الماتىداعى استانا الاڭىندا ناۋرىز مەيرامىنا ارنالعان باستى كونتسەرت ءوتتى. بيىل قالا ورتالىعى ءداستۇر، زاماناۋي مادەنيەت پەن تەحنولوگيا توعىسقان ءبىرتۇتاس مەرەكەلىك كەڭىستىككە اينالدى.

سالتاناتتى ءىس-شاراعا الماتى قالاسىنىڭ اكىمى دارحان ساتىبالدى قاتىستى. قالا باسشىسى تۇرعىنداردى قۇتتىقتاي وتىرىپ، ناۋرىزدىڭ جاڭارۋ، بىرلىك جانە ۇرپاق ساباقتاستىعىنىڭ مەرەكەسى رەتىندەگى ماڭىزىن اتاپ ءوتتى.

«جەر ءجۇزى جادىراپ، تابيعات جاڭعىرىپ، كۇن مەن ءتۇن تەڭەسەتىن وسىناۋ مەرەكەلى كۇنى الىستاعى اعايىن جاقىنداپ، جاقىنداعىسى تابىسادى. نيەتى ءتۇزۋ، پەيىلى كەڭ حالقىمىز ءاربىر جاڭا كۇندى ايرىقشا ىقىلاسپەن قارسى العان»، – دەدى دارحان ساتىبالدى.

قالا اكىمى «ناۋرىزناما» ونكۇندىگى اياسىندا ءاربىر كۇننىڭ وزىندىك ءمانى بار ەكەنىن ايتتى. بۇل كۇندەر ۇلتتىق قۇندىلىقتاردى دارىپتەۋگە، مادەنيەت پەن ءداستۇردى جاڭعىرتۋعا، سونداي-اق قوعامداعى بىرلىك پەن ءوزارا قۇرمەتتى نىعايتۋعا باعىتتالعان.

«ەل ەكونوميكاسىنىڭ درايۆەرى، اسپان تاۋلار باۋىرىنداعى الىپ شاھارىمىز – الماتى قالاسى دا ءوسىپ-وركەندەپ، كوركەيىپ كەلەدى. الماتىنى دامىتۋ باعدارلاماسى اياسىندا قالا ينفراقۇرىلىمى جاڭارتىلىپ، تۇرعىن ۇيلەر، الەۋمەتتىك ماڭىزى بار عيماراتتار مەن كوشەلەر جوندەلىپ، جولدار سالىنۋدا. ءبىزدىڭ ەڭ باستى ماقساتىمىز – تۇرعىندار مەن قوناقتار ءۇشىن ىڭعايلى، جارقىن ءارى ءومىر سۇرۋگە قولايلى قوعامدىق ورتا قالىپتاستىرۋ.»، – دەدى قالا اكىمى.

كونتسەرتتىك باعدارلاما تانىمال قازاقستاندىق ارتىستەر مەن شىعارماشىلىق ۇجىمداردىڭ باسىن قوستى. ساحنادا تانىمال اندەر شىرقالىپ، ۇلتتىق ناقىشتاعى تەاترلاندىرىلعان قويىلىمدار - مەرەكەلىك كوڭىل كۇي مەن كوكتەمگى جاڭارۋ رۋحىن ايشىقتادى.

تۇرعىنداردىڭ، اسىرەسە، ەگدە جاستاعى ازاماتتاردىڭ قولايلىعى ءۇشىن الاڭدا ارنايى وتىراتىن ورىندار ۇيىمداستىرىلدى.

قالا تۇرعىندارىنىڭ ەرەكشە قىزىعۋشىلىعىن التى تاقىرىپتىق كيىز ۇيدەن تۇراتىن كورمە اۋداردى. ءاربىر كيىز ءۇي تاريحي مۇرادان باستاپ زاماناۋي تەحنولوگياعا دەيىنگى باعىتتاردى تانىستىردى.

ءبىرىنشى كيىز ۇيدە ىقىلاس اتىنداعى حالىق مۋزىكالىق اسپاپتار مۋزەيىنىڭ قورىنداعى ۇلتتىق اسپاپتار قويىلدى. ەكىنشى كيىز ءۇي يننوۆاتسيالىق ينتەراكتيۆ الاڭىنا اينالىپ، وندا روبوتتار، دروندار، وقۋشىلاردىڭ ازىرلەمەلەرى، جاساندى ينتەللەكتكە نەگىزدەلگەن جوبالار جانە ۆيرتۋالدى شىندىق ايماعى كورسەتىلدى.

ءۇشىنشى كيىز ءۇي — «Digital 360 – Welcome to Almaty» مۋلتيمەديالىق كەڭىستىگى پانورامالىق پروەكتسيالار مەن تسيفرلىق شەشىمدەر ارقىلى قالانى ءتۇرلى كەزەڭدەردە تاماشالاۋعا مۇمكىندىك بەردى. ءتورتىنشى كيىز ۇيدە كەلۋشىلەر «التىن ادام» جانە ارحەولوگيالىق رەكونسترۋكتسيالارمەن تانىستى.

بەسىنشى كيىز ۇيدە ەتنوديزاين مەن ءداستۇرلى بىزكەستەنىڭ زاماناۋي ۇلگىلەرى ۇسىنىلسا، التىنشى كيىز ءۇي مۋزەي ەكسپوناتتارى نەگىزىندە XIX عاسىردىڭ سوڭى مەن XX عاسىردىڭ باسىنداعى قازاق تۇرمىسىنىڭ ءداستۇرلى كەلبەتىن قايتا جاڭعىرتتى.

جالپى، اۋقىمدى مەرەكەلىك ءىس-شارالار 23 ناۋرىزعا دەيىن جالعاسادى. وسى كۇندەرى قالا تۇرعىندارى مەن قوناقتارىنا كونتسەرتتەر، تەاترلاندىرىلعان قويىلىمدار، كورمەلەر، مادەنيەت قايراتكەرلەرىمەن كەزدەسۋلەر جانە قازاق حالقىنىڭ ءداستۇرلى سالت-جورالعىلارى ۇسىنىلادى.

Abai.kz