بۇگىن قازاقستان مۇسىلماندارى ءدىني باسقارماسىنىڭ توراعاسى ناۋرىزباي قاجى تاعانۇلى تالدىقورعان قالاسىندا «يسلام جانە وتباسى قۇندىلىعى» تاقىرىبىندا وتكەن رەسپۋبليكالىق كونفەرەنتسياعا قاتىستى.

قاسيەتتى قۇران اياتتارىن وقۋمەن باستالعان جيىندا باس ءمۇفتي ەل مەن جەردىڭ اماندىعىن تىلەپ، دۇعا جاسادى.

«قازىر ءبىزدىڭ قوعامدا وتباسىنداعى زورلىق-زومبىلىق ماسەلەسى وتە وزەكتى. دەگەنمەن ەرلى-زايىپتىلاردىڭ ءوزارا جاقسى مامىلەدە بولىپ، مەيىرىمدىلىكتىڭ اياسىندا قارىم-قاتىناس جاساۋلارى وتباسى باقىتىنىڭ نەگىزگى كىلتى سانالادى. اللا تاعالا قاسيەتتى قۇراننىڭ «رۋم» سۇرەسىندە: «سەندەرگە جاندارىڭ جاي تاپسىن دەپ، ءوز بولمىستارىڭنان جۇبايلار جاراتىپ، ارالارىڭا سۇيىسپەنشىلىك پەن مەيىرىم سەزىمىن ۇيالاتقانى ونىڭ (اللانىڭ) ناق بەلگىلەرىنەن. مىنە، وسىنىڭ ءوزىن اقىلعا سالىپ ويلاناتىن قاۋىم ءۇشىن ايقىن دالەلدەر بار», – دەپ ايتقان. سونداي-اق «تاۋبە» سۇرەسىنىڭ 71-اياتىندا: «ءمۇمىن ەرلەر مەن ءمۇمىن ايەلدەر – ءبىر-بىرىنە شىن جاناشىر دوس. ولار ەلگە ىزگىلىكتى، جاقسىلىق جاساۋدى بۇيىرىپ، جاماندىق اتاۋلىدان تىيادى...» دەلىنگەن. بۇدان تۇسىنەتىمىز، جاقسى ەر مەن ايەل – ءبىرىن-ءبىرى تولىقتىرىپ، ايىبى بولسا جاسىرىپ، جاقسىلىعىن اسىرىپ وتىراتىن يگى جاندار» دەدى قمدب توراعاسى.

كونفەرەنتسيادا جەتىسۋ وبلىسى اكىمىنىڭ ورىنباسارى دياس راحمەتۇلى، ءدىنتانۋشى پروفەسسور ءشامشادين تۇرسىنۇلى، جەتىسۋ وبلىستىق ارداگەرلەر ءۇيىنىڭ توراعاسى ەرمەك ءابىلماجىنۇلى جانە وزگە دە زيالى قاۋىم وكىلدەرى قاتىسىپ، وتباسى قۇندىلىعىن ارتتىرۋ جايلى ۇسىنىس-پىكىرلەرىن ءبولىستى. سونىمەن قاتار باس ءمۇفتي ناۋرىزباي قاجى تاعانۇلى باق وكىلدەرىنە بۇگىنگى كونفەرەنتسيا جونىندە سۇحبات بەردى.

Abai.kz