2025 جىلعى 6 مامىردا اباي اتىنداعى قازاق ۇلتتىق پەداگوگيكالىق ۋنيۆەرسيتەتىندە كەڭەس وداعىنىڭ باتىرى مالىك عابدۋللين اتىنداعى ءدارىسحانا اشىلدى.

ۇلى جەڭىستىڭ 80 جىلدىعى جانە كورنەكتى عالىم، فيلولوگيا عىلىمدارىنىڭ دوكتورى، پروفەسسور مالىك عابدۋلليننىڭ 110 جىلدىق مەرەيتويى اياسىندا ۇيىمداستىرىلعان شاراعا ۋنيۆەرسيتەتتىڭ باسقارما باسشىلىعى، زيالى قاۋىم وكىلدەرى، ۋنيۆەرسيتەتتىڭ پروفەسسورلىق-وقىتۋشىلار قۇرامى جانە ءبىلىم الۋشى بەلسەندى ستۋدەنت جاستار قاتىستى.

سونىمەن قاتار، اشىلۋ راسىمىنە مالىك عابدۋلليننىڭ قىزى مايدان مالىكقىزى ارنايى قاتىسىپ، اكەسىنىڭ عىلىمي مۇراسىن ساقتاۋ مەن ناسيحاتتاۋ باعىتىنداعى جۇمىستار جايىندا بايانداپ، ونىڭ ۇلتتىق عىلىم مەن مادەنيەتكە قوسقان ولشەۋسىز ۇلەسىن اتاپ ءوتتى.

سونداي-اق، اتالعان ءىس-شارا اياسىندا مالىك عابدۋلليننىڭ 1958 جىلى جارىق كورگەن «قازاق حالقىنىڭ اۋىز ادەبيەتى» اتتى عىلىمي ەڭبەگى قايتا باسىپ شىعارىلدى. بۇل ەڭبەك - ۇلتتىق رۋحانياتتىڭ التىن قورىنا ەنگەن، وزەكتىلىگىن ءالى كۇنگە دەيىن جوعالتپاعان، جاس ۇرپاقتىڭ رۋحاني دامۋىنا باعىتتالعان قۇندى مۇرا. ۋنيۆەرسيتەت بۇل باسىلىمدى قايتا جارىققا شىعارۋ ارقىلى حالىقتىق مۇرالاردى دارىپتەپ، ستۋدەنتتەر بويىنا ۇلتتىق قۇندىلىقتاردى ءسىڭىرۋدى كوزدەپ وتىر.

ايتا كەتسەك، مالىك عابدۋللين 1944–1951 جىلدار ارالىعىندا اباي اتىنداعى قازپي-دە (قازىرگى - اباي اتىنداعى قازۇپۋ) رەكتور قىزمەتىن اتقارىپ، ءبىلىم مەن عىلىم سالاسىنىڭ دامۋىنا زور ۇلەس قوسقان.

Abai.kz