وتكەن سەنبى كۇنى پاكىستان ۇكىمەتى اقش پرەزيدەنتى ترامپتى نوبەل بەيبىتشىلىك سىيلىعىنا ۇسىنعانىن جاريالادى. رەسمي مالىمدەمەدە ۇندىستانمەن بولعان سوعىستى اق ءۇي باسشىسىنىڭ ديپلوماتيالىق جولمەن رەتتەگەنىن، العىس رەتىندە پاكىستان تاراپتىڭ ونى حالىقارالىق بەدەلدى سىيلىققا ۇسىنعانى جازىلعان.

وتكەن ايدا ءۇندىستان مەن پاكىستان اراسىندا قيانكەسكى سوعىس بولعان ەدى. قاقتىعىس 4 كۇنگە جالعاستى. ارتىنان ترامپ اياق استىنان مالىمدەمە جاساپ، ەكى تاراپتىڭ ءوزى ارالاسقاندىقتان سوعىستى توقتاتۋعا كەلىسكەنىن، ءسويتىپ اتوم بومباسى قولدانىلۋى مۇمكىن قاقتىعىستىڭ الدىن الىپ، ميلليونداعان ادامنىڭ ءومىرىن ساقتاپ قالعانىن ماقتانىشپەن جازىپ ەدى.

ترامپ اق ۇيگە كەلۋدىڭ الدىندا "ۋكراينا مەن رەسەي سوعىسىن 24 ساعاتتا توقتاتام", "يزرايل مەن اراب ەلدەرىن تاتۋلاستىرام، ورتا شىعىستاعى جاعدايدى بەيبىت جولمەن رەتتەيمىن" دەپ ۋادەنى ءۇيىپ توككەنى بەلگىلى. سونداي-اق تالىپتەردىڭ بيلىككە كەلۋى مەن ءپۋتيننىڭ ۋكرايناعا سوعىس اشۋى بايدەننىڭ السىزدىگىنەن بولدى. مەن پرەزيدەنت بولىپ تۇرعاندا الەمدە بىردە-ءبىر سوعىس بولعان جوق دەپ تە داۋرىققان ەدى.

ءتىپتى مەن كەزىندە پۋتينگە: "سەن كيەۆتى بومبالاساڭ، مەن ماسكەۋدى بومبالايمىن دەپ اشىق ايتتىم، سودان ول اياعىن تارتتى", قىتاي باسشىسىنا دا: "ەگەر سەن تايۋاندى بومبالاساڭ، مەن بەيجىڭدى بومبالايمىن دەپ انىق ەسكەرتتىم" دەپ تە سۇحبات بەرگەن ەدى.

ءوزىن الەمگە بەيبىتشىلىك ورناتۋشى رەتىندە سيپاتتايتىن ترامپتىڭ ەكىنشى پرەزيدەنتتىك كەزىندە بەرگەن ۋادەلەرى ورىندالمادى. گازانىڭ جاعدايى اۋىر، ادامگەرشىلىك كومەككە مۇقتاج كۇيدە. ۋكراينا سوعىسى توقتاۋدىڭ ورنىنا جاڭا كەزەڭگە بەت الدى. ترامپ يزرايلگە بولىسىپ يرانعا اۋىر سوققى جاسادى. تاياۋ شىعىستاعى جاعداي بارعان سايىن ۋشىعىپ بارادى. ترامپتىڭ ايتقانىن ورىندايتىن ادام ەكەنى، كەرەك بولسا جاۋىنا اتوم بومباسىن تاستاۋدان دا تايىنبايتىنى انىق بولدى.

سونداي ادامدى نوبەل سىيلىعىنا ۇسىنعان پاكىستان دا ءپاتۋا بار ما؟ ماۋسىمنىڭ 14-ءى كۇنى ترامپتىڭ تۋعان كۇنىندە 100 مىڭعا جۋىق امەريكالىقتار "اق ۇيگە پاتشا كەرەك ەمەس" دەگەن ۇرانمەن كوشەگە شىقتى. ترامپتىڭ حالىقاراداعى عانا ەمەس، ەل ىشىندەگى شەشىمدەرى دە قاتاڭ قارسىلىققا تاپ بولىپ جاتىر. وسىلاي كەتە بەرسە اقش تا 2026-جىلى وتەتىن پارلامەنت سايلاۋىندا دەموكراتتار باسىم ورىن يەلەپ، ترەكەڭدى بيلىكتەن كەتىرۋى مۇمكىن.

Abai.kz