پاسحا مەرەكەسى قارساڭىندا ەلوردانىڭ دوستىق ۇيىندە پاسحا جۇمىرتقالارىن بوياۋ جانە پاسحا بالىشتەرىنە قامىر جاساۋ بويىنشا ەرەكشە شەبەرلىك ساباعى ءوتتى. وعان ەرەكشە قاجەتتىلىكتەرى بار بالالار مەن ءتۇرلى ەتنوس وكىلدەرى قاتىستى, دەپ حابارلايدى ەلوردا اكىمدىگىنىڭ رەسمي سايتى. 

سۋرەت: gov.kz سايتىنان الىندى.

ءىس-شارانى استانا قالاسىنىڭ قازاقستان حالقى اسسامبلەياسى جانىنداعى انالار كەڭەسى ۇيىمداستىردى. 

بالالار ششەتكا، قارىنداش، اپپليكاتسيالار جانە باسقا دا ساندىك ماتەريالداردى پايدالانىپ، پاسحا جۇمىرتقالارىن بوياۋدى ۇيرەندى. ولار سونداي-اق پاسحا بالىشتەرىنە قامىر دايىنداۋعا قاتىسىپ، ەرەكشە رەتسەپتەردى ۇيرەندى. ماستەر-كلاسستىڭ كوركىن ءتۇرلى تاتتىلەر ارتتىرا ءتۇستى. ولاردىڭ اراسىندا مەيىز قوسىلعان پاسحا بالىشتەرى، سۇزبە پاسحا تورتى جانە بويالعان جۇمىرتقالار بار. 

سۋرەت: gov.kz سايتىنان الىندى.

«بۇل كەرەمەت! مەن بارشا قازاقستاندىقتى پاسحا مەرەكەسىمەن قۇتتىقتايمىن جانە ولارعا باقىت، جاقسىلىق جانە بيىك شىڭداردى باعىندىرۋدى تىلەيمىن!» – دەپ ءوز اسەرىمەن ءبولىستى ماستەر-كلاسس قاتىسۋشىلارىنىڭ ءبىرى كيريلل چەرنوۆ. 

ءىس-شارا دوستىق ۇيىندە وتكەن مەرەكەلىك كەزدەسۋلەردىڭ جالعاسى بولدى. جاقىندا مۇندا ناۋرىز مەرەكەسى تويلانسا، ەندى ءتۇرلى مادەنيەت وكىلدەرى ءبىر داستارحاننىڭ باسىندا تاعى دا باس قوستى – بۇل جولى پاسحا مەرەكەسىنە وراي. 

سۋرەت: gov.kz سايتىنان الىندى.

«ءبىز قازاقستاندا بار بارلىق مەرەكەلەردى تويلايمىز. ماقسات – بارلىق ەتنوستى ءبىر شاڭىراق استىنا بىرىكتىرۋ. بۇگىن بىزگە ەرەكشە بالالار كەلىپ وتىر، ولاردىڭ ەموتسيالارىنا قاراعاندا بۇل ءىس-شارا ولارعا وتە ۇنادى»، - دەيدى دوستىق ءۇيى ديرەكتورىنىڭ ورىنباسارى كامەتا يبراەۆا. 

ۇيىمداستىرۋشىلاردىڭ ايتۋىنشا، مۇنداي فورماتتا پاسحا شەبەرلىك ساباعى العاش رەت ءوتتى. ول قازاقستان حالقى اسسامبلەياسىنىڭ 30 جىلدىعىنا ارنالعان ءىس-شارالاردىڭ ءبىر بولىگى بولدى. جوسپاردا ەتنوسارالىق بىرلىكتى نىعايتۋعا جانە تولەرانتتىلىق مادەنيەتىن دامىتۋعا باعىتتالعان جاڭا كەزدەسۋلەر مەن شىعارماشىلىق شارالاردى وتكىزۋ بار. 

سۋرەت: gov.kz سايتىنان الىندى.

Abai.kz