كوشى-قون ۇردىسىندەگى قۇقىق پەن ساياساتتىڭ اراجىگىن اجىراتا بىلگەن دۇرىس…

پرەمەر-مينيستر ولجاس بەكتەنوۆ مىرزانىڭ نازارىنا!

ۇكىمەتباسى ولجاس بەكتەنوۆ الداعى جەردە شەتتەن ورالعان قانداستارىمىزدى ەلىمىزدىڭ سولتۇستىك جانە شىعىس وڭىرلەرىنە تارتۋعا باسىمدىق بەرمەكشى ەكەن.

مەن ولجاس ابايۇلىنىڭ بۇل باستاماسىن قوس قولداپ قولدايمىن. ءتىپتى، تاجىريبەلى مامان رەتىندە كومەكتەسۋگە دە دايىنمىن!

ەستە بولاتىنى، اتاجۇرتىنا ورالعان اعايىنداردى سولتۇستىك جانە شىعىس وڭىرلەرگە تارتۋ — بۇل — مەملەكەتتىك ساياسات!

بۇل ساياسات وڭىرلىك شەكتەۋ قويۋ تارتىبىمەن ەمەس، ىنتالاندىرۋ تاسىلىمەن جۇرگىزىلۋى ءتيىس.

«وڭىرلەردە قانداستار مەن ىشكى قونىس اۋدارۋشىلارعا بارلىق قاجەتتى كومەك كورسەتىپ، جاردەم بەرۋ كەرەك!»، - دەپتى ولجاس بەكتەنوۆ مىرزا.

مىنە، وسىنداي ىنتالاندىرۋ تاسىلدەرىمەن…

ال، شەكارا سىرتىنداعى اعايىنداردىڭ قازاقستانعا ورالۋى جانە تۇرعىلىقتى مەكەندى ءوز قالاۋىنشا تاڭداپ الۋى — بۇل — ولاردىڭ اتا زاڭمەن بەكىتىلگەن قۇقىعى!

وڭىرلىك شەكتەۋ قويۋ — قازاقستان رەسپۋبليكاسىنىڭ كونستيتۋتسياسىنا قايشى كەلەدى.

دەمەك، الداعى جەردە «زاڭ مەن ءتارتىپ» – مەملەكەتتىك قۇرىلىستىڭ باستى قاعيداتى (ق.توقاەۆ) ەكەنىن ەسكەرە وتىرىپ، كوشى-قون ۇردىسىندەگى قۇقىق پەن ساياساتتىڭ اراجىگىن اجىراتا بىلگەن دۇرىس.

مەملەكەتتىك ساياسات ەشقاشان شەتتەن ورالعان قانداستارىمىزدىڭ قۇقىعىن شەكتەمەۋى كەرەك!

ۇكىمەت وسى جاعىنا اباي بولسا ەكەن دەيمىن! بۇل — ءبىر!

ەكىنشىدەن، ۇكىمەت باسشىسى ولجاس بەكتەنوۆ مىرزا ەڭبەك جانە حالىقتى الەۋمەتتىك قورعاۋ مينيسترلىگىنە مۇددەلى مەملەكەتتىك ورگاندارمەن بىرلەسىپ، وسى جىلدىڭ 1 قازانىنا دەيىن ۇكىمەتكە قازاقستان رەسپۋبليكاسىنىڭ كوشى-قون جانە دەموگرافيالىق ساياسات تۇجىرىمداماسىنىڭ جوباسىن ەنگىزۋدى تاپسىرىپتى.

قىزىق بولعاندا، قازاقستان رەسپۋبليكاسى ۇكىمەتىنىڭ 2022 جىلعى 30 جەلتوقسانداعى № 961 قاۋلىسىمەن بەكىتىلگەن قازاقستان رەسپۋبليكاسى كوشى-قون ساياساتىنىڭ 2023 – 2027 جىلدارعا ارنالعان تۇجىرىمداماسى سوڭىنا جەتپەي جاتىپ قايتا جالماقشى.

دەمەك، بۇل — 2022 جىلعى بەس جىلدىق تۇجىرىمداما ۋاقىت تالابىنا ساي ەمەس، ەلىمىزدىڭ كوشى-قون ساياساتىن پرەزيدەنتتىڭ تاپسىرماسىنا ساي ءوز دەڭگەيىندە جۇرگىزۋگە جارامسىز بولدى دەگەن ءسوز!

اتالعان 2022 جىلى ۇكىمەت بەكىتكەن بەس جىلدىق تۇجىرىمداما قابىلداناردا پرەزيدەنتىمىز قاسىم-جومارت توقاەۆ 2022 جىلعى جولداۋىنداۋىندا وسى ماسەلەگە ارنايى توقتالىپ، «بۇل ورايدا، دەموگرافيالىق جانە ەكونوميكالىق ۇردىستەردى ەسكەرۋ كەرەك. سونداي-اق، جالپىۇلتتىق مۇددەنى باسشىلىققا الۋ وتە ماڭىزدى!»، - دەگەن نۇقاۋ بەرگەن بولاتىن.

وكىنىشكە وراي، ۇكىمەت قاسىم-جومارت كەمەلۇلىنىڭ بۇل ءسوزىن قاپەرىنە دە العان جوق!

كەرىسىنشە، ۇكىمەت وڭىرلىك شەكتەۋ قويىپ، اتاجۇرتىنا ورالعان قانداستارىمىزدىڭ قۇجاتتانۋ پروتسەسسىن وتە قيىنداتىپ جىبەردى.

