قازاقستان رەسپۋبليكاسى پارلامەنتى ءماجىلىسىنىڭ جالپى وتىرىسىندا جاڭا دەپۋتات انت بەردى. ماجىلىستەگى Respublica پارتياسى فراكتسياسى قۇرامىندا رۋسلان بەردەنوۆتىڭ وكىلەتتىگى مەرزىمىنەن بۇرىن توقتاتىلدى. ال بوساعان ماندات پارتيالىق تىزىمدە تۇرعان ەكاتەرينا سمولياكوۆاعا بەرىلدى.

ەكاتەرينا سەرگەەۆنا سمولياكوۆا 1987 جىلى 2 تامىزدا دۇنيەگە كەلگەن. ونىڭ "قازاق ءتىلى مەن ادەبيەتى" ماماندىعى بويىنشا جوعارى ءبىلىمى، سونداي-اق قازاقستان-بريتان تەحنيكالىق ۋنيۆەرسيتەتىندە العان DBA دارەجەسى بار. سمولياكوۆانىڭ ءبىلىم بەرۋ جانە باسقارۋ سالاسىندا ايتارلىقتاي جۇمىس تاجىريبەسى بار. ول قازاقستان-بريتان تەحنيكالىق ۋنيۆەرسيتەتىنىڭ (قبتۋ) پرورەكتورى بولدى، سونداي-اق مانساپ جانە تۇلەكتەرمەن جۇمىس ورتالىعىن باسقاردى.

2020 جىلدان بەرى ول ءتۇرلى قوعامدىق قىزمەتكە بەلسەندى قاتىسىپ، KBTU Empowerment ايەلدەر كلۋبىن باسقارادى جانە الماتى وبلىستىق №1 بالالار ءۇيىنىڭ قامقورشىلىق كەڭەسىنىڭ ءتورايىمى قىزمەتىن اتقارادى. بۇل باستامالار ايەلدەر مەن جاستاردى قولداۋعا جانە دامىتۋعا باعىتتالعان.

مانداتتى قابىلداعان ەكاتەرينا سمولياكوۆا Respublica پارتياسىنا وزىنە ارتىلعان سەنىمى ءۇشىن العىسىن ءبىلدىرىپ، حالىقتىڭ ءال-اۋقاتىن ارتتىرۋ جانە زاڭ شىعارۋ سالاسىندا جەمىستى ەڭبەك ەتۋگە دايىن ەكەنىن ايتادى. ول ءوزىنىڭ پارلامەنت ماجىلىسىندەگى جۇمىسىندا نەگىزگى باسىمدىقتاردى ءبىلىم بەرۋدى قولداۋ، الەۋمەتتىك باستامالاردى دامىتۋ، سونداي-اق قوعامداعى ايەلدەر مەن جاستاردىڭ ءرولىن كۇشەيتۋ باعىتىندا بولاتىنىن اتاپ ءوتتى.

ەستەرىڭىزگە سالا كەتەيىك، Respublica پارتياسىنىڭ تەڭ توراعاسى، پارلامەنت ماجىلىسىندەگى پارتيالىق فراكتسيانىڭ مۇشەسى رۋسلان بەردەنوۆ ماجىلىستەگى دەپۋتاتتىق وكىلەتتىگىن توقتاتتى. پرەزيدەنت اكىمشىلىگىنىڭ كەلىسىمىمەن بەردەنوۆ شىمكەنت قالاسى اكىمىنىڭ ورىنباسارى بولىپ تاعايىندالدى.

رۋسلان بەردەنوۆ Respublica پارتياسىنان پارلامەنت ءماجىلىسىنىڭ دەپۋتاتى رەتىندە شوب ءۇشىن سالىق جۇكتەمەسىن تومەندەتۋدى، كولەڭكەلى ەكونوميكا دەڭگەيىن ازايتۋدى، ەسىرتكىنىڭ زاڭسىز اينالىمىنا قارسى كۇرەستى، وتاندىق تاۋار وندىرۋشىلەردى قولداۋدى، يمپورتتى الماستىرۋ ماسەلەلەرىن جانە ىشكى نارىقتى قورعاۋ جۇمىستارىن بەلسەندى جاقتادى. ماجىلىسمەن باستاماسىمەن  شەشىلگەن ماسەلەلەردىڭ قاتارىنا بۋكمەكەرلىك كومپانيالاردىڭ جۇمىسىنداعى شەكتەۋلەر تۋرالى زاڭ، بىرقاتار وڭىرلەردە بولشەك سالىق مولشەرلەمەسىن تومەندەتۋ جانە وزگە دە ماسەلەلەر بار.

Respublica پارتياسى – ەلىمىزدە وكىلى اتقارۋشى ورگاندارداعى باسقارۋشى لاۋازىمعا تاعايىندالعان ەكىنشى ساياسي پارتيا بولدى.

پارتيا توراعاسى ايداربەك قوجانازاروۆ روتاتسيا جاڭا يدەيالار مەن تاسىلدەردى تارتۋعا مۇمكىندىك بەرەتىن ساياسي قۇرىلىمدى جاڭارتۋ مەن دامىتۋدىڭ ماڭىزدى ەلەمەنتى ەكەندىگىن اتاپ ءوتتى. "رۋسلان ارىسبەكۇلى ءوزىنىڭ ۇستانىمى مەن كوزقاراسىنا ادال بولا ءبىلدى. ول ەندى مەملەكەتتىك قىزمەتكە اۋىستى. ونىڭ پارلامەنتتىك تاجىريبەسى شىمكەنتتىڭ دامۋىنا ايتارلىقتاي ۇلەس قوسۋعا مۇمكىندىك بەرەتىنىنە سەنىمدىمىز", - دەپ اتاپ ءوتتى پارتيا توراعاسى.

ايتا كەتۋ كەرەك، Respublica پارتياسىنىڭ دەپۋتاتتارى پارلامەنتتەن كەتىپ، بيزنەس پەن بيلىكتىڭ نەگىزگى پوزيتسيالارىنا اۋىسۋدا. بۇل شەشىم ولاردىڭ يدەيالارى مەن باستامالارىن ىسكە اسىرۋ ءۇشىن جاڭا جولدار اشادى، بۇل ءوز كەزەگىندە پارتيانىڭ ۇستانىمىن نىعايتادى جانە ەلدە بولىپ جاتقان پروتسەستەرگە تيىمدىرەك اسەر ەتۋگە مۇمكىندىك بەرەدى.

Respublica پارتياسىنىڭ ءباسپاسوز قىزمەتى

Abai.kz