18 جەلتوقسان، بەيسەنبى كۇنى تاشكەنتتە قازاقستان رەسپۋبليكاسىنىڭ مادەنيەت جانە اقپارات مينيسترلىگى مەن وزبەكستان رەسپۋبليكاسى پرەزيدەنتى اكىمشىلىگىنىڭ جانىنداعى اقپارات جانە بۇقارالىق كوممۋنيكاتسيالار اگەنتتىگىنىڭ وكىلدەرى كەزدەسۋ وتكىزدى.

كەزدەسۋ قورىتىندىسى بويىنشا تاراپتار 2025 جىلعا ارنالعان اقپاراتتىق سالاداعى ءوزارا ءىس-قيمىل جوسپارىنا قول قويدى.

قۇجاتقا وزبەكستان پرەزيدەنتىنىڭ 8 تامىزدا قازاقستانعا جاساعان ساپارىنىڭ قورىتىندىسى بويىنشا بەرىلگەن تاپسىرمالار اياسىندا قول قويىلدى. سول ساپاردا قاسىم-جومارت توقاەۆ پەن شاۆكات ميرزيوەۆ بۇقارالىق كوممۋنيكاتسيالار سالاسىنداعى ەكىجاقتى ىنتىماقتاستىق تۋرالى بىرلەسكەن مالىمدەمە مەن شەشىم قابىلداعان بولاتىن.

جوسپاردا مەدياكونتەنت الماسۋدى ۇيىمداستىرۋ، باق ءۇشىن ترەنينگتەر مەن سەمينارلار وتكىزۋ، ءباسپاسوز حاتشىلارىنىڭ بىلىكتىلىگىن ارتتىرۋ، جاس جۋرناليستەردى قولداۋ جانە دەزينفورماتسياعا قارسى بىرلەسكەن كۇرەس قاراستىرىلعان.

قازاقستاننىڭ مادەنيەت جانە اقپارات مينيسترلىگى بىرلەسكەن مەدياجوبالاردى ينتەگراتسيالاۋدىڭ ماڭىزدىلىعىن جانە دەزينفورماتسيا مەن جالعان جاڭالىقتارعا قارسى كۇرەس مەحانيزمدەرىن ازىرلەۋ قاجەتتىلىگىن اتاپ ءوتتى.

تاراپتار قازاقستان مەن وزبەكستان اراسىنداعى تاجىريبە الماسۋ ماقساتىندا باق وكىلدەرى ءۇشىن ءباسپاسوز تۋرلارىن ۇيىمداستىرۋعا كەلىستى.

سونىمەن قاتار، كەزدەسۋ بارىسىندا وزبەكستان پرەزيدەنتى تەلەراديو كەشەنىنىڭ باسقارۋشى ديرەكتورى روبەرت مۋراديان ورتالىق ازيا ەلدەرىمەن ىنتىماقتاستىق پەن كونتەنت الماسۋدى نىعايتۋعا باعىتتالعان قازاقستاندىق Silk Way تەلەارناسىنىڭ جوسپارلارى مەن پەرسپەكتيۆالارى تۋرالى ايتتى.

تالقىلاۋ قورىتىندىسى بويىنشا تاراپتار كونتەنت الماسۋعا دايىن ەكەندەرىن ءبىلدىردى.

ايتا كەتەيىك، 17-19 جەلتوقسان ارالىعىندا قازاقستان دەلەگاتسياسى تۇركى مەملەكەتتەرىنىڭ ۇيىمىنا مۇشە ەلدەردىڭ اقپارات جانە باق-قا جاۋاپتى مينيسترلەر مەن جوعارى لاۋازىمدى تۇلعالارىنىڭ VI كەڭەسىنە قاتىسىپ جاتىر.

قر مادەنيەت جانە اقپارات مينيسترلىگىنىڭ ءباسپاسوز قىزمەتى

Abai.kz