بۇگىن پارلامەنت ءماجىلىسىنىڭ جالپى وتىرىسىندا ءماجىلىس دەپۋتاتى ەرلان سايروۆ قازاقستانعا زاڭسىز كىرگىزىلىپ جاتقان كولىكتەرگە قاتىستى ماسەلە كوتەردى.

- ءوزىمىزدىڭ ىشكى نارىقتى شەتەلدەن كەلگەن ءارتۇرلى قوقىستان قورعاۋ كەرەك دەپ ويلايمىن. ءتۇرلى اقپارات بويىنشا قازىر ءبىزدىڭ ەۋرازيالىق ەكونوميكالىق وداق مەملەكەتتەرىنەن قازاقستانعا ءۇشىنشى ەلدەن كونتراباندامەن جەتكىزىلەتىن اۆتوموبيلدەر كىرىپ جاتىر. قازاقستانعا وڭ ءرولدى اۆتوكولىكتەردى كىرگىزۋگە تىيىم سالىنعان. دەگەنمەن، ەكى جىل ىشىندە ەلىمىزگە 56 مىڭ اۆتوموبيل جەتكىزىلگەن جانە ودان قازاقستانعا 70 ملرد تەڭگە زالال كەلدى دەگەن اقپارات بار. تاعى ءبىر بەيرەسمي مالىمەتكە سۇيەنسەك، كورشىلەرىمىز ارقىلى ەلىمىزگە جاپونيادان وڭ ءرولدى اۆتوكولىكتەر بولشەك رەتىندە كىرىپ، قازاقستاندا قايتادان قۇراستىرىلىپ، وعان وسىندا جاڭا قۇجاتتار دايىندالادى. بۇدان قوماقتى زالال كەلەدى دەگەن پىكىر ايتىلىپ وتىر. وسى جونىندە ۇكىمەت بىلە مە؟، - دەپ سۇرادى ە. سايروۆ.

ءوز كەزەگىندە پرەمەر-ءمينيستردىڭ ورىنباسارى – ۇلتتىق ەكونوميكا ءمينيسترى سەرىك جۇمانعارين وسى جونىندە ءتيىستى تەكسەرۋ جاساۋعا تاپسىرما بەرۋگە دايىن ەكەنىن ايتتى.

- جالپى ايتقاندا، وندايدى ەستىگەنىمىز بار. بولشەك رەتىندە اكەلىپ، وسىندا كونسترۋكتور ەتىپ جينايتىنى ايتىلدى. بىراق 56 مىڭ كولىك دەگەن وتە كوپ جانە ونداي دەرەكتى ەستىگەن جوقپىز. وسىنشاما كولىك كىرگىزىلسە، كورىنەتىن ەدى. ءسىزدىڭ مالىمەتتەردى ەسكەرىپ، وكىلەتتى ورگاندارعا تاپسىرما بەرەمىز. ولار تەكسەرەدى، - دەدى ۇكىمەت باسشىسىنىڭ ورىنباسارى.

ايتا كەتەيىك، بۇگىن ءماجىلىس ەۋرازيالىق ەكونوميكالىق وداقتىڭ كەدەن كودەكسى تۋرالى شارتقا ەلەكتروندىق ساۋدانى رەتتەۋ باعىتىندا وزگەرىستەر ەنگىزەتىن حاتتاماسىن راتيفيكاتسيالاۋ تۋرالى زاڭدى قابىلدادى.

Abai.kz