استانانىڭ 2026 جىلعا ناقتىلانعان جەرگىلىكتى بيۋدجەتىنىڭ جالپى شىعىستارى 1 ترلن 483 ملرد تەڭگەنى قۇرايدى. بۇل تۋرالى قالالىق ەكونوميكا جانە بيۋدجەتتىك جوسپارلاۋ باسقارماسىنىڭ باسشىسى ايجان تۇگەلباەۆا ءماسليحاتتىڭ كەزەكتەن تىس سەسسياسىندا ءمالىم ەتتى. 

ونىڭ ايتۋىنشا، بيۋدجەتتى ناقتىلاۋ قالانىڭ ءوز تابىسىنىڭ وسۋىنە بايلانىستى بولىپ وتىر. جالپى كىرىس جوسپارى 111,4 ملرد تەڭگەگە دەيىن وسكەن، ونىڭ ىشىندە 86,4 ملرد تەڭگە قوسىمشا سالىق تۇسىمدەرى ەسەبىنەن قامتاماسىز ەتىلەتىن بولادى.

– استانا قارقىندى تۇردە دامىپ كەلەدى. ەكونوميكالىق ءوسىمىنىڭ ورتاشا قارقىنى 10% دەڭگەيىندە. حالىق سانى ورتا ەسەپپەن 7,5%-عا ءوسىپ وتىر. قۇرىلىس جۇمىستارىنىڭ قارقىنى 8,2%-عا، كولىك جانە لوگيستيكا سالاسىنداعى بەلسەندىلىك 30%-عا ارتتى. ساۋدا كولەمى 3%-عا ءوستى، - دەدى مەكەمە باسشىسى.

ونىڭ ايتۋىنشا، جىل باسىنان بەرى سۋبسيديالاناتىن قوعامدىق كولىك باعىتتارىنىڭ سانى 110-عا دەيىن ارتقان، ال جولاۋشىلار اعىنى 12%-عا وسكەن. جول ينفراقۇرىلىمى بويىنشا 30 شاقىرىم جول جوندەلىپ، تاعى 7,6 شاقىرىم جول سالىنىپ جاتىر.

جىلۋ ەنەرگەتيكاسى جانە كوممۋنالدىق شارۋاشىلىق سالاسىندا قۋاتتىلىقتى ارتتىرۋعا باعىتتالعان جوبالار جۇزەگە اسىرىلىپ جاتىر. ولار جىلۋ ەنەرگياسىن ءوندىرۋ قۋاتىن ساعاتىنا 1000 گيگاكالورياعا، ال ەلەكتر ەنەرگياسىن 423 مەگاۆولت-امپەرگە دەيىن ۇلعايتۋعا مۇمكىندىك بەرەدى.

– قالا كوركىن جاقسارتۋعا قوسىمشا 18,3 ملرد تەڭگە بولىنەدى. بۇل قارجى اۋلالاردى جوندەۋگە، كوگالداندىرۋعا، سانيتارلىق تازالىققا جانە LRT ستانتسيالارى مەن شەتكى اۋدانداردى اباتتاندىرۋعا جۇمسالادى، - دەدى ول.

ايجان تۇگەلباەۆا اتاپ وتكەندەي، قوسىمشا شىعىستار قالانىڭ جەدەل قاجەتتىلىكتەرىن، ستراتەگيالىق دامۋ مىندەتتەرىن، مەملەكەت باسشىسى مەن ۇكىمەتتىڭ تاپسىرمالارىن، سونداي-اق ءماسليحات دەپۋتاتتارى مەن قوعامدىق كەڭەس مۇشەلەرىنىڭ ۇسىنىستارىن ەسكەرە وتىرىپ جاسالعان.

Abai.kz