اقش پرەزيدەنتى دونالد ترامپ 1 تامىزدان باستاپ الەمنىڭ جۇزدەگەن ەلىنە جاڭا تاريفتەر ەنگىزىلەتىنى جونىندە رەسمي حات جولدادى.

اقش بيلىگى تاريفتەر ەنگىزگەن ەلدەردىڭ ءبىرى – ءبىزدىڭ قازاقستان. اقش پرەزيدەنتى ترامپ قازاقستان پرەزيدەنتى قاسىم-جومارت توقاەۆتىڭ اتىنا ءۇشبۋ حات جولداپ، 1 تامىزدان باستاپ ەنگىزىلەتىن تاريفتەر تۋرالى بايانداپتى.

ترامپتىڭ حاتىندا:

«2025 جىلعى 1 تامىزدان باستاپ، ءبىز اقش اۋماعىنا ەنگىزىلەتىن بارلىق قازاقستاندىق ونىمدەرگە – سەكتورلىق تاريفتەردەن بولەك – 25% كولەمىندە تاريف ەنگىزەمىز. ءۇشىنشى ەل ارقىلى قايتا جونەلتىلەتىن تاۋارلار ودان دا جوعارى تاريفكە ۇشىرايدى. نازار اۋدارىڭىز: بۇل 25% – قازاقستانمەن ساۋدا تاپشىلىعىن جويۋعا قاجەتتى دەڭگەيدەن الدەقايدا تومەن»، – دەپ جازىلعان.

ترامپ ءوز حاتىندا بۇل شەشىمدى «اقش پەن قازاقستان اراسىنداعى ساۋدا قارىم-قاتىناسىنىڭ مىقتىلىعىن كورسەتەتىن بەلگى» رەتىندە سيپاتتاپ، ەكى ەل اراسىنداعى ساۋدا-ساتتىقتىڭ تەڭگەرىمسىزدىگىنە قاراماستان، اقش قازاقستانمەن ىنتىماقتاستىقتى جالعاستىرۋعا دايىن ەكەنىن اتاپ وتەدى.

ونىڭ ايتۋىنشا، تاراپتار بىرنەشە جىل بويى ساۋدا ماسەلەلەرىن تالقىلاپ كەلەدى، بىراق قازىرگى كەزدە ۆاشينگتون ۇزاق مەرزىمدى تاپشىلىقتى جويۋدى ماڭىزدى دەپ سانايدى. سونىمەن قاتار، بۇل باج سالىعى اقش-تا وندىرىلگەن ونىمدەرگە قاتىستى قولدانىلمايدى.

«ەگەر ءسىز قانداي دا ءبىر سەبەپپەن ءوز تاريفتەرىڭىزدى ەنگىزۋ تۋرالى شەشىم قابىلداساڭىز، ولار قانداي دەڭگەيدە بولماسىن، بۇل 25 پايىزدىق باج سالىعىمىز ەسەلەنەتىن بولادى. بۇل تاريفتەردىڭ ساۋدا توسقاۋىلدارىن تۇزەتۋ ءۇشىن قاجەت ەكەنىن تۇسىنگەنىڭىزدى قالايمىز. ساۋدا تەڭگەرىمسىزدىگى – ءبىزدىڭ ەكونوميكامىزعا جانە ۇلتتىق قاۋىپسىزدىگىمىزگە ەلەۋلى قاۋىپ»، – دەلىنگەن حاتتا.

ترامپ 1 تامىزدان باستاپ تاريفتەردى كوتەرۋ بويىنشا جۇزدەگەن ەلگە حات جازدى. اقش پرەزيدەنتى سەربيا، بانگلادەش، كامبودجا، يندونەزيا، بوسنيا جانە گەرتسەگوۆينا، تۋنيس ەلدەرىنىڭ باسشىلارىنا ارناعان حاتتارىن جاريالادى. بۇل ەلدەر ءۇشىن تاريف مولشەرى 25%-دان 36%-عا دەيىن بولماق. مالايزياعا — 25% وڭتۇستىك افريكاعا — 30% لاوسقا — 40% ميانماعا — 40% ەنگىزدى.

ايىم الماسقىزى

Abai.kz