تارتىپ جەسەڭ - تابىس كوپ.

***

جوعارىعى جاققانىڭ - تاقتى وڭاي تاپقانىڭ.

***

ادالدىقپەن كۇن ەتكەن

ءوز تۇبىنە ءوزى جەتەر.

***

بولسىن دەسەڭ لاۋازىمىڭ ماڭگىلىك -

جوعارىعا جالباقتاي بەر تاڭدى ۇرىپ.

***

كرەسلوسىن قيمايدى،

تاپقانىن وزىنە جينايدى.

***

جەگەنى قارىنعا سىيماي تۇر،

سوندا دا كوزى قيماي تۇر.

***

ىشىندە تەڭگە بولماسا ءاميانىڭ دا سۇيكىمسىز.

***

ولەرمەن ولگەنشە جەيدى.

***

اشكوزدى اقشا اربايدى.

***

قولىنا ۇستاعاننىڭ ءبارىن كومەيىنە تىعا بەرگىسى كەلەدى.

***

تاققا وتىرعاننىڭ تالابى كۇشتى.

***

اشكوز العانىن قويمايدى،

پاراقور اقشاعا تويمايدى.

***

پارا الماساڭ – پاقىرسىڭ.

***

تابىستىڭ كوكەسى – تەندەردە،

ايەلدىڭ كۇشى – «گەندەردە».

(گەندەرلىك ساياساتتى مەڭزەپ وتىرمىز).

***

جەمقور «مايلى» ورىنعا ءۇيىر،

جالقاۋ جايلى ورىنعا ءۇيىر.

***

«بەرمەسەڭ» بەرەكەڭ كەتەر.

***

«دامەتپەگەن» دۇنيە جيناي الماس.

***

كوكەم كوكەسىنە سەنىپ وسەدى.

باستىق بارلىق جەرگە «بەرىپ» وسەدى.

***

دامەتۋدىڭ سوڭى – پارامەن بىتەدى،

وتىرىكتىڭ سوڭى جالامەن بىتەدى.

***

تالانتى جوق، تانىسى كوپ.

***

تاماعىنان وتپەسە تۇنشىعار،

قۇلقىنىنا تۇسسە قۇلشىنار.

***

«بەرەرىڭ» قانداي بولسا،

بەدەلىڭ سونداي بولماق.

***

اقشا بەرسەڭ جەتەرىڭ انىق،

بەرمەسەڭ قالارسىڭ قاڭعىپ.

***

باستىقپەن ۇرىسپا،

قىرسىعىپ، تىرىسپا.

***

«بەرگەننىڭ» ءىسى تەز بىتەدى،

بەرمەگەن ولگەنشە كۇتەدى.

***

ەبىن تاپ تا ەسىرە بەر.

***

تەندەر ۇلەستىرگەننىڭ تابەتى جاقسى.

***

پارا العان بولاشاعىنا الاڭدامايدى.

***

جەمقور جەمەي جاتا الماس،

پارادان ەش قاشا الماس.

***

قۇلقىنى قىسسا، قاراپ وتىرماس.

***

الادى ازداپ، ەپتەيدى –

دۇنيە ارتىق ەتپەيدى.

***

وسىنداي ءبىزدىڭ كوكەمىز

پايداسىن ويلاپ
جورتاتىن كوكەم،
جۇتسا دا تاستى
قورىتاتىن كوكەم.
تۋىسقان، قۇدا،
دوس-جاران، جەكجات،
جاماعايىنىنا دەيىن
«جارىتاتىن» كوكەم.

تەندەردىڭ ءبارىن
ۇتاتىن كوكەم.
پروبلەما كورسە
زىتاتىن كوكەم.
قولىنان كەلسە
قونىشىنان باسىپ،
شايناماي ءبارىن
جۇتاتىن كوكەم.

تانىس پەن تامىر
قۋاتىن كوكەم.
جوعارىدان ىعىپ
بۇعاتىن كوكەم.
ءالسىزدى كورسە اياقتان شالىپ،
جولىن دا كەسىپ،
جىعاتىن كوكەم.

