رەسەي پرەزيدەنتى ۆلاديمير پۋتين سايدا مەدۆەدەۆا مەن پاۆەل ءزارۋبيننىڭ «روسسيا-1» تەلەارناسىنداعى «روسسيا. كرەمل. پۋتين. 25 لەت» دەرەكتى فيلمىندە ءوزىنىڭ مۇراگەر تۋرالى ۇنەمى ويلايتىنىن العاش رەت مالىمدەدى. پۋتلەر رەجىمىنىڭ ەبىن تاپقان قوس جۇرگىزۋشىنىڭ قيىننان قيىستىرىپ قويعان  «رەسەي كوشباسشىسى بولاشاقتا ەلدى كىم باسقاراتىنىن ويلاي ما؟» دەگەن ساۋالىنا:

"مەن بۇل تۋرالى ۇنەمى ويلانامىن. بىراق تۇپتەپ كەلگەندە تاڭداۋ ادامدارعا، رەسەي حالقىنا، ازاماتتارعا، سايلاۋشىلارعا جۇكتەلەدى", - دەپ جاۋاپ بەردى. جانە وسى ورايدا ول جانە پرەزيدەنتتىككە ىقتيمال ۇمىتكەرلەردىڭ ارقايسىسىنىڭ الەۋەتىن ۇنەمى قاراپ، باعالايتىنىن ايتتى.

ءپۋتيننىڭ پىكىرىنشە، رف ازاماتتاردىڭ تاڭداۋ جاساۋ مۇمكىندىگى بولۋى ءۇشىن حالىقتىڭ سەنىمىنە قول جەتكىزە الاتىن بىرنەشە ادام پايدا بولۋى ءتيىس. «سايلاۋالدى تەحنولوگيالاردىڭ، اكىمشىلىك رەسۋرستاردىڭ بار ەكەنى تۇسىنىكتى. بىراق تۇپتەپ كەلگەندە تاڭداۋ ادامدارعا، رەسەي حالقىنا، ازاماتتارعا، سايلاۋشىلارعا بەرىلەدى. حالىق سەنىمى جوق ادامدا ەلەۋلى نارسە جاساۋ مۇمكىندىگى بولمايدى»، - دەپ قورىتىندىلادى مەملەكەت باسشىسى.

پۋتين مۇراگەر تۋرالى ءسوز قوزعاپ قانا قويعان جوق، ءوز جۇمىسىنىڭ كەمشىلىكتەرىن اتادى. سونداي-اق ۋكرايناداعى وقيعالاردىڭ شىنايى سەبەبىن اشتى.

رەسەي ساراپشىلارى نە دەيدى؟

ساياساتتانۋشى مارات باشيروۆ بۇل بەيبىتشىلىككە قول جەتكىزگەننەن كەيىن ەلدى باسقارۋ جۇيەسىندەگى الداعى وزگەرىستەردى كورسەتۋى مۇمكىن دەپ مالىمدەدى.

«پرەزيدەنت ءپۋتيننىڭ مۇراگەرى تۋرالى ۇنەمى ويلاپ وتىرعانى كەزدەيسوق ەمەس»، - دەپ جازدى باشيروۆ ءوزىنىڭ تەلەگرام-ارناسىندا.

ول رەسەي كونستيتۋتسياسى ەۋروپا جانە اقش-پەن قارىم-قاتىناستى جاقسارتۋعا ىقپال ەتەتىن وزگەرىستەرگە دايىن ەكەنىن اتاپ ءوتتى. ساياساتتانۋشىنىڭ ايتۋىنشا، پۋتين ەل كوشباسشىسى بولا تۇرا، قحر توراعاسى سي تسزينپينمەن سالىستىرۋعا بولادى، ال باسقا مەملەكەتتەردىڭ جاڭا باسشىلارىنا حالىقارالىق قاتىناستارداعى وزگەرىستەردى حالىققا ءتۇسىندىرۋ وڭاي بولادى.

ۆلاديمير جيرينوۆسكي ولەر الدىندا رف پرەزيدەنتى لاۋازىمىنا ۇمىتتەنە الاتىنداردىڭ ءتىزىمىن جاريالاعانى بەلگىلى. ء(بىز وقىرماندارىمىزعا ولاردىڭ بۇرىنعى لاۋازىمدارى بويىنشا وزگەرىسسىز ۇسىنىپ وتىرمىز – اباي كز.):

رف ۇكىمەتىنىڭ توراعاسى - ميحايل ميشۋستين;

رف قورعانىس ءمينيسترى - سەرگەي شويگۋ;

رەسەي فەدەراتسياسىنىڭ بۇرىنعى پرەزيدەنتى - دميتري مەدۆەدەۆ;

رف سىرتقى بارلاۋ قىزمەتىنىڭ ديرەكتورى - سەرگەي نارىشكين;

تۋلا وبلىسىنىڭ گۋبەرناتورى - الەكسەي ديۋمين;

مەملەكەتتىك دۋما توراعاسى - ۆياچەسلاۆ ۆولودين;

فەدەراتسيا كەڭەسىنىڭ توراعاسى - ۆالەنتينا ماتۆيەنكو;

رف ۇكىمەتى توراعاسىنىڭ بۇرىنعى ورىنباسارى - الەكسەي كۋدرين.

باتىستىڭ پىكىر قانداي؟

باتىستىق باق 2022 جىلعا دەيىن ەۆگەني پريگوجين مەن رامزان كادىروۆتى ءپۋتيننىڭ ىقتيمال مۇراگەرى دەپ جاريالاعانىن جاقسى بىلەمىز. قازىر بىرەۋى - ولىدەي، بىرەۋى - تىرىدەي بۇل تىزىمنەن سىزىلىپ قالدى.

امەريكالىق AP اگەنتتىگى رەسەي فەدەراتسياسىنىڭ  پرەزيدەنتى ۆلاديمير ءپۋتيننىڭ مۇراگەرلەرىنە قاتىستى دجيم حاينتس جاريالانىمى بويىنشا ءوز بولجامىن جاسادى.

ماسكەۋ مەرى سەرگەي ءسوبيانيندى، ۇكىمەت توراعاسى ميحايل ءميشۋستيندى، رەسەي پرەزيدەنتىنىڭ كەڭەسشىسى نيكولاي پاترۋشەۆتى، پرەزيدەنت كومەكشىسىنىڭ وكىلى، مەملەكەتتىك كەڭەس حاتشىسى الەكسەي ءديۋميندى جانە ەڭ سوڭىنان بۇرىن پرەزيدەنت ورىنتاعىندا وتىرعان دميتري مەدۆەدەۆتى بولاشاق رەسەيدىڭ الەۋەتتى پرەزيدەنتتەرىنىڭ ءبىرى بولۋى مۇمكىن دەپ اتادى.

وسىلايشا، ءپۋتيننىڭ مۇراگەرى تۋرالى ايتقانى الەمدىك باق-قا ازىق بولۋدا. بىراق پۋتيننەن كەيىن رەسەي تاعىنا كىم وتىراتىن بولجام ەمەس، ناقتى ءومىر كورسەتەدى.

ءابىل-سەرىك الىاكبار

Abai.kz