27 اقپاندا الماتى قالاسىنداعى № 180 مەكتەپ-گيمنازياسىندا 8 ناۋرىز –حالىقارالىق ايەلدەر مەرەكەسى قارساڭىندا «ءبىرتۇتاس تاربيە» باعدارلاماسى اياسىندا «قازاق قىزى-ۇلتتىق بولمىستىڭ ايناسى»  اتتى تانىمدىق- شىعارماشىلىق كەش وتكىزىلدى. ماقساتى; قازاق قىزىنىڭ ۇلتتىق بولمىستاعى ءرولىن اشىپ كورسەتۋ، ونىڭ سالت-ءداستۇر مەن مادەنيەتتى ساقتاۋداعى ماڭىزىن تالداۋ. سونىمەن قاتار ۇلتتىق قۇندىلىقتاردى بويىنا سىڭىرگەن قازاق قىزدارىنىڭ زاماناۋي قوعامداعى ورنىن انىقتاۋ. كەش  قوناقتارى  قازاقستان رەسپۋبليكاسىنىڭ ءبىلىم بەرۋ ءىسىنىڭ ۇزدىگى، «قازاق ۇلتتىق ادەت-عۇرىپ، سالت-ءداستۇر اكادەمياسىنىڭ» اكادەميگى، «التىن ارقاۋ» مادەني-ەتنوگرافيالىق قوعامدىق بىرلەستىگىنىڭ ءتورايىمى، ەتنوگراف، اقىن، قالامگەر-جۋرناليست ايۋپ عاليا قايداۋىلقىزى جانە شاكىرتى قاراساي اۋدانى، ىرگەلى مادەنيەت ءۇيىنىڭ كوركەمدىك جەتەكشىسى نۇرعوجاەۆا ەلنۇر قايراتقىزى.

سۋرەت: الماتى قالاسى الاتاۋ اۋدانى № 180 مەكتەپ-گيمنازياسىنان الىندى.

تانىمدىق كەش بارىسىندا ءبىلىم الۋشىلار عاليا قايداۋىلقىزىنىڭ ءومىربايانىن، ولەڭدەرى مەن جارىق كورگەن كىتاپتارى تۋرالى ايتتى. سونىمەن قاتار اقىننىڭ وتان، مەكتەپ، ۇستاز، انا، تۋعان جەر تۋرالى ولەڭدەرىن جاتقا ايتتى. سۇحبات كەزىندە ەتنوگراف، اقىن «كيەلى كيمەشەك» اتتى كىتابىندا «كيمەشەك – قازاق ايەلدەرىنىڭ كيەلى باس كيىمى، بويىنداعى يمانى، يناباتى، قورعانى، بەتجۇزدىگى، تالعامى، دارەجەسى مەن مارتەبەسى» - دەدى. 

تانىمدىق كەزدەسۋگە الاتاۋ اۋدانى ءبىلىم ءبولىمىنىڭ باسشىسى اكمۋرزاەۆا قارلىعاش مەدەربەكوۆنا دا قاتىسىپ، مۇنداي كەزدەسۋ قازىرگى قازاق قىزدارىنىڭ رۋحاني دامۋىنا ازىق بولاتىنىن اتاپ ءوتتى.

Abai.kz