باتىس قازاقستان وبلىسىنىڭ اكىمى ناريمان تورەعاليۇلى سىرىم اۋدانىندا 5 بالانىڭ تۇتىنگە ۋلانىپ قايتىس بولۋىنا وراي، بالالاردىڭ اتا-انالارى مەن جاقىندارىنا قايعىسىنا ورتاقتاسىپ كوڭىل ايتتى. 

"مەنىڭ تاپسىرمام بويىنشا وقيعا ورنىنا ورىنباسارىم باردى، اۋدان اكىمى وقيعا ورنىندا، بارلىق قاجەتتى قىزمەتتەردىڭ جۇمىسىن ۇيلەستىرىپ جاتىر. اكىمدىك تاراپىنان بارلىق قاجەتتى كومەك كورسەتىلەدى: جەرلەۋ ءراسىمىن ۇيىمداستىرۋ، پسيحولوگيالىق كومەك كورسەتۋ، باسپانامەن قامتاماسىز ەتۋ جانە وزگە دە الەۋمەتتىك قولداۋ شارالارى. قازىرگى ۋاقىتتا وقيعا ورنىندا تجد ماماندارى، پوليتسيا دەپارتامەنتىنىڭ قىزمەتكەرلەرى، مەديتسينا قىزمەتكەرلەرى جانە باسقا دا ءتيىستى قىزمەت وكىلدەرى جۇمىس ىستەۋدە. جاعداي مەنىڭ ءجىتى باقىلاۋىمدا", – دەپ جازدى وبلىس باسشىسى.

ەسكە سالايىق، باتىس قازاقستان وبلىسى سىرىم اۋدانى ورتالىعى جىمپيتى اۋىلىندا قايعىلى وقيعا بولدى. بقو تج دەپارتامەنتىنەن تۇسكەن الدىن الا مالىمەتكە قاراعاندا، وقيعا 4 ماۋسىم كۇنى ساعات 15.00-دەن كەتە بولدى. ق.ساعىرباەۆ كوشەسى 8-مەكەنجايدا تۇرعىن ءۇي ورتەندى.

بقو دەنساۋلىق ساقتاۋ باسقارماسى ءباسپاسوز قىزمەتىنىڭ ناقتىلاۋىنشا، بەس بالانىڭ ءبارىن دە اۋداندىق اۋرۋحاناعا تجد قىزمەتكەرلەرى تىرشىلىك بەلگىلەرى جوق كۇيىندە جەتكىزگەن. دارىگەرلەر قولدان كەلگەننىڭ ءبارىن جاسادى، الايدا ولاردى امان الىپ قالۋ مۇمكىن بولماعان.

Abai.kz