اراب ليگاسىنا مۇشە مەملەكەتتەر سەيسەنبى كۇنى مىسىر استاناسى كايردە باس قوسىپ، گازانى قايتا قۇرۋ، يزرايلدىڭ سوققىسىنان قانجىلاعان پالەستينالىقتاردىڭ تاعدىرىنا بايلانىستى جينالىس وتكىزدى.

اق ءۇي قوجايىنى ترامپ پرەزيدەنتىككە كىرىسە سالا العاشقى شەتەلدىك قوناق رەتىندە نەتانياحۋدى شاقىرىپ، جاھان جۇرتىنا: "گازانى دۋباي سياقتى "جەر جانناتىنا" اينالدىرۋ جوسپارىم بار", - دەپ جەلپىنگەن ەدى. كوكتەن تىلەگەنى جەردەن تابىلعان ەۆرەي باسشىسى ونى: "تاريحي شەشىم", - دەپ، ترەكەڭە كوپشىك قويا سويلەگەن. ەكى وداقتاستىڭ باۋىرلاستارىنىڭ سىرتىنان شەشىم شىعارۋى اراب ەلدەرىنە ۇناماعان. ترامپتىڭ ەكى جارىم ميلليون پالەستينالىقتى گازادان كوشىرۋ باستاماسى ولاردىڭ اشۋىن تۋدىرعان. مىسىر مەن يوردانيا باسشىلارى پالەستينالىقتاردى قابىلداۋدان ءۇزىلدى-كەسىلدى باس تارتقان.

اراب ليگاسى ەلدەرى ترامپتىڭ "گازا ارمانىنا" بالاما رەتىندە، پلەستينالىقتاردىڭ، جۇيەدەن وزدەرىنىڭ مۇددەسىنە سايكەس كەلەتىن ماسەلەنى رەتتەۋ جولىن قاراستىرا باستادى. كەشەگى كەزدەسۋدە مىسىر تارابى ۇسىنعان "گازانى قايتا قۇرۋ جوباسى" تالقىلاندى.

اراب ليگاسى ەلدەرى ورتاق مالىمدەمەلەرىندە پالەستينالىقتاردى مەكەنىنەن كەشىرۋدى قاتاڭ ايىپتاپ، تالاپايعا تۇسكەن پالەستينا جەرىنە كوز الارتۋدىڭ جاڭ قاقتىعىستارعا الىپ كەلەتىنىن، جۇيەدەن ورتا شىعىستىڭ بەيبىتشىلىگىن بۇزاتىنىن اتاپ ءوتتى.

ءبارى كەلىسكەن جوبا مازمۇنى مىنالاردى قامتيدى: "اراب ليگاسى ەلدەرى بىرلەسىپ گازانى قايتا قۇرۋ قورىن قۇرادى. ونىڭ قارجىسى 50 ميلليارد دوللار. بۇل قارجىنى 5 جىلدا تولىق يگەرۋ كوزدەلەدى. ءبىرىنشى باسقىشىندا جارتى جىلدا گازا ايماعى قوقىستان، مينادان تازارتىلىپ، 1,5 ميلليون ادامعا ارنالعان ۋاقىتشا باسپانا تۇرعىزىلادى. ەكىنشى باسقىشتا قوعامدىق-الەۋمەتتىك نىساندار مەن ۇزاق مەرزىمدىك تۇرعىن ايلەر سالىنادى". سونداي-اق ءبىر پورت پەن اۋەجاي سالۋدا بەكىتىلگەن.

مىسىر ۇسىنعان جوبانى ماقۇلداعان اراب ليگاسى ەلدەرى پالەستينالىقتاردى "پالەستينانى ازات ەتۋ ۇيىمىنىڭ" قول استىنا توپتاسۋعا شاقىرىپ وتىر.

گازا پالەستينا اكىمشىلىگىنە وتۋدەن بۇرىن، ونى اۆتونوميانىڭ ارناۋلى وكىلدەرى باسقارا تۇرادى. بۇل شەشىم يزرايل مەن حاماس-تىڭ قارسىلىعىنا تاپ بولۋى مۇمكىن.

حاماس 2007 جىلى پالەستينا اكىمشىلىگىنەن گازانى باسقارۋ قۇقىعىن تارتىپ العان ەدى. كەشەگى جيىندا ءسوز سويلەگەن 89 جاستاعى پالەستينا جەتەكشىسى ابباس گازانى باسقارۋ جاۋاپكەرشىلىگىن موينىنا الۋعا دايىن ەكەنىن جەتكىزدى. ەگەر ءبارى ءساتتى بولسا، پالەستينا تەرريتورياسىندا قايتادان پرەزيدەنت جانە پارلامەنت سايلاۋىن وتكىزۋگە ۋادە بەردى. بىراق ۋاقىتىن ناقتىلامادى.

حاماس پەن يزرايل قاڭتاردىڭ 19-نان باستاپ قاقتىعىستى توقتاتىپ، تۇتقىن الماسقانىمەن، ءالى دە ورتاق بىتىمگە كەلگەن جوق. يزرايل گازانىڭ قارۋسىزدانعانىن، حاماس-تىڭ شىعىپ كەتۋىن قالايدى. ال ول تالاپقا حاماس كەلىسپەيدى. يزرايل گازانى ابباستىڭ باسقارۋىنا بەرۋگە دە تۇبەگەيلى قارسى.

بىرىككەن قلتتار ۇيىمى باسشىسى دا اراب ليگاسى ەلدەرى قابىلداعان شەشىمدى ءبىر اۋىزدان قولدايتىنىن جەتكىزدى.

حاماس اراب ليگاسىنىڭ گازانى قايتا قۇرۋ، ۋاقىتشا باسقارۋ وكىلدىگىن قۇرۋ جوسپارىن قارسى الاتىنىن مالىمدەدى.

Abai.kz