گرۋزيانىڭ بۇرىنعى پرەزيدەنتى ميحايل سااكاشۆيلي «گوردون» ينتەرنەت باسىلىمىنا بەرگەن سۇحباتىندا دوسى - اقش پرەزيدەنتى ترامپتىڭ ساياساتى تۋرالى ايتىپ، ۋكراينا پرەزيدەنتى زەلەنسكيدى ۇلىبريتانيانىڭ بۇرىنعى پرەمەر-ءمينيسترى ۋينستون چەرچيللمەن سالىستىرىپ، ۋكراينا نەلىكتەن امەريكا پرەزيدەنتىمەن ديالوگ جۇرگىزۋى كەرەك ەكەنىن ءتۇسىندىردى.

سااكاشۆيلي: «مەن پرەزيدەنت ترامپپەن دوس بولدىم جانە دوسپىن. ول ءبىر كەزدەرى مەن سىبايلاس جەمقورلىقپەن كۇرەسكەندە، ءبىرىنشى بولىپ الەمدەگى رەفورمالار ءۇشىن، بۇكىل الەم ءۇشىن بەل شەشە كۇرەسەمىن دەگەن بولاتىن»، - دەي كەلە، ترامپتى – «وتە اقىلدى ادام، سونىمەن قاتار مۇلدەم جىندى ەمەس. ياعني، ونىڭ وزىندىك ءستيلى، ءوز جولى بار»، - دەپ سيپاتتادى.

ميحايل سااكاشۆيلي:

– ول شىنىمەن دە بۇل سوعىستى توقتاتقىسى كەلەدى، بىراق ەكىنشى جاعىنان، ءبىزدىڭ زامانىمىزدىڭ ناعىز چەرچيللى بار – ول پرەزيدەنت زەلەنسكي!

ەكىنشى دۇنيەجۇزىلىك سوعىس كەزىندە چەرچيلل العاشىندا امەريكا قۇراما شتاتتارىنىڭ سول كەزدەگى پرەزيدەنتى فرانكلين رۋزۆەلتپەن ءوت كۇردەلى كەلىسسوزدەر جۇرگىزگەنىن ەسكە سالعىم كەلەدى. ول رۋزۆەلتتى گيتلەرگە قارسى كواليتسياعا كومەكتەسۋگە سەندىرۋ ءۇشىن ءبىر جارىم جىلداي ۋاقىت جۇمسادى. ارينە، ول اقش-تا كوپتەگەن ادامداردى تىتىركەندىردى، بىراق انتيگيتلەرلىك كواليتسيا جۇمىس ىستەدى. بىزگە ادىستەمەلىك ديالوگ قاجەت ەكەنىنە سەنىمدىمىن. ءبىز بارلىعىمەن سويلەسۋىمىز كەرەك، الەم ۋكراينا جاعىندا بولادى. كەز كەلگەن جاعدايدا ۋكراينا جەڭەدى. مەن اقش تا، ەۋروپا دا ۋكراينانىڭ جاعىندا بولاتىنىنا سەنىمدىمىن.

مەن ۋكراينانىڭ بولاشاعىنا سەنەمىن بە؟ مەن ابدەن قارتايدىم. مەن ءوز ومىرىمدە داۋىرلەردىڭ وزگەرۋىن جانە تۇبەگەيلى ءارتۇرلى تسيكلداردى كوردىم. مەن تۇسىنگەن ەڭ باستى ءتۇيىن، ءسىز ەشقاشان بەرىلمەۋىڭىز كەرەك.

جەكپە-جەكتەن باس تارتۋعا بولمايدى. ايتپەسە، بۇل جەكە ادام ءۇشىن دە، مەملەكەت ءۇشىن دە ءولىم. شىعۋدىڭ ءبىر عانا جولى بار – ول كۇرەس. ارقاشان شىعار جول تابۋعا بولادى، بىراق باس تارتقاندا ونداي مۇمكىندىك قالمايدى.

دوستار، بۇل وتە قيىن كەزەڭ، بىراق مەن ءبارىمىز ءۇشىن جاقسى بولادى دەپ ويلايمىن. ادىستەمەلىك تۇردە جۇمىس ىستەۋ كەرەك. مەن تاعى دا ايتامىن – ترامپ وتە اقىلدى ادام، بىراق ۋكرايندىق مۇددەلەر بار.

