مەملەكەت باسشىسىنىڭ تاپسىرماسى بويىنشا قر پرەمەر-ءمينيسترىنىڭ ورىنباسارى قانات بوزىمباەۆتىڭ توراعالىعىمەن وتكەن ۇكىمەتتىك كوميسسيادا «قازاقمىس كورپوراتسياسى» جشس «جومارت» كەنىشىندەگى اپاتتى تەرگەۋدىڭ الدىن الا قورىتىندىلارى قارالدى.

كوميسسيا تاۋ-كەن قازباسىنان مەتاننىڭ جينالۋى مەن ءبولىنۋى، سودان كەيىن ەلەكتر جابدىقتارىنىڭ ۇشقىنىنان جارىلىس بولۋى سياقتى اپاتتىڭ نەگىزگى سەبەبىن انىقتادى. سونداي-اق ونەركاسىپتىك قاۋىپسىزدىك پەن ەڭبەكتى قورعاۋ بويىنشا ايتارلىقتاي ەرەجە بۇزۋشىلىقتار انىقتالىپ، جاۋاپتى تۇلعالار توبى بەلگىلى بولدى.

كەڭەس قورىتىندىسى بويىنشا كوميسسيا توراعاسى قانات بوزىمباەۆ «قازاقمىس كورپوراتسياسى» جشس-عا بۇزۋشىلىقتاردى جويۋ مەن اپاتتاردىڭ الدىن الۋ بويىنشا، ونىڭ ىشىندە كەنىشتەگى قاۋىپسىزدىكتى ارتتىرۋ، اۋاداعى گاز قۇرامىن انىقتاۋدىڭ اۆتوماتتاندىرىلعان جۇيەلەرىن ەنگىزۋ، بەينەباقىلاۋ ورناتۋ جانە باسقا دا بىرقاتار تاپسىرما بەردى.

Abai.kz