اتاپ ايتار بولساق:

- «حالىقتىڭ كوشى-قونى تۋرالى» زاڭىنداعى اتى شۋلى 20-باپتىڭ 5) تارماعى ارقىلى ۇكىمەت ايقىنداعان سەگىز وبلىستان وزگە توعىز وبلىس پەن الماتى، استانا، شىمكەنت – ءۇش قالاعا ءوز بەتىمەن كوشىپ كەلىپ قونىستانعىسى كەلەتىن ەتنيكالىق قازاقتارعا «قانداس» مارتەبەسى بەرىلمەيتىن ەتىپ تاستادى، ءسويتىپ ولاردى قونىستاناتىن ءوڭىرىن تاڭداۋ قۇقىعىنان ايىردى، قازاقستان رەسپۋبليكاسىنىڭ ازاماتتىعىن الۋىن شەكتەدى;

- بۇرىن بەس جۇمىس كۇنى ىشىندە بەرىلىپ كەلگەن «قانداس» مارتەبەسىن وتىز بەس كۇندە بەرىلەتىن ەتىپ، جاڭادان قاتاڭ ءتارتىپ ەنگىزدى;

- «اتا-جولى» كارتاسى جوباسىن اينالىمعا ەنگىزگەنىمەن، اتالعان كارتانى العان ەتنيكالىق قازاقتاردىڭ قۇقىقتارى مەن مىندەتتەرى زاڭمەن بەكىتىلمەگەن بولىپ شىقتى;

- «حالىقتىڭ كوشى-قونى تۋرالى» زاڭىنىڭ 21-1-بابىنىڭ 2 تارماعىندا «قازاقستان رەسپۋبليكاسىنىڭ اۋماعىندا تۇراتىن قانداستاردىڭ جەسىرلەرى مەن ولاردىڭ ورتاق بالالارى وزدەرىنىڭ وتباسى مۇشەلەرىن قانداستاردى قابىلداۋدىڭ وڭىرلىك كۆوتاسىنا ەنگىزۋ تۋرالى وتىنىشپەن جەرگىلىكتى اتقارۋشى ورگاندارعا جۇگىنە الادى جانە ولاردىڭ وسى زاڭنىڭ 19-1-بابىندا ايقىندالعان تارتىپپەن وعان ەنگىزىلۋگە قۇقىعى بار»- دەپ اشىق جازىلعانىنا قاراماستان، قازاقستان رەسپۋبليكاسى پرەمەر-ءمينيسترىنىڭ ورىنباسارى - ەڭبەك جانە حالىقتى الەۋمەتتىك قورعاۋ ءمينيسترىنىڭ 2023 جىلعى 22 ماۋسىمداعى №234 بۇيرىعى ارقىلى قانداستاردىڭ جەسىرلەرىن تۇرعىن ءۇي قۇنىنىڭ 50% مولشەرىندە، بىراق 1 160 اەك-تەن اسىرماي بەرىلەتىن ەكونوميكالىق موبيلدىلىك سەرتيفيكاتىنان ايىرىپ تاستادى...

ول از دەسەڭىز، 2024 جىلعى 12 قىركۇيەك كۇنى باس پروكۋراتۋرا قونىس اۋدارۋ باعدارلاماسىنا بولىنگەن ءبىر ميللياردتان استام تەڭگەنىڭ ۇرلانعانى تۋرالى اقپارات تاراتتى.

قىسقاسى، اشىعىن ايتايىن، ۇكىمەتتىڭ ءبىز سەكىلدى كوشى-قون پروتسەسسىن باسىنان وتكىزگەن جانە كوشى-قون ساياساتىمەن ۇزاق جىلدان بەرى وتە بەلسەندى اينالىسىپ كەلە جاتقان تاجىريبەلى ماماندارمەن اقىلداسپاي، كەڭسەدە وتىرىپ جاساعان تۇجىرىمداماسى شەكارا اتتاپ كەلگەن اعايىندى ازاپقا سالدى، مەملەكەتتى شىعىنعا ۇشىراتتى!

ودان دا ماڭىزدىسى، مەملەكەت پەن پرەزيدەنتتىڭ بەدەلىنە وراسان زور نۇقسان جەتكىزدى!

ءبىز — قازاقستانعا بولسا ەكەن دەگەن ناعىز پاتريوتپىز!

زاڭ شىعارۋشى ورگان مەن اتقارۋشى بيلىك وكىلدەرى جىبەرگەن وسىناۋ قاتەلىكتەر تۋرالى قاتتىراق ايتقانىمىز ءۇشىن ۇكىمەت بىزدەن قاشپاۋى، كەرىسىنشە حالىق ۇنىنە قۇلاق اساتىن ۇكىمەت بىزبەن كەڭەسۋى، ۇسىنىستارىمىزدى دەن قويىپ تىڭداۋى كەرەك!

بۇدان ۇكىمەت تە، حالىق تا ۇتىلمايدى!

قانداستارعا جاسالعان كەدەرگى — ۇلقا، مەملەكەتكە جاسالعان قاستاندىق دەپ بىلەمىن!

باياعىداي جىلىنا ءجۇز مىڭداپ كەلىپ جاتقان قازاق جوق. كوپ بولسا، ءبىر جىلدا جيىرما مىڭنىڭ و جاق، بۇ جاعىندا عانا قانداستارىمىز ورالۋدا.

ۇكىمەت كەلگەن قازاقتى كەرى تەپپەۋى ءتيىس!

قۇرمەتتى ولجاس ابايۇلى بۇل جاعىن دا ەسكەرسە ەكەن، الدا جاسالاتىن جاڭا تۇجىرىمدامادا بۇرىنعى قاتەلىكتەر قايتالانباسا ەكەن، كوشىپ كەلگەن قانداستارىمىزدىڭ تەز قۇجاتتانىپ، جاڭا ورتاعا بىردەن سىڭىسۋىنە داڭعىل جول اشىلسا ەكەن دەيمىن!

اۋىت مۇقيبەك

Abai.kz