مەملەكەت باسشىسى قاسىم-جومارت توقاەۆ سەربياعا العاشقى رەت رەسمي ساپارمەن باردى. الداعى ۋاقىتتا ەكى ەل اراسىندا ىنتىماقتاستىق جاڭا دەڭگەيگە كوتەرىلەدى. ەڭ الدىمەن مەملەكەت باسشىسى سەربيا پرەزيدەنتى الەكساندر ۆۋچيچپەن شاعىن قۇرامدا كەلىسسوز جۇرگىزدى.

قاسىم-جومارت توقاەۆ قوناقجايلىق تانىتقانى ءۇشىن الەكساندر ۆۋچيچكە ريزاشىلىعىن ءبىلدىرىپ، قازاقستان پرەزيدەنتى رەتىندەگى سەربياعا العاشقى ساپارىنىڭ ءمانى ەرەكشە ەكەنىن ايتتى. سونىمەن قاتار بۇل ساپار قازاق-سەرب قارىم-قاتىناسىنىڭ جاڭا كەزەڭىنە جول اشاتىنىن اتاپ ءوتتى.

مەملەكەت باسشىسى ەكى ەل اراسىنداعى ءوزارا ءتيىمدى ىنتىماقتاستىق حالىقتار دوستىعىنا، ساياسي ديالوگ پەن ءوزارا قولداۋعا ۇدايى ارقا سۇيەيتىنىن جەتكىزدى. قاسىم-جومارت توقاەۆتىڭ ايتۋىنشا، سوڭعى جىلدارى استانا مەن بەلگراد ەكونوميكالىق ىقپالداستىقتى نىعايتۋ ءۇشىن ناقتى شارالار قابىلداپ، ساۋدا جانە ينۆەستيتسيالىق بايلانىستاردى بەلسەندى دامىتىپ كەلە جاتىر.

ورايلى ءساتتى پايدالانا وتىرىپ، قاسىم-جومارت توقاەۆ كوكتەمگى سۋ تاسقىنى كەزىندە كومەك كورسەتكەنى ءۇشىن الەكساندر ۆۋچيچ پەن سەربيا حالقىنا العىس ايتتى. مەملەكەت باسشىسى مۇنى ەكى ەل اراسىنداعى شىنايى دوستىقتىڭ جارقىن كورىنىسى رەتىندە باعالادى.

الەكساندر ۆۋچيچ ەكى ەلدىڭ ىنتىماقتاستىعى ءوزارا قۇرمەت پەن سەنىم نەگىزىندە دامىپ كەلە جاتقانىن اتاپ ءوتتى. سەربيا پرەزيدەنتىنىڭ ايتۋىنشا، بەلگراد قازاقستانمەن ەكونوميكالىق بايلانىستاردى، سونىڭ ىشىندە ساۋدا، ينۆەستيتسيا سەكىلدى باستى باعىتتار بويىنشا بىرلەسكەن جوبالاردى جۇزەگە اسىرۋ ارقىلى ىقپالداستىقتى ودان ءارى تەرەڭدەتۋگە نيەتتى.

الەكساندر ۆۋچيچ سەربيانىڭ ەلىمىزبەن ساياسي ديالوگتى نىعايتۋعا بەيىل ەكەنىن راستاپ، حالىقارالىق ارەناداعى ءىس-قيمىلدى ۇيلەستىرۋدىڭ ماڭىزىنا توقتالدى.

كەزدەسۋدە مەملەكەتتەر باسشىلارى قازاقستان مەن سەربيا اراسىنداعى قارىم-قاتىناستى ودان ءارى نىعايتۋدىڭ پەرسپەكتيۆاسىن، ەكىجاقتى ىنتىماقتاستىقتىڭ جاڭا باعىتتارىن تالقىلادى. بۇدان بولەك تاراپتار ايماقتىق جانە حالىقارالىق كۇن تارتىبىندەگى وزەكتى ماسەلەلەر بويىنشا پىكىر الماستى.

مەملەكەت باسشىسى سەربيا پرەزيدەنتىمەن كەڭەيتىلگەن قۇرامدا كەلىسسوز جۇرگىزدى

بەلگرادقا رەسمي ساپارى اياسىندا قاسىم-جومارت توقاەۆ الەكساندر ۆۋچيچپەن كەڭەيتىلگەن قۇرامدا كەلىسسوز جۇرگىزدى. كەزدەسۋگە ەكى ەل دەلەگاتسيالارى قاتىستى.

