بۇگىن جەتىسۋ وبلىسىندا ءوڭىر باسشىسى بەيبىت يساباەۆتىڭ توراعالىعىمەن قازاقستان حالقى اسسامبلەياسىنىڭ وبلىستىق كەڭەسىنىڭ وتىرىسى ءوتتى. كەڭەس وتىرىسىندا قازاقستان حالقى اسسامبلەياسىنىڭ الداعى XXXIV سەسسياسىنا قاتىسۋ ماسەلەلەرى، قحا-نىڭ 30 جىلدىعى اياسىندا وڭىردە وتكىزىلەتىن ءىس-شارالار جوسپارى تالقىلاندى. وبلىس اكىمى بىرلىك كۇنى قارساڭىندا «بىرلىك جۇگىرىسى» سپورتتىق جۇگىرۋ، قازاقستان حالقى اسسامبلەياسىنىڭ اللەياسىنىڭ اشىلۋىن تىلگە تيەك ەتتى، – دەپ حابارلايدى جەتىسۋ وبلىسى اكىمىنىڭ ءباسپاسوز قىزمەتى.

سۋرەت: gov.kz سايتىنان الىندى.

وتكەن ونجىلدىقتا اسسامبلەيا ازاماتتىق قوعامنىڭ ماڭىزدى ينستيتۋتىنا اينالعانىن اتاپ وتكەن بەيبىت يساباەۆ قحا جۇزەگە اسىرىلعان، الەۋمەتتىك ماسەلەلەردى شەشۋگە باعىتتالعان جوبالارعا توقتالدى.

سۋرەت: gov.kz سايتىنان الىندى.

– وتكەن جىلدان بەرى وڭىردە «جومارت جان» قايىرىمدىلىق ورتالىعى جۇمىس ىستەپ كەلەدى. «قايىرىمدىلىق كەرۋەنى» جانە «مەكتەپكە جول» قايىرىمدىلىق اكتسيالارى اياسىندا وبلىستا از قامتىلعان جانە كوپ بالالى 7 مىڭنان استام وتباسىعا 30 ملن. تەڭگەگە كومەك كورسەتىلدى. ال قاراتال اۋدانىندا وتكەن جىلدىڭ قازان ايىنان باستاپ كورەيالىق ەتنومادەني ورتالىعىنىڭ، كورەيلەر وبلىستىق قاۋىمداستىعىنىڭ جانە «دياسپورا مۇراسى» رەسپۋبليكالىق قورىنىڭ قولداۋىمەن 70 تۇرعىن ءۇيدى تابيعي گازعا تەگىن قوسىلدى. وندا از قامتىلعان وتباسىلار، قارتتار مەن جالعىزباستى انالار تۇرادى. ىسكەر ايەلدەر كەڭەسىمەن جانە مەتسەناتتارمەن بىرلەسىپ وبلىستىق «اينالايىن» بالالار ءۇيىنىڭ تاربيەلەنۋشىلەرىن، قيىن ومىرلىك جاعدايعا تاپ بولعان انالار ۇيىندەگى، داعدارىس ورتالىقتارىنداعى ايەلدەردى قامقورلىققا الۋ بويىنشا جۇيەلى جۇمىس جۇرگىزىلۋدە. ەكىنشى دۇنيەجۇزىلىك سوعىسىنا قاتىسقان ارداگەرلەر مەن تىل ەڭبەككەرلەرىنە تۇراقتى تۇردە كومەك كورسەتىلەدى. مۇنداي جۇمىس اسسامبلەيا ءوڭىردىڭ تۇرعىندارىنا قولداۋ كورسەتە وتىرىپ، بىرلىك پەن كەلىسىمدى نىعايتۋعا سوزبەن ەمەس، ىسپەن ۇلەس قوساتىنىن كورسەتەدى، – دەدى ايماق باسشىسى.

سۋرەت: gov.kz سايتىنان الىندى.

