تۋريزم جانە سپورت مينيسترلىگى 2026 جىلدان باستاپ ۇيالى دەرەكتەر نەگىزىندە تسيفرلىق ستاتيستيكاعا كوشەدى. 

قر تۋريزم جانە سپورت مينيسترلىگى ستراتەگيالىق جوسپارلاۋ جانە رەفورمالار اگەنتتىگىنە قاراستى ۇلتتىق ستاتيستيكا بيۋروسىمەن بىرلەسىپ، ىشكى جانە كەلۋ ءتۋريزمى بويىنشا ستاتيستيكالىق دەرەكتەر جيناۋ جۇيەسىن جەتىلدىرۋ ماسەلەسىنە ارنالعان جۇمىس كەزدەسۋىن وتكىزدى. جيىندا بايلانىس وپەراتورلارىنان الىناتىن اقپاراتتى پايدالانا وتىرىپ، ستاتيستيكا جۇرگىزۋدىڭ جاڭا تاسىلدەرى تالقىلاندى.

كەزدەسۋ بارىسىندا ۇيالى بايلانىس وپەراتورلارىنىڭ دەرەكتەرى نەگىزىندە دايىندالعان 2024 جىلعى ىشكى تۋريستەر تۋرالى الدىن الا تالداۋ ناتيجەلەرى ۇسىنىلدى. قاتىسۋشىلار وتاندىق ساياحاتشىلار مەن تۋريستەردى ساپار ۇزاقتىعىنا جانە تۇنەگەن-تۇنەمەگەنىنە قاراي جىكتەۋ تاسىلدەرى، سونداي-اق قالىپتاسقان كورسەتكىشتەردىڭ اشىقتىعى مەن شىنايىلىعىن قامتاماسىز ەتۋگە قاجەتتى ادىستەمەلىك ولشەمدەردى تالقىلادى.

ۇيالى بايلانىس وپەراتورلارىنىڭ دەرەكتەرىن پايدالانۋ تۋريستەردىڭ ناقتى سانىن انىقتاۋعا مۇمكىندىك بەرەدى. بۇل ءبىر كۇندىك جانە تۇنەگەن نەمەسە تۇنەمەگەن ساپارلاردى دا قامتيدى. بۇرىن مۇنداي مالىمەتتەر ءداستۇرلى ستاتيستيكادا ەسكەرىلمەيتىن. وسى ارقىلى ەل اۋماعىنداعى تۋريستىك بەلسەندىلىك جان-جاقتى ءارى وبەكتيۆتى تۇردە كورسەتىلەدى.

ستاتيستيكالىق ەسەپ جۇرگىزۋ ادىستەمەسىن جاڭارتۋ قاجەتتىلىگى قولدانىستاعى ەسەپ جۇيەسىندەگى ولقىلىقتاردان تۋىنداپ وتىر. ماسەلەن، 2024 جىلى قازاقستانعا 15,3 ميلليون شەتەلدىك تۋريست كەلگەن، ونىڭ ىشىندە 10,4 ميلليونى ەل اۋماعىندا ءبىر كۇننەن كوپ بولعان. الايدا ولاردىڭ شامامەن 9 ميلليونى ورنالاستىرۋ ورىندارىندا تىركەلمەگەن، ال بۇل نىساندار رەسمي ستاتيستيكانىڭ نەگىزگى دەرەككوزى سانالادى. مۇنداي جاعداي تسيفرلىق قۇرالدار مەن جاڭا دەرەككوزدەر ارقىلى ەسەپ جۇرگىزۋ تاسىلدەرىن كەڭەيتۋ قاجەتتىگىن ايقىن كورسەتەدى.

حالىقارالىق تاجىريبەگە سايكەس، تۋريزم ستاتيستيكاسىندا ۇيالى بايلانىس دەرەكتەرىن قولدانۋ – ەڭ ءتيىمدى ادىستەردىڭ ءبىرى. مۇنداي تاجىريبە قازىرگى تاڭدا يندونەزيا، ومان، ەستونيا جانە ساۋد ارابياسى سياقتى ەلدەردە كەڭىنەن قولدانىلادى.

2026 جىلدان باستاپ ىشكى جانە كەلۋ ءتۋريزمى بويىنشا ۇيالى بايلانىس وپەراتورلارىنىڭ دەرەكتەرىنە نەگىزدەلگەن ەكسپەريمەنتتىك ستاتيستيكالىق مالىمەتتەردى جاريالاۋ جوسپارلانىپ وتىر. بۇل، ءوز كەزەگىندە، ينفراقۇرىلىمدى دامىتۋعا، ينۆەستيتسيا تارتۋعا جانە تۋريستەرگە كورسەتىلەتىن قىزمەت ساپاسىن جاقسارتۋعا قاجەتتى شىنايى تۋريستىك اعىن تۋرالى اقپارات الۋعا مۇمكىندىك بەرەدى.

Abai.kz