بيىل قوسىمشا 4 مىڭ شاقىرىم اقىلى ۋچاسكەلەر ەنگىزىلەتىن بولادى. بۇل تۋرالى كولىك ءمينيسترى مارات قاراباەۆ ۇكىمەت وتىرىسىندا مالىمدەدى.

«جولداردى ءنورماتيۆتى كۇتىپ ۇستاۋدىڭ تاعى ءبىر قۇرامداس بولىگى قارجىلاندىرۋدى قامتاماسىز ەتۋ ماسەلەسى. بيۋدجەتكە تۇسەتىن جۇكتەمەنى ازايتۋ جانە ءوزىن-ءوزى اقتاۋ ماقساتىندا رەكونسترۋكتسيا جانە جوندەۋ جۇمىستارى اياقتالعان ۋچاسكەلەردە «اقىلى» ستاتۋسىن كەزەڭ-كەزەڭىمەن ەنگىزۋ جالعاسۋدا. قازىر رەسپۋبليكا بويىنشا ۇزىندىعى 3 مىڭ 200 شاقىرىم اقىلى جول جۇيەسى جۇمىس ىستەيدى»، - دەدى مارات قاراباەۆ.

قازىرگى اقىلى جولدار: استانا-ششۋچينسك (211 كم), استانا-تەمىرتاۋ (134 كم), الماتى-قوناەۆ (42 كم), الماتى-حورگوس (295 كم), استانا-پاۆلودار (375 كم), قوناەۆ-تالدىقورعان (186 كم), تاراز-قاينار (238 كم), شىمكەنت-قىزىلوردا (447 كم), شىمكەنت-تاراز (90 كم), شىمكەنت-تاشكەنت (84 كم), ششۋچينسك-كوكشەتاۋ (61 كم), پاۆلودار-قالباتاۋ (453 كم), بەينەۋ-اقجىگىت (85 كم), ورال-سامارا (56 كم), پاۆلودار-ومسك (198 كم), كوكشەتاۋ-پەتروپاۆلوۆسك (169 كم), ورال-ساراتوۆ (99 كم), قىزىلوردا-ارال (455 كم). 2024 جىلى وسى اقىلى جولداردان ءتۇسىم 48 ملرد تەڭگە تۇسكەن.

«بيىل قوسىمشا 4 مىڭ شاقىرىم اقىلى ۋچاسكەلەر ەنگىزىلەتىن بولادى، ولاردان كەلەتىن تۇسىمدەر كولەمى بيىل 60 ملرد.، ال كەلەسى جىلى 100 ملرد. تەڭگەگە دەيىن جەتەدى. بۇل رەتتە، وسى اقىلى جولداردان تۇسكەن قاراجاتتىڭ ءبىر بولىگىن قۇرىلىس جۇمىستارىنا الىنعان قارىزداردىڭ پايىزدىق مولشەرلەمەلەردى وتەۋگە جۇمساۋ ماسەلەسى قاراستىرىلۋدا»، - دەدى قاراباەۆ.

Abai.kz