كەشە، سەيسەنبى كۇنى ۋكراينا پرەزيدەنتى زەلەنسكي شۇعىل ءباسپاسوز جيىنىن وتكىزىپ، ورىس ساپىندا سوعىسىپ جۇرگەن ەكى قىتاي اسكەرىن تۇتقىنداعانىن جاريالادى.

وقيعا بارىسى بىلاي بولعان ەكەن: دونەتسكىدەگى ۇرىس مايدانىندا ۋكراينا ساربازدارى 6 ادامنان قۇرالعان ەرەكشە اسكەري قوسىنمەن بەتپە-بەت كەلەدى. قيانكەسكى اتىس باستالىپ، 6 جاساقتىڭ ۇشەۋىنىڭ كوزى جويىلادى، ەكەۋى قولعا تۇسەدى، بىرەۋى قاشىپ قۇتىلادى. قولعا تۇسكەن تۇتقىنداردىڭ جەكە باس كۋالىكتەرىنەن، اسكەري كيىمدەرى مەن قارۋلارىنان قىتاي ازاماتتارى ەكەنى انىقتالادى. زەلەنسكي قويعان بەينەجازبادا قىتاي اسكەرى ءوزىنىڭ قالاي قولعا تۇسكەنىن، ءوز انا تىلىندە باياندايدى.

ماسەلەنىڭ ەگجەي-تەگجەيىن قۇپيا قالدىرعان زەلەنسكي ءوزىنىڭ اسكەري ارىپتەستەرىن بۇل تۇيىنگە باسا نازار اۋدارۋعا شاقىرىپ، وزدەرىنىڭ قىتايدىڭ ۋكرايناداعى وكىلدىگىنە ماسەلەنى توتەسىنەن قويىپ، تۇسىنىكتەمە تالاپ ەتكەنىن جەتكىزدى. قازىر قىتاي اسكەرىنىڭ الدىڭعى شەپكە بوي كورسەتكەنىن الەمدىك باق جارىسا جازىپ جاتىر.

كەشە عانا پەسكوۆ اقش پەن رەسەي تارابىنىڭ كەزدەسۋى 10-شى ساۋىردە تۇركيادا وتەتىنىن جاريالاعان ەدى. كرەمل ءبىر جاعىنان كەلىسىمگە كەلگەن بوپ، ەندى ءبىر جاعىنان اسكەري شابۋىلدى ۇدەتىپ، اق ءۇي قوجايىنى ترامپتى اشۋلاندىرعان ەدى. ورىس اسكەرىنىڭ 9 بالانىڭ ولىمىنە اكەپ سوقتىرعان كەزەكتى شابۋىلىن بارشا الەم جۇرتى قاتاڭ ايىپتادى. زەلەنسكيدىڭ مالىمدەمەسى رەسەي ءۇشىن دە، ونىڭ ارتىنا جاسىرىنعان قىتاي ءۇشىن دە وڭاي بولمايىن دەپ تۇر.

قىتاي اسكەرىنىڭ ورىستارعا كومەككە كەلگەنى راستالسا، ءپۋتيننىڭ مۇلدە سوعىستى توقتاتۋ ويى جوق ەكەنىن، اقش-پەن كەلىسسوزدەردىڭ سوعىستى سوزبالاڭعا سالۋ جولىنداعى ساياسي ويىن ەكەنى اشكەرەلەنىپ، ترامپقا ارىپتەستەرى جاعىنان قىسىمدى كوبەيتپەك. سالدارىنان ترامپ رەسەيگە سانكتسيانى قاتايتۋعا ءماجبۇر بولادى.

سوعىس باستالعالى-ءبارى ەۋروپا مەن اقش قىتاي بيلىگىن رەسەيگە جاسىرىن كومەكتەسىپ كەلەدى دەپ ايىپتاعانمەن، قىتاي تارابى ەكى ەل مۇددەسىنە ساياتىن حالىقارالىق وتىرىستاردا ءوزىنىڭ بەيتاراپ پوزيتسياسىن ءبىلدىرىپ، ماسەلەنى بەيبىت جولمەن شەشۋدى ۇسىنىپ كەلگەن ەدى. دونەتسكىدەگى قىتاي جاساعى ەرىكتىلەر ەمەس، قۇپيا كەلىىسىم شارتپەن كەلگەنى انىقتالسا، قىتاي يران مەن سولتۇستىك كورەيا سياقتى رەسەيگە اسكەري كومەك بەرگەن، سوعىسقا تىكەلەي ارالاسقان ءۇشىنشى ەل اتانۋى مۇمكىن. ول كەزدە ۋكراينا وداقتاستارى جاعىنان قاتاڭ جاۋاپقا تارتىلۋى مۇمكىن.

وسى ساعاتقا دەيىن قىتاي تارابى ۋكراينا جاقتىڭ سۇراعىنا ەشقانداي جاۋاپ قاتپادى.

Abai.kz