ءىىم-ءنىڭ زاڭعا قايشى كونتەنت تاراتقان ستريمەرلەردىڭ جاۋاپكەرشىلىككە تارتىلعانى تۋرالى مالىمدەمەسى الەۋمەتتىك جەلىلەردە قىزۋ تالقىلاندى. جاڭالىقتاردىڭ استىنداعى پىكىرلەر مەن ءىرى پابليكتەردەگى تالقىلاۋلارعا قاراعاندا، قولدانۋشىلاردىڭ باسىم بولىگى قابىلدانعان شارالاردى قولداپ، مۇنداي جۇمىستىڭ تۇراقتى تۇردە جۇرگىزىلۋى قاجەت ەكەنىن ايتۋدا.

كوپشىلىك نازاردى ستريمەرلەردىڭ وزىنەن گورى، مۇنداي كونتەنتتىڭ بالالار مەن جاسوسپىرىمدەرگە تيگىزەتىن اسەرىنە اۋدارۋدا. پايدالانۋشىلاردىڭ پىكىرىنشە، بالاعات سوزدەر، قاۋىپتى پرانكتەر، قورلاۋ مەن ادەپسىز ارەكەتتەر جاسوسپىرىمدەردىڭ كۇندەلىكتى كورەتىن كونتەنتىنە اينالىپ بارادى.

تالقىلاۋلاردا ناقتى ۇسىنىستار دا ايتىلۋدا. كەيبىر جەلى قولدانۋشىلارى زاڭ بۇزۋشىلىق بەلگىلەرى بار ەفيرلەر مەن اككاۋنتتاردى وزدەرى انىقتاپ، ولاردىڭ سىلتەمەلەرىن قۇقىق قورعاۋ ورگاندارىنا جولداۋعا دايىن ەكەندەرىن جازۋدا. ولاردىڭ پىكىرىنشە، قوعامنىڭ بەلسەندىلىگى مۇنداي زاڭسىز كونتەنتتى دەر كەزىندە انىقتاۋعا جانە جولىن كەسۋگە كومەكتەسەدى.

پىكىرتالاستىڭ تاعى ءبىر وزەكتى تاقىرىبى – بالالاردىڭ الەۋمەتتىك جەلىلەردى پايدالانۋىنا قاتىستى شەكتەۋلەر. ءبىرى TikTok-قا بەلگىلى ءبىر جاسقا دەيىن كىرۋگە تىيىم سالۋدى ۇسىنسا، ەندى ءبىرى مۇنداي تالاپ بارلىق الەۋمەتتىك جەلىلەرگە بىردەي قولدانىلۋى كەرەك دەپ ەسەپتەيدى. كوپشىلىك كامەلەتكە تولماعانداردىڭ ينتەرنەت كەڭىستىگىن پايدالانۋىنا باقىلاۋدى كۇشەيتۋ قاجەت دەگەن پىكىردە.

سونىمەن قاتار، كوپتەگەن پىكىرلەردە زاڭ تالاپتارى كوشەدە دە، الەۋمەتتىك جەلىدەگى تىكەلەي ەفيردە دە بىردەي ساقتالۋى ءتيىس ەكەنى ايتىلعان. پايدالانۋشىلاردىڭ پىكىرىنشە، قارالىم مەن دونات ءۇشىن زاڭدى بۇزۋعا نەمەسە قوعامدىق تارتىپكە قايشى ارەكەتتەر جاساۋعا جول بەرىلمەۋى كەرەك. ينتەرنەت تە زاڭ ۇستەمدىگى تولىق ساقتالاتىن ورتا بولۋى ءتيىس.

Abai.kz