اقتوبە وبلىسىنا جۇمىس ساپارى بارىسىندا ءماجىلىس دەپۋتاتتارى جۇلدىز سۇلەيمەنوۆا مەن قازىبەك الىشەۆ «اماNات» پارتياسىنىڭ سايلاۋالدى باعدارلاماسى اياسىندا سالىنعان بالالار فۋتبول اكادەمياسىنا بارىپ، جاتتىقتىرۋشىلار قۇرامىمەن، جاس سپورتشىلارمەن كەزدەستى.

زاماناۋي ستاندارتتارعا ساي سالىنعان اكادەميادا فۋتبولشىلار جىل بويى جاتتىعاتىن ۇلكەن جابىق مانەج بار. سونداي-اق عيماراتتا جاتتىعۋ زالى، وڭالتۋ جانە ەمدەۋ-ساۋىقتىرۋ كابينەتتەرى قاراستىرىلعان. قازىرگى تاڭدا اكادەميادا 6 مەن 18 جاس ارالىعىنداعى مىڭعا جۋىق بالا فۋتبولدىڭ قىر-سىرىن ۇيرەنىپ ءجۇر. كۇنىنە ەكى رەت جاتتىعادى.

جۇلدىز سۇلەيمەنوۆا جاتتىقتىرۋشىلارمەن اڭگىمە بارىسىندا مەملەكەت باسشىسى قاسىم-جومارت توقاەۆ قازاقستان حالقىنا جولداۋىندا دەپۋتاتتارعا سپورت سالاسىنداعى زاڭنامانى جاڭارتۋدى تاپسىرعانىن ەسكە سالدى. پرەزيدەنت ءوز سوزىندە بۇل تۇزەتۋلەردىڭ جاڭا چەمپيوندار بۋىنىن دايىنداۋعا نەگىز بولاتىنىن ەرەكشە اتاپ وتكەن ەدى. بىلتىر قاراشا ايىندا ءماجىلىس دەپۋتاتتارى دەنە شىنىقتىرۋ جانە سپورت ماسەلەلەرى تۋرالى زاڭ جوباسىن العاشقى وقىلىمدا ماقۇلداعان بولاتىن.

– بۇل زاڭ جوباسى سپورتتىڭ باسىم باعىتتارىن انىقتاۋدان باستاپ، سپورتشىلاردى دايىنداۋ ستاندارتتارىن جەتىلدىرۋگە دەيىنگى بىرقاتار وزەكتى باستامانى قامتيدى. ول بۇقارالىق جانە بالالار سپورتىن دامىتۋعا سەرپىن بەرەدى. بالالارىمىز – ەلىمىزدىڭ بولاشاعى. ال بۇل فۋتبول اكادەمياسى – جاسوسپىرىمدەردى تاربيەلەپ، ولاردىڭ ءتارتىپ پەن جاۋاپكەرشىلىگىن نىعايتاتىن ەرەكشە ورتا، – دەدى ج.سۇلەيمەنوۆا.

قازىبەك الىشەۆ بالالاردى سپورتقا بەلسەندى تارتۋدىڭ ماڭىزدىلىعىنا توقتالدى. ونىڭ ايتۋىنشا، بۇل ولاردىڭ دەنساۋلىعى مەن ەرىك-جىگەرىن نىعايتىپ قانا قويماي، ولاردى جامان ادەتتەن ساقتاۋعا كومەكتەسەدى.

– ءبىزدىڭ قوعام ناشاقورلىق، لۋدومانيا، الەۋمەتتىك جەلى مەن ينتەرنەتكە تاۋەلدىلىك سياقتى زۇلىمدىق تۇرلەرىمەن كۇرەسەتىنى جاسىرىن ەمەس. ءماجىلىس دەپۋتاتتارى مەملەكەت، اتا-انالار، بيزنەس سەنىم ارتا الاتىن زاڭنامالىق بازا قۇرادى. سپورتپەن اينالىسۋ ارقىلى بالا زياندى ادەتتەردەن اۋلاق بولادى ءارى پىكىرلەس ادامدار ۇجىمىندا قولداۋ مەن موتيۆاتسيا تابادى. بۇل – ەنەرگيانى دۇرىس باعىتقا باعىتتاۋدىڭ ەڭ ءتيىمدى جولى، – دەدى دەپۋتات.

بۇقارالىق سپورتتى دامىتۋ «اماNات» پارتياسىنىڭ باستى نازارىندا. وتكەن جىلى اقتوبە وبلىسىندا پارتيانىڭ سايلاۋالدى ۋادەلەرى اياسىندا العا اۋدانى بەستاماق اۋىلىندا جانە ايتەكە بي اۋدانى قۇمقۇدىق اۋىلىندا سپورت كەشەندەرى پايدالانۋعا بەرىلدى. ىرعىز اۋدانى ىرعىز اۋىلىندا دەنە شىنىقتىرۋ-ساۋىقتىرۋ كەشەنىنىڭ قۇرىلىسى اياقتالدى.

سونىمەن قاتار ءماجىلىس دەپۋتاتى، «اماNات» پارتياسى فراكتسياسىنىڭ مۇشەسى گۇلدارا نۇرىموۆا جامبىل وبلىسىنىڭ بايزاق اۋدانى قىزىل جۇلدىز اۋىلىنداعى جاڭا دارىگەرلىك امبۋلاتوريانىڭ جۇمىسىمەن تانىستى.

