2024 جىلى الەۋمەتتىك قامسىزداندىرۋعا 5,4 ترلن تەڭگە ءبولىندى، ونىڭ ىشىندە زەينەتاقى تولەۋگە 3,8 ترلن تەڭگە قاراستىرىلدى. بارلىق الەۋمەتتىك تولەمدەرگە (زەينەتاقىلار مەن جاردەماقىلار) ارنالعان شىعىستار رەسپۋبليكا بيۋدجەتىنىڭ بارلىق شىعىستارىنىڭ 21,8 %-ىن قۇرادى. بۇل تۋرالى قر ەڭبەك جانە حالىقتى الەۋمەتتىك قورعاۋ مينيسترلىگى مالىمدەدى.

مەملەكەت 2024 جىلى مۇگەدەكتىگى جانە اسىراۋشىسىنان ايىرىلۋى بويىنشا 614 ملرد تەڭگەگە جاردەماقى تولەدى. سونىمەن قاتار، كوپبالالى وتباسىلاردى قولداۋعا 472,9 ملرد تەڭگە ءبولدى.

2025 جىلى حالىق الدىنداعى الەۋمەتتىك مىندەتتەمەلەردى ورىنداۋ ءۇشىن 6 ترلن تەڭگەقاراستىرىلعىن، الۋشىلار سانى شامامەن – 5 ملن ادام.

قازاقستاندا زەينەتاقى مەن جاردەماقى مولشەرى ءوستى

2025 جىلعى 1 قاڭتاردان باستاپ مەملەكەتتىك جاردەماقىلار مەن بازالىق زەينەتاقى تولەمدەرىنىڭ بارلىق ءتۇرىنىڭ مولشەرى قر ۇلتتىق بانكى ايقىندايتىن ينفلياتسيانىڭ بولجامدى دەڭگەيىنە سايكەس 6,5%-عا، ىنتىماقتى زەينەتاقى 8,5%-عا، ياعني ينفلياتسيا دەڭگەيىنەن 2% - عا وزا وتىرىپ ۇلعايتىلدى.

بۇدان باسقا مەملەكەت باسشىسىنىڭ تاپسىرماسى بويىنشا 2023 جىلدان باستاپ بەس جىل ىشىندە ەڭ تومەن بازالىق زەينەتاقىنى ەڭ تومەن كۇنكورىس دەڭگەيىنىڭ 70 %-نا دەيىن، ەڭ جوعارى – 120 %-عا دەيىن جىل سايىن كەزەڭ-كەزەڭىمەن ارتتىرۋ جۇزەگە اسىرىلادى.

2025 جىلعى 1 قاڭتاردان باستاپ مەملەكەتتىك جاردەماقىلاردىڭ ۇلعايۋىنىڭ بىرنەشە ۇلگىسى:

- 1, 2, 3 بالا تۋعاندا بەرىلەتىن جاردەماقى 140 مىڭ تەڭگەدەن 149 مىڭ تەڭگەگە دەيىن، 4 جانە ودان دا كوپ بالا تۋعاندا بەرىلەتىن جاردەماقى – 233 مىڭتەڭگەدەن 248 مىڭ تەڭگەگە دەيىن ۇلعايدى;

- مولشەرى بالالار سانىنا بايلانىستى بەرىلەتىن كوپبالالى وتباسىلارعا ارنالعان جاردەماقى 4 بالاسى بار وتباسىلار ءۇشىن 59 مىڭ تەڭگەدەن 63 مىڭ تەڭگەگە دەيىن، 10 بالاسى بار وتباسىلار ءۇشىن – 148 مىڭ تەڭگەدەن 157 مىڭ تەڭگەگە دەيىن ارتتى;

- I توپ مۇگەدەكتىگى بار ادامدارعا ارنالعان جاردەماقى 95 مىڭ تەڭگەدەن 102 مىڭ تەڭگەگە دەيىن، II توپ – 76 مىڭ تەڭگەدەن 81 مىڭ تەڭگەگە دەيىن، III توپ – 52 مىڭ تەڭگەدەن 55 مىڭ تەڭگەگە دەيىن ءوستى.

Abai.kz