ۇلىتاۋ تورىندە «كوكمايسا-2025» فەستيۆالى ءوتتى.

بۇگىن ۇلتتىڭ كيەلى مەكەنى – ۇلىتاۋ جەرىندە ءداستۇرلى «كوكمايسا-2025» ۇلتتىق تاعامدار مەن سالت-داستۇرلەر فەستيۆالى سالتاناتتى تۇردە اشىلدى.  باستاۋىن 2018 جىلى العان فەستيۆال حالقىمىزدىڭ باي مۇراسىن جاڭعىرتىپ، ۇمىت بولا باستاعان سالت-داستۇرلەردى قايتا تىرىلتۋگە، ۇلتتىق قۇندىلىقتاردى ۇلىقتاۋعا باعىتتالعان.

سۋرەت: gov.kz سايتىنان الىندى.

«كوكمايسا-2025» فەستيۆالى – ۇلتتىق بولمىستى دارىپتەيتىن تاعىلىمدى مەرەكە عانا ەمەس، سونىمەن قاتار وڭىرلىك كاسىپكەرلىك پەن ءتۋريزمدى دامىتۋعا سەرپىن بەرەتىن ءتيىمدى مادەني-كوپشىلىك ينفراقۇرىلىم بولا الادى.

سۋرەت: gov.kz سايتىنان الىندى.

فەستيۆال «قىمىزمۇرىندىق» اتتى تەاترلاندىرىلعان كورىنىسپەن باستالىپ، «جوشى» ەتنو-فولكلورلىق ءانسامبلىنىڭ ءتول تۋىندىلارىمەن جالعاستى. اشىلۋ سالتاناتىندا ءسوز سويلەگەن ۇلىتاۋ وبلىسىنىڭ اكىمى داستان رىسپەكوۆ جينالعان جۇرتشىلىقتى مەرەكەمەن قۇتتىقتاپ، ۇلتتىق رۋح پەن مادەني مۇرانىڭ ۇرپاق ساباقتاستىعىنداعى ماڭىزىنا ەرەكشە توقتالدى.

سۋرەت: gov.kz سايتىنان الىندى.

فەستيۆال اياسىندا بيە بايلاۋ، كۇبى ىستاۋ، قىمىز اشىتۋ كورىنىستەرى كوپشىلىك نازارىنا ۇسىنىلىپ، ارنايى دايىندالعان قىمىز كەلگەن قوناقتارعا تەگىن تاراتىلدى.  ەت جەۋ جارىسى، قازاقشا كۇرەس، جىلىك سىندىرۋ، ساداق اتۋ، نايزا لاقتىرۋ، اسىق اتۋ، قوشقار كوتەرۋ سەكىلدى ۇلتتىق جارىستار ۇيىمداستىرىلدى. سايىستاردا جەرگىلىكتى سپورتشىلاردان وزگە، كورشىلەس قاراعاندى، قىزىلوردا، قوستاناي وبلىستارىنىڭ سپورتشىلارى دا باق سىنادى.

سۋرەت: gov.kz سايتىنان الىندى.

وڭىرلىك جانە جەرگىلىكتى قولونەر شەبەرلەرى ۇلتتىق بۇيىمداردى جاساپ كورسەتۋ ارقىلى كەلۋشىلەرگە شەبەرلىك ساباقتارىن وتكىزدى.

سونىمەن قاتار، بالالارعا ارنالعان ەتنوويىن الاڭدارى مەن ۇلتتىق ستيلدەگى اتتراكتسيوندار قىزىقتى ءارى تانىمدىق فورماتتا ۇسىنىلدى. ۇلتتىق كيىم ۇلگىلەرى مەن ءداستۇرلى تۇرمىستىق جابدىقتاردىڭ كورمەسى ءوتتى.

سۋرەت: gov.kz سايتىنان الىندى.

ساحنادا ەلىمىزگە تانىمال ونەر يەلەرى مەن جەرگىلىكتى شىعارماشىلىق ۇجىمدار ونەر كورسەتتى. ولاردىڭ قاتارىندا: بەكسۇلتان باراقباي، اقجول ءامىرحان، ءدىلناز سۇلتانباي، «ساكەن سەرىلەرى»، «تاندەم» دۋەتى، قايىرحان ەرعازى، ەلميرا داۋلەتباەۆا، دوسىمجان تاڭاتاروۆ، ۇلىتاۋ اۋداندىق مادەنيەت ءۇيىنىڭ بي ءانسامبلى، «التىن وردا» ۇلت اسپاپتار ءانسامبلى، «كەنشىلەر سازى» فولكلورلىق ءانسامبلى بار.

سۋرەت: gov.kz سايتىنان الىندى.

فەستيۆال سوڭىندا وتكىزىلگەن ۇلتتىق سپورت بايقاۋلاردىڭ جەڭىمپازدارىنا ديپلومدار مەن ارنايى سىيلىقتار تابىستالدى.

سۋرەت: gov.kz سايتىنان الىندى.

«كوكمايسا-2025» – بۇل سالت-ءداستۇر مەن زاماناۋي مادەنيەتتى ءبىر ارناعا توعىستىرىپ، ۇلت بولمىسىنىڭ تەرەڭ تامىرىن سەزىنۋگە مۇمكىندىك بەرەتىن تاعىلىمدى مەرەكە.

Abai.kz