ليۆانداعى سوعىستىڭ كەلىسىم سۇلباسى ەندى-ەندى كورىنە باستاعان سەكىلدى ەدى. يزرايل مەن «حەزبوللا» بىتىمگە كەپ، «حاماس» تا ۇرىستى توقتاتۋ تۋرالى اراشا سۇراعانداي اڭگىمەلەر ايتىلا باستاعان…

سويتكەندە، تاياۋ شىعىستا «جاڭا سوعىس» باستالىپ كەتتى. انىعى بۇل قانى قاتا باستاعان ەسكى جارا، ەسكى سوعىس!

سيريانىڭ اساد رەجيمىنە قارسى انتيۇكىمەتتىك اسكەري قۇرىلىمدارى ۇرىسقا شىقتى. «حايات تاحرير اش-شام» دەيتىن توپ باستاپ، وزگە دە توپتار قوستاپ، سوعىس باستاپ جىبەردى. ماقساتى ايقىن. اساد رەجيمىن قۇلاتۋ. اسادتىڭ قوس جاقتاۋشىسى - يران مەن رەسەي وزگە سوعىستارمەن الەك بوپ جاتقان تۇستى ۇتىمدى پايداعا جاراتۋدى كوزدەدى، ولار…

ۇرىس سيريانىڭ ءىرى شاھارلارىنىڭ ءبىرى سانالاتىن الەپپودان باستالعان. قازىر انتيۇكىمەتتىك توپتار اسكەرى ەنتەلەپ باسىپ، ەكپىندەپ سوعىپ كەلەدى. قازىرگە دەيىن ونداعان ەلدىمەكەندى، ءبىرسىپىرا ماڭىزدى ۇرىس پوزيتسيالارىن، ستراتەگيالىق نۇكتەلەردى باعىندىرعان. ءتىپتى، الەپپو مەن داماشىقتى جالعايتىن جول دا اسادقا قارسى كۇشتەردىڭ باقىلاۋىنا وتكەن.

بۇل سيريادا تۇتانىپ جاتقان 2020 جىلدان بەرگى العاشقى اۋقىمدى ۇرىس.

جاسىرارى جوق، اساد اسكەرى ۇيقىدا. قوزعالىسى تىم سىلبىر. كەي پوزيتسيالاردان تىم-تىراقاي قاشىپ جاتقانى دا جاريا بولىپ ۇلگەردى. قىسقاسى - قارسىلاسۋعا مۇلدە قاۋقارسىز كۇيدە ەكەندىكتەرىن كورسەتۋدە. ال انتيۇكىمەتتىك كۇشتەر اسكەرى قارقىن ۇستىنە قارقىن قوسۋدا.

وسى ۇرىستار كەزىندە اساد ارمياسى جاعىندا جۇرگەن يراندىق يرسك گەنەرالى، اساد ارمياسىنىڭ اسكەري كەڭەسشىسى - كيۋمارس پۋرحاشەميدىڭ كوزى جويىلعان.

ال سيريا باسشىسى باشار اساد ەدەل-جەدەل ماسكەۋگە ۇشىپ كەتكەن. كومەك سۇراۋ ءۇشىن، كەڭەس تىڭداۋ ءۇشىن. ارينە بۇل ۇزىنقۇلاقتىڭ اڭگىمەسى.

انتيۇكىمەتتىك كۇشتەردىڭ اسكەر باستاپ، ۇرىسقا شىعۋىنا باستى سەبەپتەردىڭ ءبىرسىپىراسى مىناۋ:

1) ءيزرايلدىڭ «حەزبوللانى» تالقانداۋى ءھام سيريا جاقتاعى يران پروكسيلەرىنىڭ يزرايلدەن سوققى جەپ، الىسىرەۋى;

2) رەسەي ايماقتاعى ءوز اسكەرىنىڭ ەداۋىر بولىگىن سيريادان الىپ كەتىپ، ۋكراينا مايدانىنا سالۋى.

ماڭىزدى: وسى شايقاستار كەزىندە اساد رەجيمىن قورعاۋشى «ۆاگنەر» جاك-ءتىڭ ونشاقتى جالدامالى جەندەتىنىڭ كوزى جويىلعان. اسادقا قارسى اسكەر رەسەي قارۋلارى مەن تەحنيكالارىن ولجالاعان.

انتيۇكىمەتتىك جاساقتار وزدەرىنە باعىندىرىلعان اۋماقتاردى اساد پورترەتتەرى مەن رەسەي سيمۆوليكالارىنان تازارتا باستاعان. انتيۇكىمەتتىك كۇشتەر: «اساد رەجيمىن قولداۋشى رەسەي مەن يران ءبىزدىڭ دۇشپانىمىز»، - دەيدى.

ايتا كەتەيىك، تۇركيا اساد رەجيمىنە قارسى كۇرەسۋشى قۇرىلىمداردىڭ كەيبىرىن اشىق، كەيبىرىن جاسىرىن قولدايدى. ولار تۇركيانىڭ پروكسيلەرى سانالادى. وسى شايقاسقا تەحنيكالىق كومەكتى دە تۇركيا ۇسىنعان. جالپى ەردوعان سيريا مەن ليۆياداعى پروكسيلەرى ارقىلى ءپۋتيننىڭ جۇيكەسىن تيەر ارەكەتتەر جاساپ تۇراتىنى تاعى فاكت.

قازىر الەپپونىڭ باتىسى تۇركياشىل كۇشتەردىڭ باقىلاۋىندا. 48 ساعاتتىڭ ىشىندە باشار اساد 50-دەن استام ەلدىمەكەندى جانە 15 اسكەري بلوك-بەكەتتەرىن جوعالتقان.

نەگىزىنەن سيريا مەن تۇركيا شەكاراسىندا تۇراتىن تۇركىمەندەردەن تۇراتىن كوتەرىلىسشىلەردىڭ شابۋىلشى بريگادالارى تەل-ريفات پەن الەپپو باعىتىندا كۇردەلى وپەراتسيا جۇرگىزۋ ءۇشىن جونەلتىلدى. سيريا وپپوزيتسياسىنىڭ شابۋىلىنىڭ اۋقىمى وسۋدە. الدىڭعى قاتارلى جاساقتار الەپپونىڭ باتىسىن باقىلاۋدا.

قازىر تۇركيا قولداپ وتىرعان سيريا ۇلتتىق ارمياسى (سۇا) تال-ريفااتتىڭ سولتۇستىگىندە اۋىر برونەتەحنيكا مەن جاۋىنگەرلەردى جيناپ، قالانى اقش قولداپ وتىرعان كجپ لاڭكەستىك ۇيىمىنان تازارتۋعا دايىندالۋدا.

ءتۇرلى دەرەككوزدەردىڭ حابارلاۋىنشا، بارلىق سۇا توپتارى الەپپو قالاسىنا شابۋىل جاساۋ وپەراتسياسىن قولداعان. وسىلايشا، سۇا تۇركيانىڭ ارتيللەريالىق قولداۋىمەن اساد رەجيمىنىڭ كۇشتەرىنە قارسى ەكىنشى مايدان اشتى.

ال رەسەيلىك ارنايى جاساق مەناگ اۆيابازاسىنان، تەل-ريفات پەن الەپپو قالاسىنان ەۆاكۋاتسيالاندى.

سيريا پرەزيدەنتى باشار اسادتى رەسەيدەن باسقا، يران مەن وعان وداقتاس سودىرلار، سونىڭ ىشىندە ليۆاندىق «حەزبوللا» قولدايدى.

نۇرگەلدى ابدىعانيۇلى

Abai.kz