«ۇلت رامىزدەرى – تاۋەلسىزدىگىمىزدىڭ كيەلى بويتۇمارى. ەلتاڭبا، تۋ جانە ءانۇران – مىزعىماس مەملەكەتتىگىمىزدىڭ بەلگىسى. قاستەرلى نىشاندارىمىز قازاقستاننىڭ ەگەمەن ەل، ەڭسەلى جۇرت ەكەنىن جەر جۇزىنە ايگىلەيدى. بايراعى بيىك ەلدىڭ رۋحى اسقاق بولادى».

مەملەكەت باسشىسى قاسىم-جومارت توقاەۆ

تاۋەلسىز قازاقستاننىڭ العاشقى اكتىلەرىنىڭ ءبىرى 1992 جىلى 4 ماۋسىمدا مەملەكەتتىك تۋ مەن ەلتاڭبانىڭ بەكىتىلۋى بولدى. 2007 جىلى 4 ماۋسىمدا «قازاقستان رەسپۋبليكاسىنىڭ مەملەكەتتىك رامىزدەرى تۋرالى» كونستيتۋتسيالىق زاڭ قابىلداندى. بۇل كۇن ەل تاريحىندا مەملەكەتتىك رامىزدەردىڭ تۋعان كۇنى رەتىندە ماڭگى قالادى.

مەملەكەتتىك رامىزدەر – كەز كەلگەن مەملەكەتتىڭ بىرەگەيلىگى مەن ەگەمەندىگىن تانىتاتىن اجىراماس اتريبۋتتارىنىڭ ءبىرى. قازاقستان رەسپۋبليكاسىندا مەملەكەتتىك رامىزدەر – مەملەكەتتىك تۋ، مەملەكەتتىك ەلتاڭبا جانە مەملەكەتتىك ءانۇران.

وسى رەتتە ءبىز قاراعاندى وبلىسى ىشكى ساياسات باسقارماسىنىڭ باسشىسى نۋرلان بيكەنوۆ مىرزانىڭ مەملەكەتتىك رامىزدەردى ۇلىقتاۋ ءھام كەلەر ۇرپاققا دارىپتەۋ بويىنشا وبلىستا اتقارىلىپ جاتقان كەلەلى جۇمىستارى تۋرالى ماقالاسىن پورتال وقىرماندارىنىڭ تالقىسىنا ۇسىنعاندى ءجون سانادىق.

***

مەملەكەتتىك رامىزدەر – تاۋەلسىز قازاقستاننىڭ ەڭ باستى قۇندىلىقتارىنىڭ ءبىرى، حالقىمىزدىڭ تاريحى مەن بولاشاعىن بايلانىستىراتىن كيەلى نىشاندار. وسى تۇرعىدا ازاماتتىق بىرەگەيلىكتى نىعايتۋ مەن مەملەكەتتىك رامىزدەردى تاۋەلسىزدىگىمىزدىڭ ماڭىزدى اتريبۋتتارى رەتىندە ناسيحاتتاۋ باعىتىندا اقپاراتتىق سۇيەمەلدەۋ مەن ءتۇسىندىرۋ جۇمىستارىنىڭ ماڭىزى زور.

قاراعاندى وبلىسىندا بۇل جۇمىس جۇيەلى ءارى كوپقىرلى سيپاتتا جۇرگىزىلۋدە. جىل باسىنان بەرى مەملەكەتتىك رامىزدەر ماسەلەلەرىمەن اينالىساتىن 14 كوميسسيانىڭ جۇمىسى جانداندى. كوميسسيا وتىرىستارىندا مەكەمەلەر مەن بۇقارالىق ءىس-شارالاردا تۋ، ەلتاڭبا جانە گيمندى دۇرىس پايدالانۋ ماسەلەلەرى قارالدى.

نەگىزگى ءىس-شارالاردىڭ ءبىرى – «قازاقستان رەسپۋبليكاسىنىڭ مەملەكەتتىك رامىزدەرىن ناسيحاتتاۋ جانە قولدانۋدىڭ ادىستەرى مەن تۇرلەرى» اتتى وبلىستىق سەمينار بولدى. قاتىسۋشىلار مەملەكەتتىك رامىزدەردى ىلگەرىلەتۋدەگى وزىق تاجىريبەلەردى، جاڭا تاسىلدەر مەن اقپاراتتىق-ءتۇسىندىرۋ جۇمىستارىن جۇرگىزۋگە ارنالعان ادىستەمەلىك ۇسىنىمداردى تالقىلادى.

مەملەكەتتىك رامىزدەر كۇنىنە وراي قالالار مەن اۋدانداردىڭ ورتالىق الاڭدارىندا مەملەكەتتىك تۋ كوتەرىلىپ، گيمن ءبىر مەزەتتە ورىندالعان اۋقىمدى سالتاناتتى شارالار ءوتتى. وبلىس ورتالىعىندا 3 مىڭنان استام ادام قاتىسقان «تۋعان جەرىم – قازاقستانىم!» اتتى پاتريوتتار فورۋمى ۇيىمداستىرىلدى. مەملەكەتتىك رامىزدەر كۇنى بەس ەرىكتى ازامات قاراعاندى وبلىسى اكىمىنىڭ العىس حاتىمەن ماراپاتتالدى.

