ەلدەگى وزەكتى ماسەلەلەر اشىق تالقىلانىپ جاتىر – رينات زايتوۆ
بۇگىن پارلامەنت ءماجىلىسىنىڭ وتىرىسىندا دەپۋتات رينات زايتوۆ ءۇش جىل ىشىندە جۇزەگە اسقان ساياسي رەفورمالاردىڭ ارالىق قورىتىندىلارىنا توقتالدى. ونىڭ ايتۋىنشا، ەلىمىزدە ۇلكەن جەتىستىكتەرگە قاراي نىق قادام جاسالىپ كەلەدى. بۇل، ەڭ الدىمەن، مەملەكەت باسشىسى قاسىم-جومارت توقاەۆتىڭ ساياسي ينستيتۋتتارعا جانە حالىقتىڭ ءۇنىن جەتكىزەتىن ازاماتتارعا ارتقان سەنىمىنىڭ ناتيجەسى.
«قازاق ءۇشىن قاشاننان دا بەرى ەلدىڭ اماناتى مەن سەنىمىنەن اۋىر جۇك جوق. «ءدوپ» باسساڭ – ەل ءۇمىتىن اقتاعان ەرسىڭ، «قالت» باسساڭ – جاۋدان بەتەر ەزسىڭ! كەيدە ءتىپتى كوتەرگەن سۇراعىڭا ورىنسىز سىن تاعىپ، «وسى ماسەلە سەندەر قوزعايتىن تاقىرىپ پا؟ نەگە جوعارىداعىلار ۇساق-تۇيەك ماسەلەلەر قوزعايدى» دەپ جاتادى. ءوز باسىم بۇل سىنمەن كەلىسپەيمىن. سەبەبى ءبىز – ءبىر مەملەكەتپىز»، – دەدى رينات زايتوۆ.
سونىمەن قاتار ول سوڭعى جىلدارى ءماجىلىس پەن ءماسليحاتتار اراسىنداعى بايلانىس نىعايىپ، وڭىرلىك دەڭگەيدە دە بەلسەندى جۇمىس ءجۇرىپ جاتقانىن ايتتى. بۇل ۇدەرىستە «AMANAT» پارتياسىنىڭ بارلىق دەڭگەيدەگى ءماسليحات دەپۋتاتتارىنىڭ فورۋمدارى ۇلكەن ءرول اتقارعانىن اتاپ ءوتتى.
رينات زايتوۆ ماجىلىستە اپتا سايىن دەپۋتاتتاردىڭ ۇكىمەت مۇشەلەرىنە ساۋال جولداپ، وتكىر سۇراقتار قويىپ وتىرعانىن ايتتى. ونىڭ پىكىرىنشە، ماجىلىستە قوعام بەلسەندىلەرى مەن ساراپشىلاردىڭ قاتىسۋىمەن ەلدى تولعاندىراتىن ماسەلەلەر اشىق ءارى بۇكپەسىز تالقىلانىپ كەلەدى. بۇل ءۇردىس حالىقتىڭ بيلىككە دەگەن سەنىمىن قايتا تىرىلتۋگە ىقپال ەتىپ وتىر. دەپۋتات ەلدەگى وزەكتى ماسەلەلەر قوعام وكىلدەرىمەن جانە ساراپشىلارمەن بىرگە اشىق تالقىلانىپ جاتقانىنا دا نازار اۋداردى.
«وسىلايشا، قوعامدى تولعاندىراتىن كوپتەگەن ماسەلە شەشىمىن تاۋىپ، ەلدىڭ ىرگەسى بەكي ءتۇستى. ءاربىر يگى ءىس جۇزەگە اسقان سايىن حالىقتىڭ بيلىككە دەگەن سەنىمى ارتىپ كەلەدى»، – دەدى رينات زايتوۆ.
سونىمەن قاتار دەپۋتات قوعامداعى رۋحاني داعدارىس ماسەلەسىنە دە توقتالدى. ول رۋحاني توزۋدىڭ، قاتىگەزدىكتىڭ ارتقانىن اتاپ ءوتىپ، بۇعان تۇرمىستىق قيىندىقتار، تاربيەنىڭ السىرەۋى جانە الەۋمەتتىك جەلىدەگى تەرىس اقپاراتتار ىقپال ەتىپ وتىرعانىن ايتتى.
بۇل رەتتە تاربيە جۇمىسىن كۇشەيتۋدى، جاس ۇرپاقتىڭ بويىنا مەيىرىم، ادىلەتتىلىك پەن مەملەكەتشىلدىكتى ناسيحاتتايتىن كونتەنتتى دامىتۋ قاجەتتىگىنە توقتالدى.
«تاربيە تال بەسىكتەن دەگەندەي، قازاقستانداعى مۋلتفيلمنەن كينوعا، بالاباقشاداعى تاقپاقتان روماندارعا دەيىن ادامداردىڭ بويىنداعى مەيىرىم مەن باۋىرمالدىقتى، مەملەكەتشىلدىك پەن ادىلدىكتى ناسيحاتتاۋى كەرەك. سوندا عانا ءبىز قازاق مەملەكەتىنىڭ بايراعىن قۇلاتپاي، مارتەبەسىن اسقاقتاتاتىن ۇرپاق وسىرە الامىز. قازاق مەملەكەتىنىڭ ماتەريالدىق ەمەس قۇندىلىقتارىن قايتا تۇگەندەپ، ونى جاستاردىڭ ساناسىنا ءسىڭىرۋ – ءبىزدىڭ مىندەتىمىز»، — دەپ قورىتىندىلادى ول.
Abai.kz
