وزبەكستاندا ەكسترەميستىك ۇيىمدارعا قاتىسقانى ءۇشىن جازا كۇشەيتىلۋدە...

ەكسترەميستىك، سەپاراتيستىك، فۋندامەنتاليستىك نەمەسە باسقا دا تىيىم سالىنعان ۇيىمدارعا قاتىسۋ 5 جىلدان 10 جىلعا دەيىنگى مەرزىمگە باس بوستاندىعىنان ايىرۋمەن جازالانادى.

بۇل تۋرالى رەسپۋبليكانىڭ قىلمىستىق كودەكسىنە ەنگىزىلگەن وزگەرىستەردە ايتىلعان. سونداي-اق ادىلەت مينيسترلىگى ەكسترەميستىك ۇيىمدار مەن ماتەريالداردىڭ ەلەكتروندى ءتىزىلىمىن جۇرگىزەدى جانە ول ۆەدومستۆونىڭ سايتىندا اشىق قولجەتىمدىلىكتە ورنالاستىرىلادى.

بۇدان بولەك، ەنگىزىلگەن باسقا دا وزگەرىستەرگە سايكەس، تىيىم سالىنعان ۇيىمداردىڭ ەكسترەميستىك ماتەريالدارى مەن نىشاندارىن تاراتۋ ماقساتىندا دايىنداعانى جانە ساقتاعانى ءۇشىن ايىپپۇلدار نەمەسە 15 تاۋلىككە دەيىن اكىمشىلىك قاماۋعا الۋ شاراسى ەنگىزىلەدى.

Abai.kz