مونيتورينگ جانە ادىستەمەلىك قولداۋ جۇمىستارىن وبلىستىق ينسپەكتسيالىق توپ جۇزەگە اسىرۋدا. سوڭعى ەكى جىلدا 500-دەن استام نىسان تەكسەرىلىپ، ونىڭ ىشىندە 170 نىسان بيىل قامتىلدى. ماڭىزدى باعىتتاردىڭ ءبىرى وقىتۋ: جىل سايىن مەملەكەتتىك رامىزدەر وندىرۋشىلەرىنىڭ جانە سالالىق ساراپشىلاردىڭ قاتىسۋىمەن سەمينارلار وتكىزىلەدى. مىڭداعان دانا ادىستەمەلىك قۇرالدار جارىق كورىپ، قولدانىسقا ەنگىزىلدى.

جاستارعا ەرەكشە كوڭىل بولىنۋدە. قۇرامىندا 300-دەن استام ۇگىتشى بار اقپاراتتىق-ناسيحات توپتارى ارقىلى 15 مىڭنان استام ادام قامتىلدى. جوو ستۋدەنتتەرى، كوللەدجدەر مەن مەكتەپتەردىڭ جوعارى سىنىپ وقۋشىلارى پاتريوتيزم، زاڭعا باعىنۋ جانە ازاماتتىق جاۋاپكەرشىلىك ماسەلەلەرى كوتەرىلەتىن كەزدەسۋلەر مەن ترەنينگتەردىڭ بەلسەندى قاتىسۋشىلارىنا اينالدى.

ءبىلىم بەرۋ مەكەمەلەرىندە مەملەكەتتىك رامىزدەر تاقىرىبى تاربيەلىك پروتسەستىڭ ماڭىزدى بولىگىنە اينالعان. مەكتەپتەردە پاتريوتتىق بۇرىشتار بەزەندىرىلىپ، اشىق ساباقتار، دوڭگەلەك ۇستەلدەر، پاتريوتتىق اكتسيالار تۇراقتى تۇردە وتكىزىلەدى. بۇل جۇمىسقا اتا-انالار مەن پەداگوگتار دا تارتىلادى. بۇل باعىتتا وبلىستىڭ كوپتەگەن مادەنيەت مەكەمەلەرى جۇمىستار جۇرگىزۋدە. كىتاپحانالاردا 670-تەن استام تاقىرىپتىق ءىس-شارا، 550-دەن استام كورمە ۇيىمداستىرىلدى. حالىقارالىق ارەنالاردا جەتىستىككە جەتكەن سپورتشىلارىمىز مەملەكەتتىك گيمندى ورىنداپ، تۋدى بيىككە كوتەرىپ، رامىزدەردى ناسيحاتتاۋدىڭ قۋاتتى ارناسىنا اينالىپ وتىر.

مەملەكەتتىك رامىزدەر مەن ءپاتريوتيزمدى ناسيحاتتاۋدا بۇقارالىق اقپارات قۇرالدارى مەن الەۋمەتتىك جەلىلەردىڭ ءرولى زور. جىل باسىنان بەرى مەرزىمدى باسىلىمداردا جانە تەلەديداردا پاتريوتتىق تاربيە مەن مەملەكەتتىك رامىزدەرگە قاتىستى ماتەريالدار تۇراقتى جاريالانۋدا. الەۋمەتتىك جەلىلەردە «مەنىڭ تۋىم – مەنىڭ ماقتانىشىم» اكتسياسى اياسىندا 4000-دەن استام جازبا مەن بەينەروليك ورنالاستىرىلدى.

ايتا كەتۋ كەرەك، بۇل جۇمىس تەك رەسمي شارالارمەن شەكتەلمەيدى. بۇل – قازاقستاننىڭ جاڭا ۇلتتىق بىرەگەيلىگىن قالىپتاستىرۋدىڭ جاندى  ۇدەرىسى، تاريحىمىزبەن تىعىز بايلانىسقان، بولاشاققا سەنىممەن قارايتىن، كەمەل جانە سانالى قوعامدى قالىپتاستىرۋ جولىنداعى ماڭىزدى قادام.

بۇگىنگى كۇنى بىرلىك، تۇراقتىلىق جانە ىنتىماق دامۋىمىزدىڭ باستى فاكتورىنا اينالدى. وسى تۇرعىدا قوعامنىڭ رۋحاني باعدارى دا ودان ءارى نىعايا ءتۇسۋى ءتيىس. بۇل – مەملەكەتتىك رامىزدەرگە قۇرمەتپەن قاراۋدىڭ، وتانعا ادالدىقتىڭ جانە بولاشاق الدىنداعى جاۋاپكەرشىلىكتىڭ بەلگىسى.

نۋرلان بيكەنوۆ،

قاراعاندى وبلىسى ىشكى ساياسات باسقارماسىنىڭ باسشىسى

Abai.kz