ماڭىنا ەشبىر
جولاتپايتىن بوتەن،
وسىنداي ءبىزدىڭ
باسەكەڭ-كوكەم.

عالىم بولدىم...

عالىم بولدىم مىنەكي،
«شابىتىمدى شاقىرىپ».
ايعايلاپ تۇر تاقىرىپ.
قورعايمىن دەپ دوكتورلىق
تىنىم تاپپاي جاتىرىق.
بولىپ السام زور عالىم،
جەرگە تيمەي قاقىرىق،
تانىس-تامىردى شاقىرىپ،
تويلارمىن-اۋ جاپىرىپ...
قۇپياسى قورعاۋدىڭ –
ىزدەنۋ ەمەس قاپىلىپ.
سويلەسەڭ بولدى ساپىرىپ.
بەرىپ قويساڭ بولدى عوي
تيىن-تەبەنىن، اقىرىن.

***

كەر جالقاۋدىڭ ارمانى

ە-ە، شىركى-ءىن!
سوزىمە جۇرت قۇلاق سالسا ەكەن،
بار نازار ماعان اۋسا ەكەن.
جۇمىس ىستەپ شارشاماي
اسپاننان اقشا جاۋسا ەكەن.

بار اتاق ماعان كەلسە ەكەن،
ەسىمىم گيننەسكە ەنسە ەكەن.
كوشەسىنە تۋعان اۋىلدىڭ
اتىمدى ويىپ بەرسە ەكەن.

كىل قايماقتار ىشىندە
جارقىراپ، جايناپ جۇرسەم عوي.
ۆۋندەركيندتەن قالىسپاي،
كەمىندە بەس ءتىل بىلسەم عوي.

اتاقتىڭ ءبارىن السام عوي،
الەۋمەتتىك جەلىنى جارسام عوي.
بىردە انا، بىردە مىنا ەلدە،
شەتەلگە كۇندە بارسام عوي.

كرەسلونىڭ كوكەسىن كورسەم عوي،
بۇيرىقتى شەتىنەن بەرسەم عوي!
تانىمايتىن جۇرت قالماي،
الشاڭداي باسىپ جۇرسەم عوي.

جىك-جاپار بوپ ءبارى ماقتاسا،
استى-ۇستىمە ءتۇسىپ باپتاسا.
«سىزدىكى دۇرىس، دۇرىس!» دەپ،
ءسوزىمدى حالىق جاقتاسا.

كەلمەيدى جاندى قيناعىم،
ويلاماسام ەكەن ءۇي قامىن.
جاراتا بەرەتىن شەتىنەن
بانكتە تۇرسا جيناعىم.

كىل دوكەي بولسا دوستارىم.
ورىندالا بەرسە جوسپارىم.
وسى عوي مەنىڭ قالاۋىم -
جالقاۋعا مەنى قوسپاعىن.

ءۇمىت زۇلحاروۆا

1975 جىلى 28 قاڭتاردا قىزىلوردا وبلىسى، جاڭاقورعان اۋدانى، قاراتوبە اۋىلىندا تۋعان. تۇركىستان قالاسىنداعى قوجا احمەت ياساۋي اتىنداعى حالىقارالىق قازاق-تۇرىك ۋنيۆەرسيتەتىنىڭ جۋرناليستيكا ءبولىمىن بىتىرگەن. رەسپۋبليكالىق «ارا.kz» سىن-سىقاق جۋرنالىندا سىقاقشى-جۋرناليست، جاۋاپتى حاتشىسى، باس رەداكتوردىڭ ورىنباسارى قىزمەتتەرىن اتقاردى.

«دەپۋتات وتىر پارتادا»، «ەسەبىڭدى بىلەسىڭ بە؟»، «كەلەكە كەرەك پە؟» اتتى ساتيرالىق كىتاپتاردىڭ اۆتورى. قازاقستان جۋرناليستەر جانە جازۋشىلار وداعىنىڭ مۇشەسى.

Abai.kz