قازاقستاندا “جۇمىسسىزدىق بويىنشا جاردەماقى” دەپ اتالاتىن ناقتى تولەم جوق، ونىڭ ورنىنا مەملەكەتتىك الەۋمەتتىك ساقتاندىرۋ قورىنان (ماسق) جۇمىسىنان ايىرىلۋ جاعدايىنا بايلانىستى الەۋمەتتىك تولەم قاراستىرىلعان.

بۇل وتەماقى بارلىق ازاماتتارعا ەمەس، تەك رەسمي تۇردە جۇمىس ىستەگەن جانە ولار ءۇشىن جۇمىس بەرۋشى ماسق-قا تۇراقتى تۇردە الەۋمەتتىك اۋدارىمدار جاساعان ادامدارعا عانا تولەنەدى.

ەڭبەك مينيسترلىگىنىڭ مالىمەتىنشە، 2025 جىلعى 1 شىلدەدەگى جاعداي بويىنشا جۇمىسىنان ايىرىلۋىنا بايلانىستى الەۋمەتتىك تولەم الۋشىلاردىڭ سانى 220,9 مىڭ ادامعا جەتكەن. ولارعا بارلىعى 62,2 ميلليارد تەڭگە تولەندى.

ونىڭ ىشىندە 161,9 ازامات بۇل تولەمدى العاش رەت بيىل العان. ولار جۇمىسىن 2025 جىلى جوعالتقان.

تولەمدى الۋ ءۇشىن جۇمىستان ايىرىلۋ جەتكىلىكسىز. جۇمىسىنان ايىرىلعان ازامات كەلەسى راسىمدەردەن ءوتۋى كەرەك:

• ەلەكتروندىق ۇكىمەت پورتالىندا (egov.kz) اۆتوريزاتسيادان ءوتۋ;

• “جۇمىسپەن قامتۋ جانە جۇمىسقا ورنالاستىرۋ” بولىمىندە "جۇمىس ىزدەۋشى تۇلعالاردى تىركەۋ” قىزمەتىن تاڭداۋ;

• قىزمەتكە ءوتىنىش بەرىپ، ەتسق ارقىلى قول قويۋ.

وسىدان كەيىن كارەرلىك ورتالىق 1 جۇمىس كۇنى ىشىندە لايىقتى بوس جۇمىس ورنىن ۇسىنادى. ەگەر تابىلماسا، 3 جۇمىس كۇنى ىشىندە ازاماتقا “جۇمىسسىز” مارتەبەسى بەرىلەدى جانە وعان ماسق-تان الەۋمەتتىك تولەم راسىمدەۋ تۋرالى SMS-حابارلاما جىبەرىلەدى.

الەۋمەتتىك تولەم تۋرالى ءبىلۋ قاجەت اقپارات:

• تولەنۋ مەرزىمى: 1 ايدان 6 ايعا دەيىن;

• تولەم مولشەرى: الەۋمەتتىك ساقتاندىرۋ جۇيەسىنە قاتىسۋ وتىلىنە جانە جوعالعان جالاقىعا بايلانىستى. بىراق جالاقىنىڭ 45% مولشەرىنەن اسپايدى;

• قايتا راسىمدەۋگە بولادى، الايدا بۇل جاعدايدا تولەم مولشەرى ايتارلىقتاي ازايادى;

• جۇمىستان شىعۋ سەبەبى ماڭىزدى ەمەس، بارلىق جاعدايدا تاعايىندالادى.

ايتا كەتەيىك، الەۋمەتتىك تولەم الۋشىلار سانى ەلدەگى ناقتى جۇمىسسىزدىق دەڭگەيىن كورسەتپەيدى.