ترامپ اكىمشىلىگىنىڭ كومەگىمەن رەسەي قارجى سەكتورى باتىس سانكتسيالارىنان كەزەڭ-كەزەڭىمەن قۇتىلماق. كەشە اقش پەن رەسەي اراسىنداعى قارا تەڭىزدەگى اتىستى توقتاتۋ جونىندەگى كەلىسىم اياسىندا رەسەيلىك بانكتەردىڭ SWIFT جۇيەسىنە قوسىلۋ ماسەلەسى شەشىلدى. كرەمل تاراتقان مالىمەتكە ساي، العاشقى بولىپ جۇيەگە روسسەلحوزبانك قوسىلماق.

"روسسەلحوزبانكتەن كەيىن سبەر توبى دا SWIFT جۇيەسىنە قوسىلاتىن بولادى. قازىر سبەر وزىنە قاتىستى بارلىق سانكتسيالاردى الىپ تاستاۋ بويىنشا قادامداردى كرەملمەن پىسىقتاپ جاتىر. ءبىر سوزبەن ايتقاندا، رەسەي ءوزىنىڭ ترامپپەن جاقىندىعىن پايدالانىپ، سبەر ءۇشىن تولىق جول اشىپ بەرمەك", - دەيدى دەرەككوز.

وسىنىڭ اياسىندا سبەر ءوزىنىڭ حالىقارالىق نارىقتا جوعالتىپ العان پوزيتسيالارىن قالپىنا كەلتىرمەك. سانكتسيا قىسىمىمەن قازاقستاندا ساتىپ جىبەرگەن بانكىن قايتادان ساتىپ الۋعا جۇمىس ىستەيتىن بولادى. قازىر ونىڭ اتى Bereke-گە اۋىسىپ كەتكەن قازاقستانداعى بۇرىنعى ەنشىلەس بانكى كاتاردىڭ Lesha Bank توبىنىڭ قولىندا. ءوز كەزەگىندە ارابتار Bereke بانكىنىڭ باعاسىن ءوسىرىپ، وزدەرىنە ءتيىمدى شارتپەن قايتا ساتۋعا قارسى ەمەس ەكەندەرىن ءبىلدىردى.

"Lesha بەرەكەنى قازاقستان ۇكىمەتىنەن نومينالدى تۇردە 65 ميلليارد تەڭگەگە ساتىپ العان بولاتىن. ەندى ساتسا كەمىندە 200 ميلليارد تەڭگەگە ساتادى. سبەربانكتە ونداي اقشا بار. رەسەيلىكتەر تەك وزدەرىنىڭ بارلىق سانكتسيالاردان شىعۋىن كۇتىپ وتىر. سوندىقتان بۇگىن بە، ەرتەڭ بە، سبەر قازاق نارىعىنا ءبارىبىر ورالادى", - دەيدى دەرەككوز.

Bereke ارابتار ءۇشىن بەرەكەلى بولىپ وتىر. 2024 جىلى بانك كەمىندە 15 ميلليارد تەڭگە تازا كىرىس الىپ كەلدى. بىراق Lesha قازاقستانداعى بانكتى ماڭگى ۇستاپ وتىرۋعا قۇلىقتى ەمەس. جاھاندىق ينۆەستيتسيالىق ساياساتى اياسىندا پايداسىن بارىنشا سىعىپ الىپ، بانكتىڭ ءوزىن قىمباتقا ساتىپ جىبەرۋدى كوزدەيدى.

ال سبەر ءۇشىن قازاقستانعا ورالۋ تەك بيزنەس ەمەس، گەوساياساتتىڭ اجىراماس بولىگى بولىپ وتىر. سوندىقتان تاراپتاردىڭ مۇددەسى ءبىر بىرىمەن ۇشتاسۋدا.

دەرەككوز: DALA INSIDE تەلەگرام ارناسى

Abai.kz