پرەمەر-مينيستر ولجاس بەكتەنوۆ قوستاناي وبلىسىنا جۇمىس ساپارى اياسىندا تاۋەلسىزدىك العاننان بەرى العاش رەت سالىنعان جاڭا مەكتەپكە باردى. مەملەكەت باسشىسىنىڭ تاپسىرماسىمەن سالىنعان «جايلى مەكتەپ» بىلتىر جىل سوڭىندا پايدالانۋعا بەرىلگەن. مەكتەپ 300 ورىنعا ارنالعان.

سۋرەتتەر: primeminister.kz سايتىنان الىندى.

قوستاناي وبلىسىندا ءبىلىم بەرۋ جۇيەسى دامىپ كەلەدى. مەملەكەت باسشىسىنىڭ تاپسىرماسى بويىنشا وبلىستىڭ شالعاي اۋداندارىندا ينفراقۇرىلىمدىق جوبالار، ونىڭ ىشىندە ورتا ءبىلىم بەرۋ مەكەمەلەرىنىڭ قۇرىلىسى جۇزەگە اسىرىلىپ جاتىر.

سۋرەتتەر: primeminister.kz سايتىنان الىندى.

«ارقالىق تۋرالى ايتساق، بۇگىندە مۇندا 25 مەكتەپكە دەيىنگى ءبىلىم بەرۋ ۇيىمى جۇمىس ىستەيدى. بىلتىر 140 ورىندىق بالاباقشا اشىلدى. ورتا ءبىلىم تۋرالى ايتار بولساق، ارقالىقتا 12 مەكتەپ بار، ولاردىڭ ءبىرى «جايلى مەكتەپ». بىلتىر قاراشادا پايدالانۋعا بەرىلدى. مەكتەپ حالىقارالىق ستاندارتتارعا ساي. ايتا كەتەيىك، ءبىزدىڭ بارلىق 6 جايلى مەكتەبىمىزدە ءبىلىم قازاق تىلىندە بەرىلەدى»، — دەدى قوستاناي وبلىسى اكىمدىگى ءبىلىم باسقارماسىنىڭ باسشىسى ايمان يبراەۆا.

سۋرەتتەر: primeminister.kz سايتىنان الىندى.

№7 ورتا مەكتەپ ديرەكتورى اقتوتى كيسيكوۆا نىساننىڭ ىسكە قوسىلۋى وقۋ جاعدايىن جاقساتىپ قانا قويماي، قالاداعى مەكتەپتەردە ورىن جەتىسپەۋشىلىگى ماسەلەسىن شەشۋگە مۇمكىندىك بەرگەنىن اتاپ ءوتتى. قازىرگى ۋاقىتتا مەكتەپتە 316 وقۋشى وقيدى، ونىڭ ىشىندە 42-ءسى 1-سىنىپ وقۋشىسى. سىنىپتاردىڭ ورتاشا تولىمدىلىعى 17–18 وقۋشىدان. بارلىعى 19 سىنىپ. وقۋ پروتسەسى ەكى اۋىسىمدا ۇيىمداستىرىلعان. مەكتەپ جيھاز جانە قۇرال-جابدىقتارمەن 100% قامتاماسىز ەتىلگەن.

سۋرەتتەر: primeminister.kz سايتىنان الىندى.

«مەكتەپتە روبوتوتەحنيكا كابينەتتەرى، تسيفرلىق زەرتحانالار مەن پراكتيكالىق ساباقتارعا ارنالعان شەبەرحانالار جابدىقتالعان. ءتىپتى باستاۋىش سىنىپتارعا دا زاماناۋي قۇرالدار مەن جابدىقتالعان سىنىپتان تىس ايماقتار قاراستىرىلعان»، — دەدى ول.

سۋرەتتەر: primeminister.kz سايتىنان الىندى.

ۇجىمدا 38 پەداگوگ قىزمەت ەتەدى. مۇعالىمدەردىڭ جارتىسىنان استامى بىلىكتىلىك ساناتتارىنا يە، ولاردىڭ قاتارىندا پەداگوگ-شەبەرلەر، مودەراتورلار، ساراپشىلار جانە زەرتتەۋشىلەر بار.

Abai.kz