مەملەكەت باسشىسى شاعىن قۇرامدا مازمۇندى كەلىسسوز جۇرگىزگەنى، سونداي-اق قازاقستان تاراپىنا قوناقجايلىق تانىتقانى ءۇشىن الەكساندر ۆۋچيچكە ريزاشىلىق ءبىلدىردى.

سەربيا پرەزيدەنتى الەكساندر ۆۋچيچ ارنايى كەلگەنى ءۇشىن قاسىم-جومارت توقاەۆقا العىس ايتىپ، ەكىجاقتى بايلانىستى ودان ءارى نىعايتۋ تۇرعىسىنان بۇل ساپاردىڭ ستراتەگيالىق ءمانى زور ەكەنىنە توقتالدى. سونىمەن قاتار ايماقتاعى جانە حالىقارالىق ارەناداعى بەيبىتشىلىك پەن تۇراقتىلىقتى نىعايتۋعا نەگىز بولاتىن ءوزارا ءتيىمدى بايلانىستى دامىتۋدىڭ ماڭىزىنا نازار اۋداردى.

كەزدەسۋ بارىسىندا مەملەكەتتەر باسشىلارى ساۋدا-ەكونوميكالىق جانە ينۆەستيتسيالىق ىقپالداستىقتى تەرەڭدەتۋ ماسەلەلەرىنە باسا ءمان بەردى.

پرەزيدەنتتەر ەكى ەل اراسىنداعى تاۋار اينالىمى ءوسىمىن جوعارى باعالادى. وسى ورايدا قازىرگى الەمدەگى گەوساياسي جانە ەكونوميكالىق جاعداي ىنتىماقتاستىقتى جانداندىرا ءتۇسۋدى قاجەت ەتەتىنىن اتاپ ءوتتى.

تاراپتار الداعى ۋاقىتتا ەكىجاقتى ساۋدا-ساتتىق كولەمىن ۇلعايتۋعا جانە جەتكىزىلەتىن تاۋار تۇرلەرىن كەڭەيتۋگە نيەتتى ەكەنىن راستادى

پرەزيدەنتتەردىڭ ايتۋىنشا، ونەركاسىپ، اۋىل شارۋاشىلىعى، كولىك-لوگيستيكا، قورعانىس ونەركاسىبى كەشەنى، تسيفرلاندىرۋ، تەلەكوممۋنيكاتسيا جانە اەروعارىش سالالارىنداعى بىرلەسكەن ءىرى جوبالاردى ىلگەرىلەتۋ ءۇشىن قاجەتتى رەسۋرس پەن مۇمكىندىك بار.

سونداي-اق كولىك ينفراقۇرىلىمىن ءارتاراپتاندىرۋ جانە ءوزارا بايلانىستى دامىتۋ، اتاپ ايتقاندا، استانا مەن بەلگراد اراسىندا تىكەلەي اۋە رەيستەرىن اشۋ ماڭىزدى ەكەنى ايتىلدى.

مەملەكەتتەر باسشىلارى ءبىلىم، عىلىم، دەنساۋلىق ساقتاۋ، تۋريزم، جاساندى ينتەللەكتىنى ەنگىزۋ باعىتتارىنداعى ءوزارا ءىس-قيمىلدى جولعا قويۋ ماسەلەسىن تالقىلادى.

قاسىم-جومارت توقاەۆ پەن الەكساندر ۆۋچيچ ساپار اياسىندا قول قويىلعان ەكىجاقتى قۇجاتتار قازاق-سەرب ىنتىماقتاستىعىن ودان ءارى تەرەڭدەتۋگە جان-جاقتى ىقپال ەتەتىنىنە سەنىم ءبىلدىردى.

قازاقستان پرەزيدەنتىنىڭ سەربياعا رەسمي ساپارى اياسىندا تومەندەگىدەي قۇجاتتارعا قول قويىلدى:

1. قازاقستان رەسپۋبليكاسىنىڭ ۇكىمەتى مەن سەربيا رەسپۋبليكاسىنىڭ ۇكىمەتى اراسىنداعى تۇلعالاردى رەادميسسيالاۋ تۋرالى كەلىسىم;

2. قازاقستان رەسپۋبليكاسىنىڭ ۇكىمەتى مەن سەربيا رەسپۋبليكاسىنىڭ ۇكىمەتى اراسىنداعى قورعانىس سالاسىنداعى ىنتىماقتاستىق تۋرالى كەلىسىم;

3. قازاقستان رەسپۋبليكاسىنىڭ عىلىم جانە جوعارى ءبىلىم مينيسترلىگى مەن سەربيا رەسپۋبليكاسىنىڭ ءبىلىم مينيسترلىگى اراسىنداعى ءبىلىم سالاسىنداعى ءوزارا تۇسىنىستىك تۋرالى مەموراندۋم;

