اقش مەملەكەتتىك حاتشىسى ماركو رۋبيو ساۋد ارابياسىنا ساپارمەن باردى. 18 اقپاندا وندا ۆاشينگتون مەن ماسكەۋ اراسىندا ۋكرايناداعى بەيبىتشىلىك تۋرالى كەلىسسوز وتەدى دەپ جوسپارلانعان.

كرەملدىڭ ءباسپاسوز قىزمەتى كەزدەسۋگە رەسەي تاراپىنان ەلدىڭ سىرتقى ىستەر ءمينيسترى سەرگەي لاۆروۆ پەن رەسەي پرەزيدەنتىنىڭ كومەكشىسى يۋري ۋشاكوۆ قاتىسادى دەپ حابارلادى. رەسەي دەلەگاتسياسى ساۋد ارابياسىنا 17 اقپاندا باردى.

Associated Press اگەنتتىگى مەن Axios باسىلىمى اتى-ءجونى اتالماعان شەنەۋنىككە سىلتەپ، اقش تاراپىنان ەر-ريادتاعى كەلىسسوزدەرگە ۇلتتىق قاۋىپسىزدىك جونىندەگى كەڭەسشى مايكل ۋولتتس پەن ارنايى ەلشى ستيۆ ۋيتكوفف قاتىسادى دەپ جازدى.

ساۋد ارابياسىنداعى بۇل كەزدەسۋگە ۋكراينا وكىلدەرى قاتىسپايدى. NBC News ارناسىنىڭ حابارلاۋىنشا، ۆاشينگتون تاراپتارمەن جەكە كەزدەسۋ وتكىزگىسى كەلەدى. 17 اقپاندا ۋكراينا پرەزيدەنتى ۆلاديمير زەلەنسكي كيەۆ كەلىسسوزدەر تۋرالى بىلمەدى جانە ولاردى مويىندامايدى دەپ مالىمدەدى.

16 اقپاندا رۋبيو CBS ارناسىنا بەرگەن سۇحباتىندا سوعىستى توقتاتۋ تۋرالى كەڭىرەك اڭگىمەگە ۋكراينا مەن اقش-تىڭ بۇكىل الەمدەگى وداقتاستارى قاتىسا الاتىن جاعداي جاساۋعا تىرىساتىنىن ايتتى. رۋبيو الداعى بىرنەشە اپتا مەن بىرەر كۇندە ءپۋتيننىڭ بۇل ماسەلەگە قانشالىقتى بايىپتى قارايتىنى انىق بولادى دەدى.

مەملەكەتتىك دەپارتامەنت باسشىسىنىڭ ايتۋىنشا، ۋكرايناداعى سوعىستى ءبىر عانا اڭگىمەمەن نەمەسە تەلەفون قوڭىراۋى ارقىلى توقتاتۋ مۇمكىن ەمەس. دەگەنمەن رۋبيو دونالد ترامپ اكىمشىلىگى بۇل ماسەلەنى شەشە الاتىنا سەنىمدى.

Abai.kz