ءماجىلىس دەپۋتاتتارى، «AMANAT» پارتياسى فراكتسياسىنىڭ مۇشەلەرى پاۆەل كازانتسەۆ، سامات نۇرتازا جانە نارتاي سارسەنعاليەۆ استانا قالاسى ۇركەر تۇرعىن الابىنداعى جاڭا جايلى مەكتەپتىڭ الداعى جۇمىسقا دايىندىعىمەن تانىستى.

ۇركەر تۇرعىن الابىندا مەكتەپتەردەگى ورىن تاپشىلىعى ماسەلەسى جەرگىلىكتى تۇرعىنداردى جىلدار بويى تولعاندىرىپ كەلدى. وسىلايشا، «AMANAT» پارتياسىنىڭ سايلاۋالدى باعدارلاماسى اياسىندا جاڭا ۇلگىدەگى مەكتەپ سالىنىپ، ازاماتتاردى الاڭداتقان ماسەلە ءوز شەشىمىن تاپتى. 9 قاڭتاردا اتالعان ءبىلىم ورداسىنىڭ ەسىگى 2 مىڭ وقۋشىعا ايقارا اشىلماق.

نىساندى ارالاۋ بارىسىندا پاۆەل كازانتسەۆ پرەزيدەنت باستاماسىمەن قولعا الىنعان «جايلى مەكتەپ» ۇلتتىق جوباسىنىڭ ماڭىزدى باسىمدىعىنىڭ ءبىرى وتاندىق تاۋارلار مەن قىزمەت كورسەتۋشىلەردى قولداۋ ەكەنىنە نازار اۋداردى. اتاپ ايتقاندا، نىساندى سالۋشىلارعا قويىلاتىن باستى تالاپ – جەرگىلىكتى قامتۋ ۇلەسى كەمىندە 70 پايىز بولۋى.

– رەتتەلەتىن جيھاز، جابدىق، قۇرىلىس ماتەريالدارى – تولىق دەرلىك وتاندىق ءونىم. ياعني، 90 پايىزى – قازاقستاندا جاسالعان. مۇنداي ءتاسىل ستراتەگيالىق تۇرعىدا ماڭىزدى دەر ەدىم. سەبەبى قازاقستاندا وندىرىلگەن ءونىمدى پايدالانۋ ۇلتتىق ەكونوميكانىڭ وسىمىنە ىقپال ەتەدى. بۇل – ءبىزدىڭ جۇمىس ورىندارىمىز، ەكونوميكا، قارجى اينالىمى، ونىڭ ءبارى وسىندا، – دەدى پاۆەل كازانتسەۆ.

ءوز كەزەگىندە سامات نۇرتازا ەلىمىزدەگى دەموگرافيالىق ءوسىم قارقىنى ءبىلىم بەرۋ جۇيەسى ءۇشىن ەلەۋلى سالماق سالاتىنىنا ءمان بەردى. تيىسىنشە، مەكتەپتەردەگى ورىن تاپشىلىعى ەڭ وزەكتى ماسەلەنىڭ ءبىرى بولىپ وتىر.

– بۇل №33 مەكتەپ ايگىلى ءانشى امىرە قاشاۋباەۆتىڭ ەسىمىمەن اتالادى. عيماراتتا وقۋشىلار قاۋىپسىزدىگىنە ەرەكشە نازار اۋدارىلعانىن اتاپ وتكەن ءجون. مەملەكەت باسشىسىنىڭ باستاماسىمەن قولعا الىنعان ۇلتتىق جوبا اياسىندا مۇنداي مەكتەپتەر ەلىمىزدىڭ شالعاي ەلدى مەكەندەرىندە دە سالىنادى، – دەدى دەپۋتات.

بۇگىنگە دەيىن استانادا باس-اياعى 11 جايلى مەكتەپ اشىلدى. جالپى، ەلوردادا ۇلتتىق جوبا اياسىندا 90 مىڭ وقۋشىعا ارنالعان جاڭا ۇلگىدەگى 24 مەكتەپ سالىنادى.

Abai.kz