4. قازاقستان رەسپۋبليكاسىنىڭ ەڭبەك جانە حالىقتى الەۋمەتتىك قورعاۋ مينيسترلىگى مەن سەربيا رەسپۋبليكاcىنىڭ ەڭبەك، جۇمىسپەن قامتۋ، ارداگەرلەر ءىسى جانە الەۋمەتتىك ماسەلەلەر جونىندەگى مينيسترلىگى اراسىنداعى ىنتىماقتاستىق تۋرالى مەموراندۋم;

5. قازاقستان رەسپۋبليكاسىنىڭ تۋريزم جانە سپورت مينيسترلىگى مەن سەربيا رەسپۋبليكاسىنىڭ تۋريزم جانە جاستار مينيسترلىگى اراسىنداعى تۋريزم سالاسىنداعى ىنتىماقتاستىق تۋرالى مەموراندۋم;

6. قازاقستان رەسپۋبليكاسىنىڭ قارجى مينيسترلىگى مەن سەربيا رەسپۋبليكاسىنىڭ ستاتيستيكا باسقارماسى اراسىنداعى ءوزارا ساۋدادا ستاتيستيكالىق دەرەكتەر الماسۋ سالاسىنداعى ىنتىماقتاستىق تۋرالى حاتتاما;

7. قازاقستان رەسپۋبليكاسىنىڭ تسيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگى مەن سەربيا رەسپۋبليكاسىنىڭ عىلىم، تەحنولوگيالىق دامۋ جانە يننوۆاتسيالار مينيسترلىگى اراسىنداعى عارىش قىزمەتى سالاسىنداعى ىنتىماقتاستىق بويىنشا ءوزارا تۇسىنىستىك تۋرالى مەموراندۋم;

8. قازاقستان رەسپۋبليكاسىنىڭ تسيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگى مەن سەربيا رەسپۋبليكاسىنىڭ اقپارات جانە تەلەكوممۋنيكاتسيالار مينيسترلىگى اراسىنداعى ىنتىماقتاستىق تۋرالى مەموراندۋم;

9. قازاقستان رەسپۋبليكاسىنىڭ ۇلتتىق اكادەميالىق كىتاپحاناسى مەن سەربيا رەسپۋبليكاسىنىڭ ۇلتتىق كىتاپحاناسى اراسىنداعى ءوزارا تۇسىنىستىك جانە ىنتىماقتاستىق تۋرالى مەموراندۋم;

10. قازاقستان رەسپۋبليكاسىنىڭ پرەزيدەنتى جانىنداعى قازاقستاننىڭ ستراتەگيالىق زەرتتەۋلەر ينستيتۋتى مەن سەربيا رەسپۋبليكاسىنىڭ حالىقارالىق ساياسات جانە ەكونوميكا ينستيتۋتى اراسىنداعى ءوزارا تۇسىنىستىك تۋرالى مەموراندۋم.

پرەزيدەنت اۋىل شارۋاشىلىعى باعىتىنداعى ىنتىماقتاستىققا توقتالدى

– سەربيا – اۋىل شارۋاشىلىعى سالاسىندا مول تاجىريبەسى بار ەل. وسىنى ەسكەرىپ، ءوزارا ءتيىمدى قارىم-قاتىناستى دامىتۋعا ۋاعدالاستىق. ۆەتەريناريا، گەنەتيكالىق رەسۋرستاردى كەڭەيتۋ، ورگانيكالىق اۋىل شارۋاشىلىعى، وسىمدىكتەر بيوتەحنولوگياسى سەكتورىندا تاجىريبە الماسۋعا كەلىستىك. ءبىز اۋىل شارۋاشىلىعى سالاسىنداعى وقۋ ورىندارى، عىلىمي-زەرتتەۋ مەكەمەلەرى اراسىندا سەرىكتەستىك ورناتۋدىڭ ماڭىزدى ەكەنىن اتاپ وتتىك، – دەدى مەملەكەت باسشىسى.

سونىمەن قاتار قازاقستان پرەزيدەنتى سەربيا تاراپىن دەنساۋلىق ساقتاۋ، اقپاراتتىق تەحنولوگيا، عارىش، تۋريزم باعىتتارىنداعى بايلانىستى كۇشەيتۋگە شاقىرعانىن جەتكىزدى.

مەملەكەت باسشىسى ەلىمىزدە بۇرىن-سوڭدى بولماعان الاپات تاسقىن كەزىندە قارجىلاي قولداۋ كورسەتكەنى ءۇشىن پرەزيدەنت الەكساندر ۆۋچيچ پەن سەرب حالقىنا العىس ايتتى.