كەڭەس وتىرىسىندا ءسوز سويلەگەن جەتىسۋ ۋنيۆەرسيتەتىنىڭ رەكتورى ەرمەك بۇرىباەۆ، وبلىستىق قازاقستان حالقى اسسامبلەياسىنىڭ قوعامدىق ورىنباسارى، «وبلىستىق ورىس ورتالىعىنىڭ» ءتورايىمى لاريسا كوتەلنيكوۆا جانە اسسامبلەيانىڭ جاستار قاناتىنىڭ وكىلدەرى ەكاتەرينا پودگورنوۆا مەن مولۋتجان توحتاحۋنوۆ اتقارىلعان جۇمىستار تۋرالى ايتىپ، قحا-نىڭ 30 جىلدىعى اياسىندا جوسپارلانعان ءىس-شارالاردى جان-جاقتى تالقىلادى. اتاپ ايتقاندا، «اسسامبلەيا جاستارى» تالدىقورعان قالاسىنداعى ءتىل سارايىنىڭ جانىنداعى كوپقاباتتى ۇيلەردىڭ قابىرعاسىنا مەرەيتويلىق داتاعا ارنالعان قابىرعا سۋرەتىنىڭ ەسكيزىن دايىنداپ، 30 جىلدىق اياسىندا تۇسىرىلەتىن كوركەم ءفيلمنىڭ ءتۇسىرىلىمى جانە تاريحي كىتاپ باسىپ شىعارۋ جۇمىستارى جۇرگىزىلۋدە. بۇل رەتتە وبلىستىڭ قحا مۇشەلەرى مەن ەتنومادەني بىرلەستىكتەرى وسى ۇدەرىستەردىڭ بارلىعىنا بەلسەنە اتسالىسۋدا.

سۋرەت: gov.kz سايتىنان الىندى.

جيىندى قورىتىندىلاعان وبلىس اكىمى بەيبىت يساباەۆ وبلىستىق اسسامبلەيا مەن جەرگىلىكتى اتقارۋشى ورگانداردىڭ تىعىز ىنتىماقتاستىعى كوپتەگەن ماڭىزدى مىندەتتى شەشۋگە مۇمكىندىك بەرىپ وتىرعانىن ايتا كەلە، ءوڭىردىڭ الەۋمەتتىك-ەكونوميكالىق دامۋىنىڭ نەگىزگى باعىتتارىنا قىسقاشا توقتالدى.

– جەتىسۋ ءوڭىرى قۇرىلعالى بەرى ءوڭىردى گازداندىرۋ، تۇرعىن ءۇي، مەكتەپ، دەنساۋلىق ساقتاۋ نىسانى، ۆەتەرينارلىق ستانسى سالۋ، جالپى ينفراقۇرىلىمدى دامىتۋ ماسەلەلەرىندە ايتارلىقتاي جەتىستىكتەرگە قول جەتكىزىلدى. قازىر الدىمىزدا قارجىلاندىرۋ كوزدەرى انىقتالعان ايماقتىڭ الداعى 2-3 جىلعا ارنالعان الەۋمەتتىك-ەكونوميكالىق دامۋىنىڭ ناقتى جوسپارى بار. مەملەكەت باسشىسى اتاپ كورسەتكەندەي، حالىقتىڭ نازارىن ۇزاق مەرزىمدى جوسپارلاردان قاراعاندا ناقتى ماسەلەلەردى شەشۋگە باعىتتاۋىمىز قاجەت. قازاقستان حالقى اسسامبلەياسى قىزمەت ەتكەن جىلدار ىشىندە قوعامدىق كەلىسىمدى، بىرلىك پەن تۇراقتىلىقتى ساقتاۋ ماسەلەلەرىندە عانا ەمەس، الەۋمەتتىك ماڭىزى بار ماسەلەلەردى شەشۋدە دە ءوزىنىڭ تيىمدىلىگىن ايقىن كورسەتەتىن ومىرلىك ماڭىزدى ينستيتۋتقا اينالدى. قازاقستان حالقى اسسامبلەياسىنىڭ ءحححىV سەسسياسىنا بەلسەندى قاتىسۋ ارقىلى وبلىستىق قازاقستان حالقى اسسامبلەياسى مەن وبلىستاعى ەتنومادەني ورتالىقتاردىڭ وكىلدەرى الداعى ۋاقىتتا دا ءوڭىردىڭ دامۋىنا ەلەۋلى ۇلەس قوساتىنىنا سەنىمدىمىن، – دەدى ايماق ب. يساباەۆ.

سۋرەت: gov.kz سايتىنان الىندى.

جيىن سوڭىندا ەتنومادەني ورتالىقتاردىڭ ءبىر توپ وكىلىنە، قوعام قايراتكەرلەرىنە، ەڭبەك ارداگەرلەرىنە، جاس كوشباسشىلارعا «قازاقستان حالقى اسسامبلەياسىنا 30 جىل» مەرەكەلىك مەدالدارى تابىس ەتىلدى.

Abai.kz