«قازاقستان» تەلەراديوكورپوراتسياسى جەڭىستىڭ 80 جىلدىعىنا 80 بەينەروليك ءتۇسىردى

«ەرجۇرەك ەسىمدەر» اتتى بەينەروليكتەر تسيكلى 1941-1945 جىلدارداعى ۇلى وتان سوعىسىندا ەرلىك كورسەتكەن 80 قازاقستاندىق باتىر تۋرالى باياندايدى. روليكتەردە ءاربىر كەيىپكەردىڭ ءومىر جولى مەن جاۋىنگەرلىك ەرلىگى، جەڭىسكە قوسقان ۇلەسى كورسەتىلەدى.
بەينەروليكتەر توپتاماسى «Qazaqstan» تەلەارناسى مەن «قازاقستان» تەلەراديوكورپوراتسياسىنا قاراستى 14 ايماقتىق تەلەارنالاردىڭ ەفيرىنەن 27 ناۋرىزدان باستاپ، 9 مامىر – جەڭىس كۇنىنە دەيىن كورسەتىلەدى.
جوبانىڭ ماقساتى - سوعىسقا قاتىسقان قازاقستاندىق باتىرلار تۋرالى اقپاراتتاردى جۇيەلەي وتىرىپ، ولاردىڭ تاريحي ەرلىگىنە قۇرمەت قالىپتاستىرۋ. بەينەروليكتەر كورەرمەندەردىڭ قازاقستاننىڭ جەڭىسكە قوسقان ۇلەسى تۋرالى ءبىلىمىن كەڭەيتۋگە، جاستاردى وتانسۇيگىشتىككە تاربيەلەپ، تاريحقا قىزىعۋشىلىعىن ارتتىرۋعا مۇمكىندىك بەرەدى.
«ەرجۇرەك ەسىمدەر» جوباسىن جاساۋدا رەسپۋبليكا بويىنشا ءار ءوڭىردىڭ ارداگەرلەر كەڭەسى ۇيىمىنان، باتىرلاردىڭ ۇرپاقتارىنان اۆتوبيوگرافياسى مەن ەستەلىكتەر جيناقتالدى. سونداي-اق، «ۇمىتىلعان قاھارماندار» (2019 ج.), «گەروي ۆەليكوي پوبەدى – كازاحستانتسى» ء(ى توم، 2016 ج.), «گەروي ۆەليكوي پوبەدى – كازاحستانتسى» ء(ىى توم، 2016 ج.), «سايىپقىران ساربازدار» (2022 ج.) كىتاپتارىنان اقپارات الىندى.
;list=PLngdzEyKAHx_cvZXZgQbreG03rSWiyqZ9Abai.kz