قاسىم-جومارت توقاەۆقا ەلدەگى كريمينوگەندىك جاعداي جانە ىشكى ىستەر ورگاندارىنىڭ «زاڭ مەن ءتارتىپ» قاعيداتىن ىسكە اسىرۋ بارىسى جونىندە اقپارات بەرىلدى.

پرەزيدەنتكە ەلىمىزدە قابىلدانعان كەشەندى شارالار ناتيجەسىندە بىلتىر قىلمىس سانى 12,7 مىڭعا ازايعانى باياندالدى.

سوڭعى جىلدارى قىلمىس دەڭگەيىنىڭ، اسىرەسە، كىسى ءولتىرۋ، قاراقشىلىق، توناۋ مەن ۇرلىق سياقتى اسا اۋىر قىلمىس تۇرلەرى كورسەتكىشتەرىنىڭ ايتارلىقتاي تومەندەۋى بايقالادى. سونىمەن قاتار تەرگەۋدىڭ زاماناۋي ادىستەرىن ەنگىزۋ ارقىلى قىلمىستىڭ بارلىق ساناتى بويىنشا اشىلۋى جاقسارا تۇسكەن.

ەرجان سادەنوۆ قىلمىسكەرلەردى ىزدەستىرۋ جۇمىستارىنىڭ ناتيجەسى تۋرالى ايتتى. 2024 جىلى پوليتسيا ىزدەۋدە جۇرگەن 1949 ادامدى ۇستاعان.

مەملەكەت باسشىسىنا ۇيىمداسقان، كيبەر جانە ەسىرتكى قىلمىستارىنا قارسى ءىس-قيمىل، سونداي-اق قۇقىق بۇزۋشىلىقتاردىڭ الدىن الۋ جونىندەگى تاپسىرمالارىنىڭ ورىندالۋ بارىسى تانىستىرىلدى. سونىڭ ىشىندە ۇيىمداسقان قىلمىستىق توپقا قاتىسقانى ءۇشىن 264 ادام قىلمىستىق جاۋاپكەرشىلىككە تارتىلعان.

ءمينيستردىڭ ايتۋىنشا، سوڭعى 12 ايدا ەسىرتكى تاراتۋعا قاتىستى اقپارات جاريالاعان 7500-گە جۋىق ينتەرنەت-رەسۋرس انىقتالدى، 22 تونناعا جۋىق ەسىرتكى اينالىمعا جىبەرىلمەدى، 64 ەسىرتكى زەرتحاناسى جويىلدى. ينتەرنەت-الاياقتاردىڭ 65 ميلليون قوڭىراۋى بۇعاتتالدى. نومىرلەردى اۋىستىرۋعا ارنالعان 48 SIM-box قۇرىلعىسى اشكەرەلەندى. الاياقتاردىڭ 2 ميلليارد تەڭگەدەن استام قارجىنى ەلدەن شىعارۋىنا جول بەرىلمەدى.

ۆەدومستۆو باسشىسى كامەلەت جاسىنا تولماعانداردىڭ قۇقىقتارىن قورعاۋ، كوشى-قوندى باقىلاۋدى كۇشەيتۋ، جول قاۋىپسىزدىگىن قامتاماسىز ەتۋ، قىلمىستىق-اتقارۋ جۇيەسىن جەتىلدىرۋ جونىندەگى شارالار تۋرالى حاباردار ەتتى.

كەزدەسۋ سوڭىندا قاسىم-جومارت توقاەۆ ەلدەگى قۇقىقتىق ءتارتىپ پەن قوعامدىق قاۋىپسىزدىك دەڭگەيىن ودان ءارى ارتتىرۋ بويىنشا بىرقاتار تاپسىرما بەردى.

Abai.kz