استانادا پەريزات قايراتتىڭ ءىسى بويىنشا سوت پروتسەسى جالعاسىپ جاتىر.

ايىپتالۋشى تاراپ كۇتپەگەن ءوتىنىش جاساپ، Nur Otan پارتياسى توراعاسىنىڭ بۇرىنعى ءبىرىنشى ورىنباسارى باۋىرجان بايبەكتى كۋاگەر رەتىندە تەرگەۋگە شاقىرۋدى سۇرادى.

پەريزات قايرات سوت بارىسىندا بايبەكتىڭ اتىن بىرنەشە مارتە اتاپ، اتىشۋلى ىسكە باسقا دا ىقپالدى تۇلعالاردىڭ قاتىسى بار ەكەنىن مەڭزەدى.

"ماعان اناممەن بىرگە قور قۇرىپ، قۇرىلتايشىلاردىڭ قولتاڭباسىن قولدان جاسادى دەگەن ايىپ تاعىلدى. بىراق بۇل قور پارتيا جانىنان، باۋىرجان بايبەكتىڭ جەتەكشىلىگى كەزىندە اشىلعان. مەنەن وزگە قۇرىلتايشىلاردىڭ ءبارى بۇرىنعى جانە قازىرگى پارتيا قىزمەتكەرلەرى. سوندىقتان الدىمەن سولاردىڭ جاۋابىن تىڭداۋ كەرەك»، – دەدى پەريزات قايرات سوت زالىندا.

ول قورعا تۇسكەن اقشانىڭ جىمقىرىلۋ ىسىندە پارتيانىڭ جوعارى لاۋازىمدى وكىلدەرىنىڭ قانداي ءرول اتقارعانىن انىقتاپ الۋدى سۇراۋدا.

ەسكە سالا كەتەيىك، باۋىرجان بايبەك 2019 جىلدىڭ ماۋسىمىنان 2022 جىلدىڭ قاڭتارىنا دەيىن Nur Otan پارتياسى توراعاسىنىڭ ءبىرىنشى ورىنباسارى بولعان. قازىر كيپردە تۇرىپ جاتىر دەيدى.

Abai.kz