مەملەكەت باسشىسى قاسىم-جومارت توقاەۆتىڭ ەلىمىزگە رەسمي ساپارمەن كەلگەن چەرنوگوريا پرەزيدەنتى ياكوۆ ءميلاتوۆيچتى تاۋەلسىزدىك سارايىندا قارسى الۋ ءراسىمى ءوتتى.

تاۋەلسىزدىك سارايىندا پرەزيدەنتتەر ءبىر-بىرىنە رەسمي دەلەگاتسيا مۇشەلەرىن تانىستىردى. بۇدان كەيىن مارتەبەلى مەيماننىڭ رەسمي ساپارىنا وراي ساپ تۇزەگەن قۇرمەت قاراۋىلىنىڭ باستىعى مەملەكەت باسشىلارىنا سالەمدىك بايانات بەردى. پرەزيدەنت وركەسترى ەكى ەلدىڭ مەملەكەتتىك ءانۇرانىن ورىندادى.

ءانۇرانداردى تىڭداپ بولعاننان كەيىن قاسىم-جومارت توقاەۆ پەن چەرنوگوريا پرەزيدەنتى كىلەمشە بويىمەن قازاقستان رەسپۋبليكاسىنىڭ مەملەكەتتىك تۋىنا قاراي ءجۇردى. ونىڭ الدىنا كەلگەندە مەيمان توقتاپ، باسىن ءسال ءيىپ، ءوزىنىڭ قۇرمەتىن ءبىلدىردى.

رەسمي قارسى الۋ راسىمىنەن كەيىن مەملەكەت باسشىلارىنىڭ قاتىسۋىمەن شاعىن قۇرامداعى كەلىسسوز باستالدى.

قاسىم-جومارت توقاەۆ:

– پرەزيدەنت مىرزا، قازاقستانعا رەسمي ساپارمەن كەلگەنىڭىزگە وتە قۋانىشتىمىن. چەرنوگوريا مەملەكەتى باسشىسىنىڭ العاشقى تاريحي ساپارىنا ەرەكشە ءمان بەرىپ وتىرمىز. سونداي-اق مۇنى ەلىمىز ءۇشىن وتە ماڭىزدى ۋاقيعا رەتىندە قاراستىرامىز. كەلىسسوزدەرىمىزدىڭ ناتيجەسى ەكىجاقتى قارىم-قاتىناسقا تىڭ سەرپىن بەرەتىنىنە سەنىمىم كامىل. چەرنوگوريانى حالقىمىز جاقسى بىلەدى. كوپتەگەن ازاماتىمىز جىل سايىن ءسىزدىڭ ەلدە دەمالىپ، جاقسى اسەرمەن ورالادى. ورايلى ءساتتى پايدالانا وتىرىپ، ەلىڭىزدىڭ تاۋەلسىزدىك العانىنا 20 جىل تولۋىمەن قۇتتىقتايمىن. وسى جىلداردا ءبىز جاقسى قارىم-قاتىناس ورناتتىق. ءوزارا ىنتىماقتاستىعىمىزدىڭ مازمۇنىن بايىتا ءتۇسۋ كەرەك دەپ ويلايمىن. وعان ەشقانداي كەدەرگى جوق. ءسىزدىڭ ىسكەرلىك دەلەگاتسياڭىزدىڭ قۇرامى وتە سالماقتى. بۇل ەكونوميكالىق جانە ىسكەرلىك بايلانىستاردىڭ اۋقىمىن ارتتىرا تۇسۋگە نيەتتى ەكەنىڭىزدى كورسەتەدى.

ياكوۆ ميلاتوۆيچ:

– قۇرمەتتى پرەزيدەنت! ەڭ الدىمەن قازاقستانعا شاقىرعانىڭىز ءۇشىن العىس ايتامىن. ءوزىڭىز اتاپ وتكەندەي، بۇل – چەرنوگوريا پرەزيدەنتىنىڭ قازاقستانعا العاشقى رەسمي ساپارى. بۇگىن ءبىز ەكىجاقتى ىنتىماقتاستىقتىڭ كوكجيەگىن كەڭەيتە تۇسەمىز دەپ سەنەمىن. بۇل ساپار بايلانىستارىمىزدىڭ جوعارى دەڭگەيگە كوتەرىلگەنىن كورسەتەدى. مەن مۇندا دوستاس ەلدىڭ وكىلى رەتىندە كەلدىم. چەرنوگوريانىڭ ىسكەرلىك ورتا وكىلدەرى دە وسىندا. ەكى ەلدىڭ ساۋدا پالاتالارى بيزنەس فورۋم وتكىزەدى، بىرقاتار مەموراندۋمعا قول قويىلادى. چەرنوگوريا قازاقستان ازاماتتارى ءۇشىن تانىمال باعىتتاردىڭ ءبىرى ەكەنىن بىلەمىز. وسى تاراپتاعى بايلانىستارىمىزدى كۇشەيتە تۇسكىمىز كەلەدى. سىزبەن ساياسي ىنتىماقتاستىقتى عانا ەمەس، ەكونوميكالىق سەرىكتەستىكتى كەڭەيتۋ مۇمكىندىكتەرىن دە تالقىلايمىز.

ايتا كەتەيىك، 18-20 ماۋسىم كۇندەرى مەملەكەت باسشىسى قاسىم-جومارت توقاەۆتىڭ شاقىرۋىمەن چەرنوگوريا پرەزيدەنتى ياكوۆ ميلاتوۆيچ قازاقستانعا رەسمي ساپارلايتىنىن جازعان ەدىك.

19 ماۋسىمدا تاراپتار جوعارى دەڭگەيدە كەلىسسوزدەر جۇرگىزىپ، ساياسي ديالوگتى نىعايتۋ، سونداي-اق ساۋدا-ەكونوميكالىق، ينۆەستيتسيالىق جانە مادەني-گۋمانيتارلىق ىنتىماقتاستىق پەرسپەكتيۆاسىن تالقىلايدى.

ەسكە سالساق، بۇعان دەيىن چەرنوگوريا قازاقستان ازاماتتارى ءۇشىن ۋاقىتشا ۆيزاسىز رەجيم ەنگىزدى.

Abai.kz