىزدىگى، ەڭبەك كوشى-قونى (بىلىكتى كادرلاردىڭ شەتەلگە نەمەسە ءىرى قالالارعا كەتۋى), تاجىريبەنىڭ جەتكىلىكسىزدىگىنەن تۋىندايتىن جۇمىسسىزدىق جانە الەۋمەتتىك قورعالماۋ ماسەلەلەرى ءالى دە وزەكتى.

سوندىقتان جاستار ساياساتى تەك قاعاز جۇزىندەگى ەسەپپەن شەكتەلمەي، ءاربىر جاس ازاماتتىڭ شىنايى سۇرانىسىنا جاۋاپ بەرۋى ءتيىس. وسى ورايدا قوعامداعى بەلسەندى ازاماتتاردىڭ دا پىكىرى ەرەكشە ماڭىزعا يە.

ەركىن اسقاروۆ، الماتى قالاسىنىڭ تۇرعىنى:

«قازىرگى جاستاردىڭ الەۋەتى وتە جوعارى، ولار جاڭا تەحنولوگيالاردى تەز مەڭگەرەدى، كرەاتيۆتى ءارى ەركىن ويلايدى. دەگەنمەن، بەلسەندى جاستاردىڭ قىزمەتىن دامىتۋ ءۇشىن تەك جوعارىدان بەرىلەتىن تاپسىرمالار نەمەسە فورمالدى ءىس-شارالار جەتكىلىكسىز. جاستارعا ءوز باستامالارىن وزدەرى جۇزەگە اسىرۋعا مۇمكىندىك پەن سەنىم وتە قاجەت. قالالىق ورتادا بولسىن، وڭىرلەردە بولسىن، جاستاردىڭ يدەيالارىن تىڭدايتىن، ولاردى ناقتى قولدايتىن اشىق ديالوگ الاڭدارى كوبەيسە دەيمىن. بەلسەندىلىك ۇيىمداستىرىلعان فورۋمدارمەن ولشەنبەۋى كەرەك، ول – جاستىڭ ءوز قوعامىن جاقسارتۋعا دەگەن شىنايى ۇمتىلىسىنان كورىنۋى ءتيىس».

بولاشاققا كوزقاراس

قازاقستانداعى جاستار ساياساتىنىڭ كەلەشەگى ءبىلىم بەرۋ سالاسىن يننوۆاتسيالىق باعىتتا جاڭعىرتۋمەن، ستارتاپ-ەكوجۇيەلەردى دامىتۋمەن جانە حالىقارالىق جاستار ۇيىمدارىمەن تىعىز ىقپالداسۋمەن بايلانىستى. جاستار ساياساتىن ءار ءوڭىردىڭ جانە ءارتۇرلى الەۋمەتتىك توپتاردىڭ ەرەكشەلىكتەرىن ەسكەرە وتىرىپ يكەمدى جۇرگىزۋ – زامان تالابى.

ازاماتتىق قوعام مەن مەملەكەتتىك قۇرىلىمداردىڭ بىرلەسكەن كەشەندى جۇمىسى عانا جاستاردىڭ ەل دامۋىنا باعىتتالعان كۇش-جىگەرىن ءتيىمدى جۇزەگە اسىرۋعا مۇمكىندىك بەرەدى.

Abai.kz