سوڭعى 20 جىل ىشىندە كورەيلىك ينۆەستيتسيالاردىڭ جالپى كولەمى 10,8 ملرد اقش دوللارىنان استى.  سەۋلدە قازاقستان مەن كورەيا رەسپۋبليكاسى اراسىنداعى ىسكەرلىك بايلانىستاردى نىعايتۋعا، سونداي-اق جاڭا سەرىكتەستىكتەردى قالىپتاستىرۋعا جانە كورەي كاسىپكەرلەردى احقو الاڭى ارقىلى بىرلەسكەن جوبالاردى ىسكە اسىرۋعا باعىتتالعان AIFC Connect بيزنەس ءىس-شاراسىن وتكىزدى.

قازاقستان رەسپۋبليكاسىنىڭ كورەيا رەسپۋبليكاسىنداعى توتەنشە جانە وكىلەتتى ەلشىسى نۇرعالي ارىستانوۆ ءوز سوزىندە قازاقستان مەن كورەيا اراسىنداعى كەڭەيتىلگەن ستراتەگيالىق سەرىكتەستىكتىڭ جوعارى دەڭگەيىن اتاپ ءوتتى. ەلشى كورەيا رەسپۋبليكاسىنىڭ قازاقستاننىڭ نەگىزگى سەرىكتەستەرىنىڭ ءبىرى ەكەنىن ايتتى.

«2024 جىلدىڭ قورىتىندىسى بويىنشا كورەيادان قازاقستانعا تىكەلەي ينۆەستيتسيا كولەمى 1,2 ملرد اقش دوللارىنا جەتىپ، كورەيا رەسپۋبليكاسى ەلىمىزدىڭ ەكونوميكاسىنا ينۆەستيتسيا قۇيعان ەڭ ءىرى ءۇشىنشى ينۆەستورعا اينالدى», – دەپ مالىمدەدى قازاقستان رەسپۋبليكاسىنىڭ كورەيا رەسپۋبليكاسىنداعى توتەنشە جانە وكىلەتتى ەلشىسى نۇرعالي ارىستانوۆ.

سونىمەن قاتار، ەلشى قازاقستاندا 876 كورەي كاپيتالى بار كاسىپورىن ءساتتى جۇمىس ىستەپ جاتقانىن اتاپ ءوتتى. ەكى ەل اراسىنداعى اۋە قاتىناس تا جاقسى دامۋدا: قازىرگى تاڭدا اپتاسىنا 15 تىكەلەي رەيس استانا مەن الماتى قالالارىنان سەۋلگە قاتىناۋدا، ال 29 مامىردان باستاپ SCAT Airlines اۆياكومپانياسى "شىمكەنت-سەۋل" باعىتىندا جاڭا مارشرۋتتى ىسكە قوسۋدى جوسپارلاپ وتىر.

«احقو GFCI رەيتينگىنە سايكەس شىعىس ەۋروپا مەن ورتالىق ازيانىڭ جەتەكشى قارجى ورتالىعى رەتىندە شەتەلدىك ينۆەستورلارعا قازاقستان مەن ورتالىق ازيا وڭىرىندە بيزنەس جۇرگىزۋ ءۇشىن قولايلى جاعدايلار ۇسىنادى. AIFC Connect اياسىندا ءبىز جاھاندىق دەڭگەيدەگى ەكونوميكالىق ورتالىق سەۋلدىڭ كاسىپكەرلەرىنە احقو-نىڭ قارجى، ونەركاسىپ، ينفراقۇرىلىم جانە قازىرگى ەكونوميكانىڭ ەڭ جىلدام دامىپ كەلە جاتقان سەكتورلارىنىڭ ءبىرى كرەاتيۆتى يندۋستريا سالالارىنداعى جوبالاردى ىسكە اسىرۋ مۇمكىندىكتەرىمەن تانىستىردىق», – دەدى "استانا" حالىقارالىق قارجى ورتالىعىنىڭ باسقارۋشىسى رەنات بەكتۇروۆ.

سەۋلدەگى ءىس-شارادا تالقىلاۋدىڭ ورتالىق تاقىرىبى قارجى ورتالىعىنىڭ زياتكەرلىك مەنشىكتى قورعاۋ سالاسىنداعى وزىق قۇقىقتىق بازاسى جانە مامىلەلەردى ۇزدىك الەمدىك تاجىريبەگە سايكەس قۇرىلىمداي الۋ مۇمكىندىگى ەسكەرىلە وتىرىپ، احقو-نىڭ كرەاتيۆتى يندۋستريانى دامىتۋ مۇمكىندىكتەرى بولدى.

سونداي-اق، قازاقستانداعى ەكونوميكانىڭ ناقتى سەكتورىنىڭ جوبالارىنا ينۆەستيتسيا سالۋ ءۇشىن قارجى ورتالىعىنىڭ الەۋەتىنە نازار اۋدارىلدى.

Abai.kz