2023 جىلدىڭ ءساۋىر ايىندا وبلىس پروكۋراتۋراسىنىڭ ۇيلەستىرۋىمەن وبلىستىق پد-ءنىڭ قىزمەتكەرلەرى جەدەل ءىس-شارالار كەشەنى ناتيجەسىندە جامبىل وبلىسىندا تۇراقتى قىلمىستىق توپتى اشكەرەلەدى.

بۇرىن سوتتى بولعان 7 ادامنان تۇراتىن بۇل قىلمىستىق توپ 2 جىل بويى قايىرىمدىلىق قوردىڭ اتىن جامىلىپ، كاسىپكەرلەردى قورقىتۋ جانە ولارعا كۇش قولدانۋ ارقىلى بوپسالاۋ، قارىزدى ماجبۇرلەپ ءوندىرىپ الۋ جانە قورعانشىلىق كورسەتۋمەن اينالىسقان.

ۇيىمداسقان قىلمىستىق توپتى ۇيىمداستىرۋشىنىڭ جوسپارىن جۇزەگە اسىرۋ ماقساتىندا بىرقاتار قىلمىستاردىڭ ءمان-جايى انىقتالدى، وعان قاتىسۋشىلار (مۇشەلەر) اراسىنداعى تىعىز قارىم-قاتىناس جانە ولاردىڭ ءىس-ارەكەتىن ۇيلەستىرۋ بەلگىلەندى.

مىسالى، ۇيىمداسقان قىلمىستىق توپتىڭ مۇشەلەرى كوشباسشىنىڭ نۇسقاۋى بويىنشا، وزىنە جانە توپتىڭ قاتىسۋشىلارىنا ماتەريالدىق پايدا تابۋ ماقساتىندا، قارىز ماسەلەسىن شەشۋ ءۇشىن مەركى اۋدانىندا كۇش قولدانۋ ارقىلى ەكى جابىرلەنۋشىدەن 1 ملن تەڭگە سوماسىنداعى اقشا قاراجاتتارىن جانە جەكە باسىنا تۇتىنۋ ءۇشىن 10 كەلى ەسىرتكى زاتتارىن تالاپ ەتكەن.

جابىرلەنۋشىلەردىڭ ءبىرى ءومىرى مەن دەنساۋلىعى ءۇشىن قورقىپ، «Kaspi» قوسىمشاسى ارقىلى 500 000 تەڭگە كولەمىندە قاراجات اۋدارعان. بۇل قاراجات ۇيىمداسقان قىلمىستىق توپتىڭ قاتىسۋشىلارى اراسىندا بولىنگەن.

وسى تەكتەس قىلمىستىق سحەما 4 كاسىپكەرگە دە قاتىستى ورىن العان.

21.01.2025 جىلى سوت تالقىلاۋىنىڭ قورىتىندىسى بويىنشا جامبىل وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتى ۇيىمداسقان قىلمىستىق توپتىڭ باسشىسى مەن مۇشەلەرىنە قاتىستى ايىپتاۋ ۇكىمىن شىعاردى.

سوت ۇكىمىمەن ۇيىمداسقان قىلمىستىق توپتىڭجەتەكشىسى 11 جىلعا, باسقا قاتىسۋشىلار 8 جىلدان 10 جىلعا دەيىن باس بوستاندىعىنان ايىرىلدى.

سوتتالعانداردىڭ كىناسى جاسىرىن تەرگەۋ ارەكەتتەرىنىڭ ناتيجەلەرى مەن قىلمىستىق ءىستىڭ باسقا دا ماتەريالدارىمەن تولىق دالەلدەندى. سوت ۇكىمى زاڭدى كۇشىنە ەنگەن جوق.

Abai.kz