قاسىم-جومارت توقاەۆتىڭ ايتۋىنشا، استانا مەن بەلگراد اراسىنداعى مادەني-گۋمانيتارلىق بايلانىستى نىعايتۋ ايرىقشا ماڭىزدى. مەملەكەت باسشىسى ەلىمىز ءبىلىم، عىلىم جانە مادەنيەت سالالارىنداعى جوبالاردى جۇزەگە اسىرۋعا دايىن ەكەنىن مالىمدەدى.

قازاقستان پرەزيدەنتى سەربيانى 2027 جىلى ەكسپو كورمەسىن وتكىزۋ قۇقىعىن جەڭىپ الۋىمەن قۇتتىقتادى.

– بۇل، ەڭ الدىمەن، سەربيانىڭ جانە ونىڭ باسشىسى – پرەزيدەنت الەكساندر ءۆۋچيچتىڭ حالىقارالىق بەدەلىنىڭ جوعارى ەكەنىن ايعاقتايدى. اۋقىمدى ءىس-شارا «ادامزات يگىلىگى ءۇشىن: بارشاعا ارنالعان سپورت پەن مۋزىكا» تاقىرىبىندا وتەدى. ماڭىزدى ءىس-شارا دوستىق قارىم-قاتىناسىمىزدى، مادەنيەت پەن سپورت سالاسىنداعى سەرىكتەستىگىمىزدى دامىتۋعا سەرپىن بەرەدى دەپ سەنەمىز. ورايلى مۇمكىندىكتى پايدالانىپ، سەربيالىق دوستارىمىزعا بەسىنشى دۇنيەجۇزىلىك كوشپەندىلەر ويىندارىنا بەلسەنە قاتىسقانى ءۇشىن العىس ايتامىز، – دەدى قاسىم-جومارت توقاەۆ.

كەلىسسوزدەر بارىسىندا جاھاندىق جانە ايماقتىق قاۋىپسىزدىك ماسەلەلەرى دە قوزعالدى

– قازاقستان مەن سەربيا حالىقارالىق جانە وڭىرلىك دەڭگەيدە تىعىز بايلانىس ورناتقان. كوپتەگەن وزەكتى ماسەلە بويىنشا ۇستانىمدارىمىز – ورتاق. قازىرگى گەوساياسي جاعداي كۇردەلى. سول سەبەپتى، ءبىز ىقپالداستىعىمىزدى ودان ءارى كۇشەيتۋگە مۇددەلى ەكەنىمىزدى راستادىق، – دەدى مەملەكەت باسشىسى.

قاسىم-جومارت توقاەۆ الەكساندر ءۆۋچيچتى كەلەسى جىلى قازاقستانعا رەسمي ساپارمەن كەلۋگە شاقىردى.

سەربيا پرەزيدەنتى اۋقىمدى ماسەلەلەر قوزعالعان بۇگىنگى كەلىسسوزدەردىڭ ناتيجەلى ءارى مازمۇندى سيپاتتا وتكەنىن جەتكىزىپ، كەزدەسۋلەرگە جوعارى باعا بەردى. سونداي-اق مەملەكەتتەر مەن پرەزيدەنتتەر اراسىندا ءوزارا سەنىمگە نەگىزدەلگەن قارىم-قاتىناس ورناعانىن ريزاشىلىقپەن اتاپ ءوتتى.

– قازاقستان مەن سەربيا اراسىنداعى دوستىق حالىقتارىمىزدىڭ ىنتىماقتاستىعىمەن عانا شەكتەلمەيدى. ءبىز حالىقارالىق ۇيىمداردا، سونىڭ ىشىندە بۇۇ اياسىندا ءبىر-بىرىمىزگە ءوزارا قولداۋ كورسەتەمىز. بۇگىن ءارتۇرلى سالادا بىرقاتار كەلىسىمگە قول جەتكىزىلدى. سونىڭ نەگىزىندە ەكى ەلدىڭ تۇپكىلىكتى مۇددەلەرىنە ساي كەلەتىن بىرلەسكەن جوبالار جۇزەگە اسىرىلاتىن بولادى. مەن دوسىم، قازاقستان پرەزيدەنتى قاسىم-جومارت توقاەۆقا سەربيامەن ىقپالداستىقتى نىعايتۋعا قوسقان ەلەۋلى ۇلەسى ءۇشىن شىنايى العىسىمدى ايتامىن، – دەدى الەكساندر ۆۋچيچ.

