ولجاس بەكتەنوۆ قحر-نىڭ قازاقستانداعى ەلشىسى حان چۋنلينمەن ساۋدا-ەكونوميكالىق ىنتىماقتاستىق ماسەلەلەرىن تالقىلادى.

پرەمەر-مينيستر ولجاس بەكتەنوۆ قازاقستان رەسپۋبليكاسىنداعى ديپلوماتيالىق ميسسياسىن باستاعان قىتاي حالىق رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى حان چۋنلينمەن كەزدەستى. ساۋدا-ەكونوميكالىق ىنتىماقتاستىق، ينۆەستيتسيا، اوك، كولىك جانە لوگيستيكا، ەنەرگەتيكا، مادەني-گۋمانيتارلىق سالا، تۋريزم جانە باسقا دا سالالارداعى ءوزارا ءىس-قيمىلدى كەڭەيتۋ ماسەلەلەرى تالقىلاندى.

پرەمەر-مينيستر قازاقستان پرەزيدەنتى قاسىم-جومارت توقاەۆ پەن قحر توراعاسى سي تسزينپين اراسىنداعى قارقىندى جانە سەنىمدى بايلانىستار سەرپىندى ەكونوميكالىق ىنتىماقتاستىقتىڭ نەگىزى ەكەنىن باسا ايتتى. كەلىسسوزدەر بارىسىندا تاراپتار ەكى ەل اراسىنداعى ساۋدا-ەكونوميكالىق ارىپتەستىكتىڭ قالىپتاسقان جوعارى دەڭگەيىن اتاپ ءوتتى. 2024 جىلدىڭ قورىتىندىسى بويىنشا ەكىجاقتى تاۋار اينالىمى 9%-عا ءوسىپ، $43,8 ملرد-قا جەتتى.

ەكى مەملەكەت باسشىلارى قويعان ءوزارا ساۋدا كولەمىن ەكى ەسەگە ارتتىرۋ جونىندەگى مىندەتتەرگە قول جەتكىزۋ ماقساتىندا ۇكىمەتتەر تاۋار اينالىمىن ارتاراپتاندىرۋعا باعىتتالعان قولدا بار الەۋەتتى كەڭەيتۋ بويىنشا بىرلەسكەن جۇمىس جۇرگىزۋدە. وسىعان بايلانىستى قازاقستاندىق تاراپ جەتكىزىلەتىن ءونىم نومەنكلاتۋراسىن ودان ءارى كەڭەيتۋدىڭ، ونىڭ ىشىندە، قىتاي تاراپىنىڭ استىق جۇكتەرىن ۆاگونداردىڭ بارلىق ءتۇرى بويىنشا قابىلداۋىن ۇلعايتۋ، سونداي-اق قحر-عا ەكسپورتتاۋشىلار تىزىلىمىنە جاڭا قازاقستاندىق كاسىپورىنداردى ەنگىزۋ ارقىلى قىتاي نارىعىنا قازاقستاندىق استىقتىڭ ەكسپورتىن ارتتىرۋدىڭ ماڭىزدىلىعىن اتاپ ءوتتى.

بۇدان باسقا، بىرلەسكەن ينۆەستيتسيالىق جوبالاردى ىسكە اسىرۋ ماسەلەلەرى قارالدى. قىتاي قازاقستاننىڭ 5 ۇزدىك ينۆەستورىنىڭ قاتارىنا كىرەدى. بۇگىنگى تاڭدا 11 مىڭ جۇمىس ورنى اشۋ ارقىلى $8,7 ملرد-قا 62 قازاقستان-قىتاي جوباسى ىسكە اسىرىلدى، 17,4 مىڭ جۇمىس ورنىن اشاتىن 13,5 ملرد-قا 55 جوبا ىسكە اسىرۋ ساتىسىندا. جالپى پۋلعا $60,5 ملرد-تان استام 222 ينۆەستيتسيالىق جوبا كىرەدى.

سونداي-اق ترانزيتتىك-كولىك سالاسىنداعى ىنتىماقتاستىقتى نىعايتۋعا باسا نازار اۋدارىلدى. «قتج» ۇك» اق دەرەكتەرى بويىنشا 2024 جىلدىڭ 11 ايىندا قازاقستان مەن قحر اراسىندا جۇك تاسىمالداۋ كولەمى 2023 جىلدىڭ سايكەس كەزەڭىمەن سالىستىرعاندا 13%-عا ءوسىپ، 29,3 ملن توننانى قۇرادى. جۇك تاسىمالىن ودان ءارى ارتتىرۋ ءۇشىن قازاق-قىتاي شەكاراسىندا جاڭا وتكىزۋ پۋنكتتەرىن اشۋ جانە قولدانىستاعى وتكىزۋ پۋنكتتەرىن جاڭعىرتۋ، سونداي-اق شەكارا ماڭىنداعى كەمە قاتىناسىن دامىتۋ جونىندە بىرلەسكەن شارالار قابىلداۋدىڭ ماڭىزى ناقتىلاندى.

كەزدەسۋ قورىتىندىسى بويىنشا تاراپتار ەكىجاقتى ءوزارا ءىس-قيمىلدىڭ بارلىق نەگىزگى باعىتتارى بويىنشا ارىپتەستىكتى نىعايتۋ جانە بىرلەسكەن جۇمىستى كۇشەيتۋ نيەتتەرىن راستادى.

Abai.kz