60 ەمدەلۋشىگە ارنالعان مەديتسينالىق مەكەمە «AMANAT» پارتياسىنىڭ سايلاۋالدى باعدارلاماسى اياسىندا سالىنعان. مۇندا 3 دارىگەر، 13 ورتا مەديتسينا قىزمەتكەرى جانە ءبىر پسيحولوگ جۇمىس ىستەيدى. اتالعان امبۋلاتوريا اۋىلداعى 5 مىڭعا جۋىق تۇرعىنعا قىزمەت كورسەتەدى.

گۇلدارا نۇرىموۆا اۋىلداعى دارىگەر تاپشىلىعى ماسەلەسىن شەشۋ ءۇشىن اۋىلدى جەرلەرگە كوشىپ كەلگەن ماماندارعا 100 اەك كولەمىندە كوتەرمە جاردەماقى تولەنەتىنىن اتاپ ءوتتى. دەنساۋلىق ساقتاۋ ماسەلەلەرى جونىندەگى زاڭعا ەنگىزىلگەن بۇل نورما «AMANAT» پارتياسىنىڭ سايلاۋالدى باعدارلاماسىندا قامتىلعان.

 – مەملەكەت دەنساۋلىق ساقتاۋ سالاسىنا ۇنەمى ەرەكشە كوڭىل بولەدى. بيىل دارىگەرلەردى قورعاۋعا، ولاردىڭ مارتەبەسىن كوتەرۋگە باعىتتالعان ساپالى جاڭا زاڭ كۇشىنە ەندى. بىرقاتار الەۋمەتتىك كەپىلدىكتەر ەنگىزىلىپ، قۇقىقتىق قورعاۋ كۇشەيتىلدى. اتاپ ايتقاندا، مەكتەپكە دەيىنگى ۇيىمداردا مەديتسينا قىزمەتكەرلەرىنىڭ بالالارىنا ءبىرىنشى كەزەكتە ورىن بەرىلەدى، باسى ارتىق ەسەپ بەرۋ ماسەلەسى قىسقارتىلادى، دارىگەرلەردىڭ كاسىبي جاۋاپكەرشىلىگى ساقتاندىرىلادى جانە باسقا دا وزگەرىستەر بار. مەديتسينالىق جوعارى وقۋ ورىندارىنىڭ جاس تۇلەكتەرى ولاردىڭ كومەگى ادامدارعا شىنىمەن دە قاجەت ەكەنىن جانە مەملەكەت تاراپىنان جاسالاتىن قولداۋ شارالارى ءدال وسىعان باعىتتالعانىن انىق تۇسىنۋگە ءتيىس، – دەدى دەپۋتات.

ايتا كەتەيىك، بىلتىر جامبىل وبلىسىندا پارتيانىڭ سايلاۋالدى باعدارلاماسىن جۇزەگە اسىرۋ اياسىندا 20 مەديتسينالىق نىسان پايدالانۋعا بەرىلىپ، ەكى ەمحاناعا كۇردەلى جوندەۋ جۇمىسى جۇرگىزىلدى. 18 بىرلىك مەديتسينالىق دياگنوستيكالىق تەحنيكا (توموگرافتار، ۋدز اپپاراتتارى جانە ت.ب.), 38 سانيتارلىق كولىك ساتىپ الىندى. بۇل قادامدار ەرتە دياگنوستيكانى جاقسارتۋعا، جەدەل جاردەم جۇمىسىنىڭ ساپاسىن جانە اۋىلدى جەرلەردە مەديتسينالىق قىزمەتتىڭ قولجەتىمدىلىگىن ارتتىرۋعا مۇمكىندىك بەردى.

بيىل وڭىردە پارتيانىڭ سايلاۋالدى باعدارلاماسى اياسىندا بايزاق، قورداي جانە سارىسۋ اۋداندارىنداعى اۋداندىق اۋرۋحانالاردى قوسا العاندا، 7 مەديتسينالىق نىساننىڭ قۇرىلىس جۇمىسى باستالادى. سونداي-اق تارازدا تۋبەركۋلەزبەن جانە وكپەنىڭ وزگە دە اۋرۋلارىمەن اۋىراتىن بالالارعا ارنالعان پەريناتالدىق ورتالىق، جەدەل مەديتسينالىق جاردەم ستانتسياسىن جانە مامانداندىرىلعان ساناتوري اشۋ جوسپارلانىپ وتىر.

ەسكە سالا كەتەيىك، 5 قاڭتاردا ءماجىلىس دەپۋتاتتارىنىڭ وڭىرلەرگە جۇمىس ساپارى باستالدى. دەپۋتاتتار وندىرىستىك جانە الەۋمەتتىك نىسانداردى ارالاپ، ەڭبەك ۇجىمدارىندا كەزدەسۋلەر وتكىزىپ، ازاماتتاردى جەكە ماسەلەلەرى بويىنشا قابىلدايدى. سونىمەن قاتار ولار سايلاۋشىلارعا قابىلدانعان زاڭنامالىق وزگەرىستەر تۋرالى اقپارات بەرىپ، ماسەلەلەرىن تىڭدايدى. وڭىرلەردە سايلاۋشىلار كوتەرگەن ەڭ وزەكتى ماسەلەلەردى شەشۋ ءماجىلىستىڭ جالپى وتىرىستارىنىڭ بىرىندە ۇكىمەتپەن بىرلەسىپ قارالاتىن بولادى.

Abai.kz