مەملەكەت باسشىسى سەربيا پرەمەر-مينيسترىمەن كەزدەستى

بەلگرادقا رەسمي ساپارى اياسىندا قاسىم-جومارت توقاەۆ سەربيا رەسپۋبليكاسىنىڭ پرەمەر-ءمينيسترى ميلوش ۆۋچەۆيچپەن كەزدەسۋ وتكىزدى.

اڭگىمەلەسۋ بارىسىندا مەملەكەت باسشىسى پرەزيدەنت الەكساندر ۆۋچيچپەن مازمۇندى كەلىسسوزدەر جۇرگىزگەنىن اتاپ ءوتتى.

– سەربيامەن بەرىك دوستىققا جانە ءوزارا تۇسىنىستىككە نەگىزدەلگەن ۇزاق جىلعى سەرىكتەستىگىمىز بەن كوپجاقتى بايلانىسىمىزدى جوعارى باعالايمىز. بۇگىن عارىش، تەلەكوممۋنيكاتسيا، اۋىل شارۋاشىلىعى، قورعانىس ونەركاسىبى، ءبىلىم، تۋريزم سالالارىندا ۇكىمەتارالىق جانە ۆەدومستۆوارالىق بىرقاتار ماڭىزدى كەلىسىمگە قول قويىلدى. ءتۇرلى دەڭگەيدەگى تۇراقتى ساياسي ديالوگ پەن ەكونوميكالىق ءوزارا ىقپالداستىق ءبىزدىڭ تۇپكى مۇددەمىزگە ساي كەلەدى، – دەدى قازاقستان پرەزيدەنتى.

مەملەكەت باسشىسى قازاقستان مەن سەربيا ۇكىمەتتەرىن قول جەتكىزگەن ۋاعدالاستىقتاردى ساپالى جۇزەگە اسىرۋ ءۇشىن بىرلەسە ارەكەت ەتۋگە شاقىردى. اتاپ ايتقاندا، ەكىجاقتى ەكونوميكالىق جانە ينۆەستيتسيالىق ىنتىماقتاستىققا تىڭ سەرپىن بەرەتىن ءىرى جوبالاردى ناقتىلاۋ قاجەت ەكەنىن ايتتى.

بۇل ورايدا قاسىم-جومارت توقاەۆ ساۋدا-ەكونوميكالىق ىنتىماقتاستىق بويىنشا ۇكىمەتارالىق كوميسسيا مەن ىسكەرلىك كەڭەس جۇمىسىنا زور ءۇمىت ارتاتىنىن جەتكىزدى.

مەملەكەت باسشىسى ەلىمىزدە ينۆەستيتسيالىق جوبالاردى جۇزەگە اسىراتىن سەربيا بيزنەسمەندەرىنە قازاقستان ۇكىمەتى تولىعىمەن قولداۋ كورسەتۋگە دايىن ەكەنىن مالىمدەدى.

مەملەكەت باسشىسى سەربيانىڭ قورعانىس ونەركاسىبى ونىمدەرىنىڭ كورمەسىنە باردى

قاسىم-جومارت توقاەۆ سەربيا پرەزيدەنتى الەكساندر ۆۋچيچپەن بىرگە بەلگراد ماڭىنداعى «باتاينيتسا» اەرودرومىنا قويىلعان اسكەري-ونەركاسىپ كەشەنى كاسىپورىندارىنىڭ كورمەسىن ارالادى.

سەربيا – اسكەري ماقساتتاعى تاۋارلاردىڭ ەكسپورتى بويىنشا ايماقتاعى كوشباسشى ەل. قازىر سەربيانىڭ قورعانىس ونەركاسىبى ونىمدەرى الەمنىڭ 70 مەملەكەتىنە، سونىڭ ىشىندە ءباا، ساۋد ارابياسى، اقش، بولگاريا، يندونەزيا سياقتى ەلدەرگە جەتكىزىلەدى.

كورمەدە قۇرلىق اسكەرىنىڭ جاۋىنگەرلىك تەحنيكالارىنىڭ، سەربيالىق قارۋ-جاراقپەن جابدىقتالعان تىكۇشاقتاردىڭ، اۋە قورعانىسى جۇيەلەرىنىڭ، اتىس قارۋلارىنىڭ، ارتيللەريالىق جانە باسقا دا وق-دارىلەردىڭ، مينالار مەن مينومەتتەردىڭ ۇلگىلەرى ۇسىنىلعان.

سەربيانىڭ وسى باعىتتاعى مول تاجىريبەسى قازاقستاننىڭ قورعانىس الەۋەتىن نىعايتۋعا ىقپال ەتە الادى.

Abai.kz