ال 2012 جىلى رەسەي مەنىڭ پارتيامدى بيلىكتەن الىپ، رەسەيشىل ەلەمەنتتەردى اكەلۋ ءۇشىن سايلاۋدا ءدال وسىلاي جاسادى. مەن ۋكراين حالقىنىڭ تاۋەلسىزدىككە، بوستاندىققا جەتۋ جولىن قولدايتىنىنا جانە پرەزيدەنتتى قولدايتىنىنا سەنىمدىمىن، بۇل ءارتۇرلى ساۋالنامالارعا سايكەس كەلەدى.

بىراق ءبىزدىڭ باسقا وداقتاستارىمىز جوق. ءبىز اقش-پەن جۇمىس ىستەۋىمىز كەرەك، پرەزيدەنت ترامپپەن جۇمىس ىستەۋىمىز كەرەك، ءبىر-ءبىرىمىزدى تىڭداپ، العا جىلجۋىمىز كەرەك. بىزدە باسقا بالاما جوق!

ەسكە سالايىق، سااكاشۆيلي 2004-2013 جىلدار ارالىعىندا گرۋزيا پرەزيدەنتى قىزمەتىن اتقارعان. 1992 جىلى تاراس شەۆچەنكو اتىنداعى كيەۆ ۇلتتىق ۋنيۆەرسيتەتىنىڭ حالىقارالىق قاتىناستار ينستيتۋتىنىڭ حالىقارالىق قۇقىق فاكۋلتەتىن ۇزدىك ءبىتىردى.

2015–2016 جىلدارى ودەسسا وبلىستىق مەملەكەتتىك اكىمشىلىگىنىڭ توراعاسى جانە ۋكراينا پرەزيدەنتىنىڭ كەڭەسشىسى بولدى. 2015 جىلى 26 مامىردا ۋكراينا ازاماتتىعىن الدى. گرۋزيادا سااكاشۆيليگە قارسى بىرنەشە قىلمىستىق ءىس قوزعالدى، ول بيلىگىن اسىرا پايدالاندى جانە ساياسي قارسىلاستارىن قۋدالادى دەگەن كۇدىككە ءىلىندى.

ءتىپتى گرۋزياعا ورالعانعا دەيىن ول التى جىلعا سىرتتاي سوتتالدى. سااكاشۆيليدىڭ ءوزى قىلمىستىق ىستەردىڭ ساياسي استارى بار دەپ قارايدى. 2021 جىلدىڭ 1 قازانىندا سااكاشۆيلي گرۋزياعا ورالعانىن حابارلادى. سول كۇنى ساياساتكەر ۇستالىپ، قاماۋعا الىندى.

گرۋزيا پروكۋراتۋراسى ونىڭ ۇستىنەن شەكارانى زاڭسىز كەسىپ وتكەنى ءۇشىن تاعى ءبىر قىلمىستىق ءىس قوزعادى. سااكاشۆيلي قاماۋدا بولعان كەزدە بىرنەشە رەت اشتىق جاريالاعان. 2022 جىلدىڭ مامىر ايىندا ول تيبيليسيدەگى «ۆيۆامەد» ازاماتتىق كلينيكاسىنا تەكسەرۋگە جىبەرىلدى، ول وسى كۇنگە دەيىن سول جەردە.

سااكاشۆيليگە 2023 جىلدىڭ 2 ساۋىرىندە بارعان مەديتسينالىق كوميسسيا ونىڭ دەنساۋلىعىنىڭ ناشارلاعانىن حابارلادى. 19 اقپانداعى بۇرىنعى ساپارىمەن سالىستىرعاندا بۇرىنعى پرەزيدەنت تاعى 4 كەلىگە ارىقتاپ، سالماعى شامامەن 60 كەلىگە تۇسكەن.

3 مامىردا سااكاشۆيلي ەسىنەن تانىپ، اجالدان امان قالعانىن حابارلادى. 2023 جىلدىڭ 3 شىلدەسىندە سااكاشۆيلي بىرنەشە ايدان كەيىن العاش رەت سوت وتىرىسىنا قاشىقتان قاتىستى. ساياساتكەر ايتارلىقتاي ارىقتاپ، اۋرۋشاڭ بولىپ كورىندى. ۋكراينا سىرتقى ىستەر ءمينيسترى دميتري كۋلەبا سااكاشۆيليدىڭ جاعدايى گرۋزين بيلىگى ونى ولىمگە ايداعىسى كەلەدى دەگەن الاڭداۋشىلىق تۋعىزاتىنىن ايتتى.

كەرىمسال جۇباتقانوۆ،

تاريح عىلىمدارىنىڭ كانديداتى، س. سەيفۋللين اتىنداعى قازاق اگروتەحنيكالىق زەرتتەۋ ۋنيۆەرسيتەتىنىڭ دوتسەنتى

Abai.kz